कञ्चनपुर, दोधारा चाँदनी: यहाँको दोधारा चाँदनी नगरपालिका–१ स्थित मायापुरी सामुदायिक वनमा सुख्खा बन्दरगाह निर्माणका लागि रुख कटान सुरु गरिएको छ। नेपाल इन्टरमोडल यातायात विकास समितिका इन्जिनियर अनिश केसीका अनुसार, एक साताअघि सुरु गरिएको रुख कटान अन्तर्गत हालसम्म ५०० वटा रुख फडानी भइसकेका छन्।
उनका अनुसार कुल १,५९३ वटा रुख काट्नुपर्ने छ। रुख कटानको ठेक्का रु ४१ लाखमा सम्झौता गरिएको छ।
भारतको सहयोगमा निर्माण, बहुप्रतीक्षित योजना
भारत सरकारको आर्थिक तथा प्राविधिक सहयोगमा निर्माण हुन लागेको सुख्खा बन्दरगाहका लागि नेपाल र भारत सरकारबीच १ जुन २०२३ मा सम्झौता पत्रमा हस्ताक्षर भएको थियो। सोही सम्झौताको आधारमा हाल पूर्वतयारीका कामहरू भइरहेको जनाइएको छ।
भारतीय पक्षले बन्दरगाह निर्माणका लागि INR 2 अर्ब ५४ करोड ३१ लाख ९९ हजार लागतमा ठेक्का आह्वान गरिसकेको छ। बन्दरगाह निर्माण स्थल खाली गराएर भारतीय पक्षलाई हस्तान्तरण गरेपछि पूर्वाधार निर्माण कार्य सुरु हुनेछ।
आधुनिक पूर्वाधारसहितको बन्दरगाह
नेपाल इन्टरमोडल यातायात विकास समितिका अनुसार, ४२.३६ हेक्टर क्षेत्रफलमा निर्माण हुने सुख्खा बन्दरगाहमा दुईवटा गोदाम भवन, भन्सार चेकजाँच भवन, क्वारेन्टाइन भवन, इमिग्रेशन भवन, सुरक्षा भवनलगायत पूर्वाधार समावेश गरिनेछ।
नेपालले बन्दरगाहसम्म पुग्ने छ लेनको पहुँच मार्ग र महाकाली नदीमा चार लेनको पक्की पुल निर्माण गरी सञ्चालनमा ल्याइसकेको छ। भारत सरकारले पनि आफ्नो पक्षबाट बन्दरगाहसम्मको पहुँच मार्ग निर्माण गरिरहेको छ।
१८ वर्षपछि कार्यान्वयनमा
सुख्खा बन्दरगाह निर्माणको प्रस्ताव सरकारले पहिलोपटक २०६४ सालमा अघि सारेको थियो। तर १८ वर्षपछि मात्र यस योजना कार्यान्वयनमा आएको हो। पश्चिमी नाका सञ्चालनमा आएपछि सुदूरपश्चिमको व्यापार, ढुवानी र समग्र आर्थिक विकासमा उल्लेखनीय टेवा पुग्ने अपेक्षा गरिएको छ।
