धनुषा: नेपाल समाजवादी पार्टी (नयाँ शक्ति) का अध्यक्ष एवं पूर्वप्रधानमन्त्री डा. बाबुराम भट्टराईले नेपालमा राजतन्त्र पुनःस्थापना हुने कुनै सम्भावना नरहेको बताएका छन्। जनकपुरधामस्थित प्रादेशिक पार्टी कार्यालयमा आयोजित पत्रकार सम्मेलनमा उनले संविधानसभाले गरेको निर्णयलाई चुनौती दिने कुनै पनि गतिविधि स्वीकार्य नहुने स्पष्ट पारे।
डा. भट्टराईले नेपाल बहुजातीय, बहुभाषिक, बहुसांस्कृतिक, र बहुधार्मिक राष्ट्र भएकाले सबैबीच एकता आवश्यक रहेको बताए। उनले कुनै एक जाति र धर्म मान्ने पुरुषलाई राज्यसत्तामा ल्याउने प्रयासले समावेशिता तथा जातीय र क्षेत्रीय विविधतामाथि आघात पुग्ने भन्दै यस्तो कदमले गम्भीर द्वन्द्व निम्त्याउने चेतावनी दिए।
उनका अनुसार नेपालका लागि अग्रगामी राजनीतिक विकल्प सङ्घीय लोकतान्त्रिक गणतन्त्र नै हो। उनले स्थिरता कायम गर्न प्रत्यक्ष निर्वाचित कार्यकारी प्रणाली आवश्यक रहेको औंल्याउँदै, सङ्घीयता पूर्णरूपमा कार्यान्वयन हुन नसक्नुको कारण आवश्यक नियम तथा कानुन समयमा नबनाइनु भएको बताए।
