काठमाडौं । हाल नेपालमा पश्चिमी र स्थानीय वायुसँगै पूर्वी भूभाग नजिक तल्लो वायुमण्डलमा बनेको न्यून चापीय प्रणालीको प्रभाव रहेको छ। यसको असरले देशभर अधिकांश स्थानमा बादल लागेको छ।
बागमती र गण्डकी प्रदेशका धेरै ठाउँमा, कोशी, लुम्बिनी र कर्णाली प्रदेशका केही स्थानमा तथा मधेश र सुदूरपश्चिम प्रदेशका एक-दुई स्थानमा मेघगर्जन, चट्याङ र हावाहुरीसहित मध्यम वर्षा भइरहेको छ।
आज दिउँसो देशभर सामान्यदेखि पूर्ण बदली रहनेछ। कोशी र मधेश प्रदेशसहित हिमाली तथा पहाडी भूभागका केही स्थानमा र तराईका थोरै ठाउँमा मेघगर्जन र चट्याङसहित मध्यम वर्षा तथा हिमपातको सम्भावना रहेको छ।
आज राति हिमाली क्षेत्रमा सामान्य बदली र पहाडी तथा तराई क्षेत्रमा आंशिक बदली रहनेछ। कोशी, बागमती र गण्डकी प्रदेशका हिमाली तथा पहाडी क्षेत्रका केही स्थानमा र अन्य भूभागका थोरै ठाउँमा मध्यम वर्षा तथा हिमपात हुने सम्भावना रहेको छ।
