काठमाडौं। शुक्रबार राति इजरायली हवाई आक्रमणले दक्षिण लेबनानका विभिन्न क्षेत्रलाई निरन्तर लक्षित गर्दा कम्तीमा १३ जनाको मृत्यु भएको छ। लेबनानी सरकारी स्रोतलाई उद्धृत गर्दै समाचार एजेन्सी सिन्ह्वाले जनाएअनुसार आक्रमणका क्रममा संयुक्त राष्ट्रसंघीय अन्तरिम बल (युनिफिल) अन्तर्गत रहेको नेपाली बटालियनको ब्यारेकमा समेत गोला खसेको छ।
लेबनानको स्वास्थ्य मन्त्रालयअन्तर्गतको आपतकालीन सञ्चालन केन्द्रका अनुसार इजरायली आक्रमणले इस्लामिक हेल्थ अथोरिटी र इस्लामिक रिसाला स्काउट्सद्वारा सञ्चालित संयुक्त आपतकालीन केन्द्रलाई प्रत्यक्ष लक्ष्य बनाउँदा दुई जना उद्धारकर्मीको मृत्यु भएको छ भने पाँच जना घाइते भएका छन्।
नाबातिये सहरको अल–राहिबात क्षेत्रमा एक घरमा इजरायली युद्धविमानले आक्रमण गर्दा एक बालिका सहित छ जनाको मृत्यु भएको छ। दक्षिणी सीमा सहर बिन्त ज्बेलमा भएको अर्को आक्रमणमा तीन जनाको ज्यान गएको छ भने तटीय सहर घाजियेमा भएको आक्रमणमा दुई बालबालिकाको मृत्यु भएको बताइएको छ।
लेबनानको राष्ट्रिय समाचार एजेन्सीका अनुसार इजरायली तोपका गोला दक्षिणी सीमा गाउँ माइस अल–जबलस्थित युनिफिलको नेपाली बटालियनको ब्यारेकभित्र पनि खसेका थिए।
बेइरुतस्थित नेपालको मानद वाणिज्यदूतावासले एक विज्ञप्ति जारी गर्दै उक्त आक्रमणको कडा निन्दा गरेको छ। विज्ञप्तिमा कुनै नेपाली सैनिक घाइते नभएको स्पष्ट पार्दै संयुक्त राष्ट्रसंघीय शान्ति सेनाको ब्यारेकलाई लक्ष्य बनाउनु अन्तर्राष्ट्रिय कानुन तथा संयुक्त राष्ट्रसंघीय कर्मचारीहरूको सुरक्षासम्बन्धी सिद्धान्तको गम्भीर उल्लङ्घन भएको उल्लेख गरिएको छ।
यसैबीच हिज्बुल्लाहले इजरायली लक्ष्यहरूमा प्रतिशोधात्मक कारबाही गरेको दाबी गरेको छ। समूहले वाडी हुनिन क्षेत्रमा इजरायली सैनिक र सवारी साधनहरूलाई रकेट आक्रमण गरेको तथा दक्षिण लेबनानको ब्लाट सैन्य स्थललाई लक्षित गरी हमला गरेको जनाएको छ।
समूहले इजरायलको सफेद सहरको पूर्वतर्फ रहेको गिभा ड्रोन नियन्त्रण केन्द्रलाई लक्ष्य बनाएको र मेटुला बस्तीमा तेस्रोपटक इजरायली सैनिकहरूको जमघटमा रकेट प्रहार गरेको पनि जनाएको छ।
शुक्रबार राति ढिलो इजरायलले बेइरुतको दक्षिणी उपनगरमा नयाँ हवाई आक्रमण सुरु गरेको छ, जुन हिज्बुल्लाहको गढ मानिन्छ। यसले सीमा पार जारी द्वन्द्वलाई अझै चर्काएको छ।
हिज्बुल्लाहले गत नोभेम्बर २७, २०२४ मा लागू भएको युद्धविरामपछि पहिलोपटक मार्च २ मा इजरायलतर्फ रकेट प्रहार गरेको घोषणा गरेको थियो। त्यसपछि इजरायलले समूहविरुद्ध आक्रमण अभियान सुरु गर्दै दक्षिण तथा पूर्वी लेबनानका विभिन्न क्षेत्रमा र बेइरुतको दक्षिणी उपनगरमा लगातार हवाई आक्रमण गर्दै आएको छ।
