बुटवल: राष्ट्रिय स्वतन्त्र पार्टीका सभापति रवि लामिछानेविरुद्धको थुनछेक मुद्दामा बिहीबार सरकारी वकिलको बहस सम्पन्न भएको छ। तर, लामिछानेका वकिलहरूको बहस भने सुरु भएको छैन।
आजको बहसमा सरकारी वकिलहरू र जाहेरवालाका तर्फबाट वरिष्ठ अधिवक्ता दिनेश त्रिपाठीले तर्क प्रस्तुत गरेका थिए। रुपन्देही जिल्ला अदालतका स्वास्तेदार गोविन्द ज्ञवालीका अनुसार, पीडित पक्षका दुई वकिलको बहस अझै बाँकी छ।
सरकारी पक्षबाट जिल्ला सरकारी वकिल प्रमुख प्रेमराज पौडेल, गोकर्ण घिमिरे, पवित्रा भण्डारी, वसन्त पोखरेल र सुनिल लामिछानेले बहस गरेका छन्। उच्च सरकारी वकिल कार्यालय बुटवलका सोमकान्त भण्डारी, प्रकाश मरासिनी र रवि न्यौपानेले पनि न्यायाधीश प्रह्लादकुमार योगीको इजलासमा तर्क राखेका थिए।
सुप्रिम बचत तथा ऋण सहकारी संस्थामा भएको ८६ करोड १८ लाख रुपैयाँभन्दा बढीको हिनामिनासम्बन्धी मुद्दामा लामिछानेविरुद्ध उजुरी परेको हो। सहकारीका १,८३१ बचतकर्ताको रकम दुरुपयोग गरेको आरोपमा २८ जनाविरुद्ध मुद्दा दायर भएको छ। रविलाई भने पछि दायर गरिएको पुरक उजुरीमा समावेश गरिएको हो।
प्रहरीले १४ करोड २९ लाख रुपैयाँभन्दा बढी रकम सुप्रिम सहकारीबाट गोर्खा मिडिया नेटवर्क प्रालिमा र २ करोड रुपैयाँ लामिछानेको नाममा ऋण गएकाले उनीमाथि कारबाही अघि बढाएको छ।
लामिछाने यसअघि कास्कीमा ६५ लाख र काठमाडौंमा ६० लाख धरौटी बुझाएर छुटेका थिए। बुटवलपछि उनलाई चितवन र पर्सा जिल्ला अदालतमा पनि बयान दिनुपर्ने छ। ती जिल्लाबाट पक्राउ पुर्जी जारी भइसकेपछि उनले सरकारी वकिलसमक्ष बयान दिइसकेका छन्।
हालका लागि रविलाई परिवारको जिम्मा लगाइएको छ।मुद्दाको थप सुनुवाइ शुक्रबार हुने अपेक्षा गरिएको छ।
