तनहुँ — तनहुँको आँबुखैरेनी गाउँपालिकास्थित पर्यटकीय स्थल ऐनापहरामा स्काइ वाक निर्माणको काम अन्तिम चरणमा पुगेको छ। गत जेठ दोस्रो सातादेखि सुरु गरिएको यो परियोजना रु १५ लाख लगानीमा सम्पन्न हुँदैछ र चाँडै व्यावसायिक सञ्चालनमा ल्याउने तयारी गरिएको छ।
कूल ५० मिटर अग्लो र ५७ मिटर लामो स्काइ वाकमा प्रत्येक पाइला बीचमा एक फिट खाली स्थान राखिएको छ जसले घुम्न आउनेहरूलाई हरियाली, खुला आकाश र शान्त पहराको बीचमा साहसिक अनुभव प्रदान गर्नेछ। गाउँपालिकाका अध्यक्ष शुक्र चुमानले यसको सुरक्षा र गुणस्तर सुनिश्चित गरिएको बताए।
ऐनापहरा पछिल्लो समय पर्यटक आकर्षणको केन्द्र बनेको छ। शनिबार सार्वजनिक बिदा हुने दिनमा यहाँ एक हजारभन्दा बढी पर्यटक आउने गरेको आँबुखैरेनी–२ का वडाध्यक्ष आशबहादुर गुरुङले जानकारी दिए। यो स्थानमा ढुङ्गामा कोरिएका कलात्मक आकृतिहरू पर्यटकको रुचिको केन्द्र बनेका छन्।
गाउँपालिकाले ऐनापहराबाट रु ६० लाखभन्दा बढी आम्दानी गरिसकेको छ। पर्यटन क्षेत्र विकासका लागि झरना, उद्यान तथा विभिन्न संरचना निर्माणको विस्तृत योजना समेत तयार पारिएको छ। आगामी योजना अनुसार बुद्ध मूर्ति, रेलिङ र पार्किङलगायत थप संरचना निर्माण गर्ने प्रस्ताव छ। यसका लागि रु १० करोड बजेट आवश्यक रहेको जनाएको छ।
