लन्डन: गत २ फेब्रुअरीदेखि सम्पर्कविहीन रहेका २३ वर्षीय नेपाली विद्यार्थी कमल अधिकारी डेढ महिना पछि लन्डनस्थित नेपाली दूतावाससँग सम्पर्कमा आएका छन्। उनी सकुशल फेला परेको जानकारी लन्डनस्थित नेपाली दूतावासका उपनियोग प्रमुख विपिन दुवाडीले दिएका छन्।
उहाँले भने, “इस्ट लन्डनस्थित एक होमलेस सेल्टरमा आश्रय लिइरहेका कमलसँग सम्पर्क भएको छ। उहाँ सम्पर्कमा आउनुभएकोले नेपाल स्थित उहाँको परिवारलाई खबर गरेका छौँ र उहाँको परिवारको अनुरोधमा नेपाल फर्काउने तयारी सुरु भइसकेको छ।”
दूतावाससँग कमलले पनि नेपाल फर्कने इच्छा व्यक्त गरेको दुवाडीको भनाइ छ। उहाँको शारीरिक र मानसिक स्वास्थ्य राम्रो रहेको र उहाँको पासपोर्ट बेलायतको होमअफिसमा रहेको दूतावासले जनाएको छ।
लन्डनको ‘युनिभर्सिटी अफ क्रियटिभ आर्टस’मा अध्ययनरत कमललाई घरबेटीले निकालेपछि सडकमा बस्नुपरेको थियो। त्यसपछि उहाँ लन्डनबाट सम्पर्कविहीन हुनु भएपछि उहाँको परिवारले परराष्ट्र मन्त्रालयमा निवेदन दिएर खोजी गरिदिन अनुरोध गरेको थियो।
कमलको हराइरहेको सूचना पाएपछि लन्डनस्थित नेपाली दूतावासले लन्डन मेट्रोपोलिटन प्रहरीलाई खबर गरी खोजीका लागि अनुरोध गरेको थियो। धनुषा जिल्लाको हंसपुर-६ का अधिकारी सन् २०२२ मा अध्ययनका लागि बेलायत आएका थिए।
