काठमाडौँ । नेपाल प्रहरीको केन्द्रीय अनुसन्धान ब्यूरो (CIB)ले निर्माण व्यवसायी ऋषिकेश गौलीलाई पक्राउ गरेको छ।
सार्वजनिक खरिद अनुगमन कार्यालयको डाटा प्रणालीमा अनाधिकृत पहुँच बनाई ठेक्काको आर्थिक प्रस्ताव खोल्नु अघि नै त्यससम्बन्धी कागजात परिवर्तन गरेको उजुरीका आधारमा उनलाई नियन्त्रणमा लिइएको ब्यूरोले जनाएको छ।
गौली आशिष निर्माण सेवा प्रालिका सञ्चालक हुन्। उनलाई बुधबार काठमाडौँको पुरानो बानेश्वरबाट पक्राउ गरिएको प्रहरीको भनाइ छ।
ब्यूरोका प्रवक्ता शिवकुमार श्रेष्ठका अनुसार गौलीमाथि संगठित अपराध नियन्त्रण ऐन अन्तर्गत मुद्दा चलाएर थप अनुसन्धान भइरहेको छ।
उक्त प्रकरणमा हालसम्म १० निर्माण व्यवसायीसहित कुल १३ जना शंकास्पद व्यक्तिलाई पक्राउ गरी अनुसन्धान जारी रहेको ब्यूरोले जनाएको छ।
