कास्की । अखिल नेपाल ट्रेड युनियन महासङ्घ गण्डकीले लामो समयदेखि उपभोग गर्दै आएको भवनसहित करिब चार रोपनी जग्गा पोखरा उपत्यका नगर विकास समितिलाई फिर्ता गरेको छ।
पोखरा उपत्यका नगर विकास समितिको स्वामित्वमा पृथ्वीचोकमा रहेको सार्वजनिक जग्गामा महासङ्घले स्वीकृति लिएर पक्की संरचना निर्माण गरेको थियो। सोही जग्गा तथा संरचना महासङ्घले आज औपचारिक रूपमा फिर्ता गरेको हो।
पोखरा महानगरपालिका र उपत्यका नगर विकास समितिले सार्वजनिक जग्गामा स्वीकृति लिएर वा नलिईकन निर्माण गरिएका संरचना खाली गर्न ३५ दिने सूचना जारी गरेका थिए। सो सूचनाको म्याद सकिनु एक दिनअघि महासङ्घले आफूले निर्माण गरेका संरचनाको चाबी बुझाएको हो।
महासङ्घले २०६७ सालमा करिब १ करोड ५३ लाख रुपैयाँ लागतमा निर्माण गरेको १३ कोठे भवनको चाबी महासङ्घ गण्डकी प्रदेश अध्यक्ष रुद्र गौतमले पोखरा उपत्यका नगर विकास समितिका अध्यक्षसमेत रहेका पोखरा महानगरपालिकाका प्रमुख धनराज आचार्यलाई हस्तान्तरण गरेका थिए।
चाबी बुझ्दै महानगर प्रमुख आचार्यले सार्वजनिक तथा सरकारी स्वामित्वका जग्गा संरक्षण अभियानमा यो कदमलाई सकारात्मक सुरुआतका रूपमा लिएको बताए। उनले महानगर सार्वजनिक सम्पत्तिको संरक्षणमा प्रतिबद्ध रहेको उल्लेख गर्दै अन्य संरचना पनि क्रमशः खाली गराइने जानकारी दिए।
पोखरा उपत्यका नगर विकास समितिको स्वामित्वमा रहेको पृथ्वीचोक क्षेत्रको जग्गामा विभिन्न सङ्घसंस्था र व्यक्तिहरूले भोगचलन गर्दै आएको पाइन्छ। महानगरपालिकाले सो क्षेत्रलाई व्यवस्थित बसपार्क निर्माणका लागि अघि बढाउने तयारी गरेको जनाएको छ।
यसैबीच, महानगरले बसपार्क क्षेत्रमा बसोबास गरिरहेका भूमिहीन तथा सुकुमवासीहरूको विवरण सङ्कलन कार्य पनि अघि बढाएको छ। हालसम्म ५७५ जनाले नाम दर्ता गराएको महानगरले जनाएको छ।
