काठमाडौँ । अमेरिकी राष्ट्रपति डोनाल्ड ट्रम्प ले इरानविरुद्ध जारी सैन्य कारबाही सफलताको नजिक पुगेको दाबी गरेका छन्। बिहीबार बिहान ह्वाइट हाउसबाट राष्ट्रका नाममा सम्बोधन गर्दै उनले अमेरिकी सैन्य उद्देश्यहरू पूरा हुने क्रममा रहेको र छिट्टै अभियान सम्पन्न हुने बताएका हुन्।
सम्बोधनका क्रममा ट्रम्पले एक महिनाअघि सुरु भएको युद्धले इरानको सैन्य संरचनामा गम्भीर क्षति पुगेको दाबी गरे। उनका अनुसार इरानी नौसेना निष्क्रिय भएको, वायुसेना कमजोर बनेको र शीर्ष नेतृत्वमा ठूलो क्षति पुगेको छ। साथै, इरानको क्षेप्यास्त्र र मानवरहित उड्ने यन्त्र (ड्रोन) क्षमतामा उल्लेखनीय कमी आएको उनको भनाइ थियो।
ट्रम्पले सन् २०२५ असारमा सञ्चालन गरिएको ‘मध्यरात प्रहार अभियान’ अन्तर्गत इरानका प्रमुख आणविक केन्द्रहरू पूर्ण रूपमा ध्वस्त पारिएको दाबी गरे। उनले इरान आणविक हतियार निर्माणको नजिक पुगेको उल्लेख गर्दै पूर्व राष्ट्रपति बराक ओबामा को कार्यकालमा भएको आणविक सम्झौतालाई “ठूलो गल्ती” भने।
क्षेत्रीय सुरक्षाका विषयमा उनले इजरायल र खाडी मुलुकहरूलाई अमेरिकाले सधैं साथ दिने प्रतिबद्धता व्यक्त गरे। साथै, हर्मुज जलसन्धिको सुरक्षामा सहयोगी राष्ट्रहरूले थप सक्रिय भूमिका खेल्नुपर्नेमा जोड दिए।
घरेलु सन्दर्भमा ट्रम्पले बढ्दो इन्धन मूल्यका लागि इरानलाई जिम्मेवार ठहर्याए। उनले भेनेजुएलाको उदाहरण दिँदै त्यहाँ निकोलस मादुरो विरुद्धको सैन्य हस्तक्षेप सफल भएको दाबी गर्दै अहिले अमेरिका–भेनेजुएला सम्बन्ध व्यापारिक साझेदारीतर्फ अघि बढिरहेको बताएका छन्।
