काठमाडौँ, २१ जेठ: सभामुख देवराज घिमिरेले जातीय विभेद र छुवाछूत अन्त्यका लागि सामाजिक सद्भाव, समता र सहअस्तित्वको भावना मजबुत बनाउन सबै पक्षको एकता अपरिहार्य रहेको उल्लेख गर्नुभएको छ।
जातीय भेदभाव तथा छुवाछूत उन्मूलन राष्ट्रिय दिवस–२०८२ को अवसरमा शुभकामना सन्देश जारी गर्दै उहाँले यस्तो विभेद कुनै वर्ग विशेषको मात्र समस्या नभई समग्र समाज, राष्ट्र र मानव सभ्यताको साझा चुनौती भएको बताउनुभयो।
“समतामूलक र समावेशी राष्ट्र निर्माणका लागि सबै नागरिक, सरकार, राजनीतिक दल, नागरिक समाज, सञ्चारमाध्यम, शैक्षिक संस्था तथा सरोकारवाला पक्षहरूले आ–आफ्नो क्षेत्रबाट समानताको पक्षमा दृढ आवाज उठाउनु आजको आवश्यकता हो,” उहाँले भन्नुभयो।
विसं २०६३ जेठ २१ गते नेपाल सरकारले मुलुकलाई ‘जातीय छुवाछूत मुक्त राष्ट्र’ घोषणा गरेको ऐतिहासिक दिनको सम्झनामा हरेक वर्ष यो दिन राष्ट्रिय दिवसका रूपमा मनाइँदै आएको छ।
सभामुख घिमिरेले नेपालको संविधानले बहुजातीय, बहुभाषिक, बहुधार्मिक र बहुसांस्कृतिक चरित्रलाई आत्मसात गर्दै सामाजिक न्याय, समावेशी लोकतन्त्र र समतामूलक समाज निर्माणको आधार तय गरे पनि व्यवहारमा अझै छुवाछूत, विभेद, बहिष्कार, हिंसा र अन्यायका रूपहरू उन्मूलन हुन बाँकी रहेको उल्लेख गर्नुभयो।
उहाँले राष्ट्रिय दिवसले हामी सबैलाई आत्मसमीक्षा, सामाजिक उत्तरदायित्व र संवेदनशीलताको बोध गराउने प्रेरणा बनोस् भन्ने कामना व्यक्त गर्नुभएको छ।
