महोत्तरी: नेकपा (एमाले) का महासचिव शङ्कर पोखरेलले एमालेले जनहितमा निरन्तर काम गर्दै आएको र आगामी दिनमा पनि यस प्रतिबद्धता कायम राख्ने बताउनुभएको छ। महोत्तरीको रामगोपालपुरमा आयोजित जनसभामा बोल्दै उहाँले पछिल्लो एक दशकमा मधेशको विकासमा एमालेले योजनाबद्ध ढंगले ठूला उपलब्धिहरू हासिल गरेको उल्लेख गर्नुभयो।
उहाँले मधेशमा विकासका ठूला आयोजनाहरू अघि बढाएको स्मरण गर्दै स्थानीय जनताले एमालेको कामको सही मूल्याङ्कन गर्दै पार्टीलाई मतदान गरेको बताउनुभयो। महासचिव पोखरेलले भने, “मधेशमा वर्षौँदेखि थाती रहेका हुलाकी सडकका परियोजनाहरू एमाले नेतृत्वको सरकारले तीव्रता दिएको छ। अहिले ती आयोजना सम्पन्नताका चरणमा छन्, जसले यहाँका जनताको जीवनस्तर सुधार्न सहयोग पुर्याइरहेको छ।”
महासचिव पोखरेलका अनुसार एमाले नेतृत्वको सरकारले मधेशमा पुराना समस्याहरू समाधान गर्दै कैयौँ रुग्ण आयोजनाहरू पूरा गरेको छ। उहाँले जलेश्वर नगरको आधुनिक विकास, जलेश्वर–रामगोपालपुर–बर्दिबास सडक स्तरोन्नति, र जयनगर–बर्दिबास रेल्वेको काम एमाले नेतृत्वको कार्यकालमा अघि बढेको उदाहरण दिनुभयो।
उहाँले मधेशमा भएका ठोस कामले जनतामा पार्टीप्रति विश्वास बढाएको बताउँदै आगामी २०८४ को निर्वाचनमा एमालेलाई बहुमत दिन आग्रह गर्नुभयो। “गत आमनिर्वाचनमा महोत्तरीमा जनताले प्रत्यक्ष रूपमा एमालेका एक प्रतिनिधिसभा सदस्य र दुई प्रदेशसभा सदस्यलाई जिताउनुभयो। हालै सम्पन्न स्थानीय तह उपनिर्वाचनमा पनि जनताले एमालेप्रति आफ्नो भरोसा पुनः देखाउनुभएको छ,” पोखरेलले भन्नुभयो।
जनसभामा एमालेका पोलिटब्यूरो सदस्य सुमनराज प्याकुरेल र केन्द्रीय सदस्य तथा मधेश सरकारका भौतिक पूर्वाधारमन्त्री सरोजकुमार यादवले पनि मधेशमा योजनाबद्ध विकासको आवश्यकता र त्यसतर्फ भएका प्रयासहरूबारे प्रकाश पार्नुभयो।
कार्यक्रमको अध्यक्षता नेकपा (एमाले) महोत्तरी जिल्ला अध्यक्ष बलिराम यादवले गर्नुभएको थियो। यस अवसरमा पार्टी प्रवेश गर्ने नयाँ सदस्यहरूलाई महासचिव पोखरेलले स्वागत गर्दै एमालेको विकास यात्रामा सामेल हुन आह्वान गर्नुभयो।
