रौतहट। रौतहटको सदरमुकाम गौरमा दुई समुदायबीच उत्पन्न विवादपछि लगाइएको कफ्र्यू आदेश आइतबार बिहान दुई घण्टाका लागि खुकुलो पारिएको छ। जिल्ला सुरक्षा समितिको बैठकले सुरक्षा अवस्थाको मूल्याङ्कन गर्दै स्थानीय बासिन्दालाई दैनिक उपभोग्य सामग्री खरिद तथा अत्यावश्यक कामका लागि सहुलियत दिने निर्णय गरेको हो।
जिल्ला प्रशासन कार्यालय रौतहटका अनुसार प्रमुख जिल्ला अधिकारी दिनेश सागर भुसालले जारी गरेको सूचनामा आइतबार बिहान ६:३० बजेदेखि ८:३० बजेसम्म कफ्र्यू खुकुलो पारिएको उल्लेख छ। तर, बिहान ८:३० बजेपछि अर्को आदेश जारी नभएसम्मका लागि कफ्र्यू यथावत् रहने स्पष्ट पारिएको छ।
स्थानीय प्रशासन ऐन, २०२८ को दफा ६ (क) बमोजिम जारी आदेश उल्लंघन गरेमा कडा कानुनी कारबाही गरिने चेतावनी दिइएको छ। बिहान ८:३० बजेपछि घरबाहिर निस्कन, हिँडडुल गर्न तथा सवारी साधन सञ्चालन गर्न पूर्ण प्रतिबन्ध लगाइएको प्रशासनले जनाएको छ। साथै, कफ्र्यू प्रभावित क्षेत्रमा कुनै पनि प्रकारका सभा, जुलुस, घेराउ वा प्रदर्शन गर्न निषेध गरिएको छ।
यद्यपि, एम्बुलेन्स, दमकल तथा सुरक्षाकर्मीका सवारी साधनजस्ता अत्यावश्यक सेवाहरूलाई भने कफ्र्यूको समयमा पनि सञ्चालनमा अवरोध नहुने जनाइएको छ।
प्रशासनका अनुसार कफ्र्यू आदेश पूर्वमा मुडबलवा गेट, पश्चिममा लालबकैया बाँध, उत्तरमा बम नहर र दक्षिणमा गौर भन्सार कार्यालयसम्म लागू गरिएको छ।
गौरको सवगढा क्षेत्रमा दुई पक्षबीच भएको झडपपछि अवस्था तनावपूर्ण बनेकाले शान्ति–सुरक्षा कायम गर्न प्रशासनले शुक्रबारदेखि नै कडा सुरक्षा व्यवस्था लागू गरेको हो। प्रशासनले सबै नागरिकलाई संयमित रहन र सरकारी निर्देशनको पूर्ण पालना गर्न अपिल गरेको छ।
