काठमाडौं– प्रतिष्ठित संगीतकार, गायक तथा लेखक प्राज्ञ शान्तिराम राईको एकल सांगीतिक साँझ आगामी मंसिर १३ गते काठमाडौंमा हुने भएको छ । खोटाङ कलाकार समाजको आयोजनामा पहिलो पटक “श्रष्टा सम्मान” कार्यक्रमअन्तर्गत यो विशेष साँझ आयोजना गर्न लागिएको हो । समाजका अध्यक्ष रुपकुमार राईले यसलाई खोटाङका अग्रज कलाकारलाई सम्मान गर्ने उद्देश्यले सुरु गरिएको वार्षिक कार्यक्रमको पहिलो श्रृंखला भएको बताए ।
पत्रकार सम्मेलनमा बोल्दै प्राज्ञ शान्तिराम राईले आफ्नो जीवन संगीतमै समर्पित भएको उल्लेख गर्दै आयोजक संस्था र सहयोगीप्रति आभार व्यक्त गरे । उनले भने, “यो मेरो मात्र शो होइन, सबै खोटाङ्गेको शो हो । यदि यो डुब्यो भने सबै खोटाङ्गेको शिर झुक्छ ।” कार्यक्रममा दिक्तेल रुपाकोट मझुवागढि नगरपालिकाका मेयर तिर्थराज भट्टराई, सांसद बिशाल भट्टराई, नेता विष्णु राई र व्यवसायी टंक श्रेष्ठलगायतले शुभकामना मन्तव्य दिएका थिए ।
राईले २०४६ सालमा रेडियो नेपालको स्वर परीक्षा पास गर्दै औपचारिक रूपमा संगीत क्षेत्रमा प्रवेश गरेका थिए । निरन्तर ३६ वर्षदेखि नेपाली संगीत सिर्जनामा सक्रिय उनले हालसम्म १५ सयभन्दा बढी गीत सिर्जना गरिसकेका छन् । एकल साँझमा ‘तिमी तारे भीर म त लहरा’, ‘धोका दियौ तिमिले’, ‘छालहरु ओ छालहरु’, ‘आईडी कार्डले’, ‘ए पहराकी फूल’लगायत उनका सदावहार गीत प्रस्तुत गरिनेछन् । ती गीतहरू दीप श्रेष्ठ, सुक्मित गुरुङ, पवित्रा सुब्बा, राजेशपायल राई, मेलिना राईसहित पुराना र नयाँ पुस्ताका गायक–गायिकाले प्रस्तुत गर्ने कार्यक्रम छ ।
२०७७ सालमा स्थापना भएको खोटाङ कलाकार समाजले २०७९ मा प्रज्ञा भवन, कमलादीमा “खोटाङ साँगीतिक साँझ” आयोजना गरी १०० गायक–गायिका र १०० नृत्य कलाकारलाई प्रस्तुत गराएको थियो । त्यस्तै २०८० मा जिल्लाका १० वटै पालिकामा गायन तथा नृत्य प्रतियोगिता आयोजना गरी “पालिका प्रतिभा” कार्यक्रम सम्पन्न गरेको थियो ।
यस पटकको कार्यक्रममा समाजले नयाँ गीत ‘मुस्कुराउछ सधैँ भरी मेरो खोटाङ’ पनि सार्वजनिक गरेको छ । टंक भट्टराईको शब्द, वरिष्ठ संगीतकार महेश खड्काको संगीत र देबेश राईको एरेन्जमा तयार गीतमा १११ जना कलाकारको स्वर समावेश छ । लिम्दुमी क्रिएशन स्टुडियोमा रेकर्ड भएको गीतलाई निर्देशक राजेश पुमा राईले म्युजिक भिडियोको रूपमा प्रस्तुत गरेका छन् । यस गीतलाई दिक्तेल रुपाकोट मझुवागढि नगरपालिका, खोटेहाङ गाउँपालिका र ऐशलुखर्क गाउँपालिकाले आर्थिक सहयोग गरेका छन् ।
