काठमाडौँ । नेपाल राष्ट्र बैंकका नवनियुक्त डेपुटी गभर्नर किरण पण्डितले मंगलबार पद तथा गोपनीयताको शपथ ग्रहण गरी आफ्नो कार्यभार सम्हालेका छन्।
गभर्नर प्रा.डा. विश्वनाथ पौडेलसमक्ष शपथ लिएलगत्तै पण्डितले आफ्नो कार्यकक्षमा पदबहाली गरेका हुन्। नेपाल सरकारको २०८२ चैत २४ गतेको निर्णयअनुसार उनी डेपुटी गभर्नरमा नियुक्त भएका हुन्।
शपथ ग्रहण समारोहमा गभर्नर पौडेलले पण्डितलाई बधाई दिँदै सफल कार्यकालका लागि शुभकामना व्यक्त गरेका थिए। पण्डितसँग राष्ट्र बैंकमा दुई दशकभन्दा लामो अनुभव रहेको छ। उनले २०६२ माघ २ गते सहायक निर्देशकका रूपमा सेवा सुरु गरेका थिए।
आफ्नो कार्यदक्षताका आधारमा उनी २०६८ मा उपनिर्देशक, २०७४ मा निर्देशक हुँदै २०८१ फागुन १ गते कार्यकारी निर्देशकमा पदोन्नति भएका थिए।
कार्यकारी निर्देशकका रूपमा रहँदा उनले भुक्तानी प्रणाली विभाग र विदेशी विनिमय व्यवस्थापन विभागजस्ता महत्वपूर्ण विभागहरूको नेतृत्व गरेका थिए। साथै, उनले केन्द्रीय प्रवक्ताको जिम्मेवारीसमेत निर्वाह गरिसकेका छन्।
