काठमाडौं: काठमाडौं महानगरपालिका–३२ स्थित तीनकुनेको खुला चौरमा गत चैत १५ गते भएको तोडफोड र आगजनी घटनामा संलग्न एक जना थप व्यक्तिलाई प्रहरीले पक्राउ गरेको छ।
राष्ट्र, राष्ट्रियता, धर्म, संस्कृति र नागरिक बचाउ महाअभियान नेपालद्वारा आयोजित प्रदर्शनका क्रममा हिंसात्मक गतिविधि भएको थियो। सोही घटनाको अनुसन्धान गर्दै जाँदा प्रहरीले धादिङ जिल्ला सिद्दलेक गाउँपालिका–१ निवासी ३४ वर्षीय सन्तोष राजावादी (उर्फ सन्तोष सिलवाल)लाई नियन्त्रणमा लिएको हो।
प्रहरीका अनुसार प्रारम्भिक अनुसन्धानमा उनी निजी तथा सार्वजनिक सम्पत्तिमा तोडफोड र आगजनीजस्ता आपराधिक गतिविधिमा संलग्न रहेको देखिएको छ।
पक्राउपछि उनलाई काठमाडौं जिल्ला अदालतबाट चार दिनको म्याद थप गरी अनुसन्धान अघि बढाइएको छ। घटनामा संलग्न अन्य व्यक्तिहरुको पनि खोजी भइरहेको प्रहरीको भनाइ छ।
प्रहरीले सार्वजनिक शान्ति–सुरक्षा भंग गर्ने र सार्वजनिक सम्पत्तिमा क्षति पुर्याउने कार्यमा संलग्न कसैलाई पनि उन्मुक्ति नदिइने स्पष्ट पारेको छ।
