सुर्खेत । प्रतिनिधिसभा निर्वाचनमा कर्णाली प्रदेशका अधिकांश उम्मेदवारले धरौटी जोगाउन सकेनन्। कर्णालीका १२ वटा निर्वाचन क्षेत्रमा विभिन्न दल तथा स्वतन्त्र गरी कुल १३८ जना उम्मेदवार चुनावी मैदानमा रहेकामा ४८ जनाले मात्र धरौटी फिर्ता गर्न सफल भएका छन् भने ९० जनाको धरौटी जफत भएको छ।
सबैभन्दा धेरै मतदाता रहेको सुर्खेतका दुई निर्वाचन क्षेत्रमा ३० जना उम्मेदवार प्रतिस्पर्धामा थिए। तीमध्ये २४ जनाको धरौटी जफत भएको र ६ जनाले मात्र धरौटी जोगाएको प्रदेश निर्वाचन कार्यालय सुर्खेतका प्रमुख लालबहादुर गुरुङले जानकारी दिए।
दैलेखका दुई निर्वाचन क्षेत्रमा कुल २१ जना उम्मेदवार रहेका थिए। दैलेख क्षेत्र नम्बर १ मा एक स्वतन्त्रसहित १० जना र क्षेत्र नम्बर २ मा दुई स्वतन्त्रसहित ११ जना उम्मेदवार थिए। दुवै क्षेत्रमा ४–४ जनाले मात्र धरौटी जोगाएका छन्।
जुम्लामा एक स्वतन्त्रसहित १० जना उम्मेदवारमध्ये ४ जनाले धरौटी जोगाएका छन् भने ११ जना उम्मेदवार रहेको जाजरकोटमा ३ जना मात्रै सफल भएका छन्।
त्यस्तै १६ जना उम्मेदवार रहेको सल्यानमा ६ जना, १२ जना उम्मेदवार रहेको रुकुम पश्चिममा ३ जना र ८ जना उम्मेदवार रहेको हुम्लामा ४ जनाले मात्र धरौटी जोगाएका छन्।
यसैगरी कालिकोटमा ४ जना र डोल्पामा ३ जनाले धरौटी जोगाएको निर्वाचन कार्यालयले जनाएको छ।
निर्वाचन कार्यालयका अनुसार कर्णाली प्रदेशका ३६ जना उम्मेदवारले १०० मतसमेत कटाउन नसकेको तथ्य पनि सार्वजनिक भएको छ।
