काठमाडौँ: एसियाली राजनीतिक दलहरूको अन्तर्राष्ट्रिय सम्मेलन (आईक्याप)को १२औँ साधारण सभामा भाग लिन कम्बोडिया पुगेका जनमत पार्टीका अध्यक्ष डा. सीके राउतले नेपालको प्रधानमन्त्रीसँग भेट्न कठिन भएको गुनासो गरेका छन्।
शनिबार, कम्बोडियाका प्रधानमन्त्री हुन सेनसँग भेटपछि अध्यक्ष राउतले आफ्नो सामाजिक सञ्जाल एक्स (पूर्व ट्विटर) मा लेखे, “कम्बोडियाका प्रधानमन्त्री सामदेक टेचोसँग भेटवार्ता, बरू नेपालकै प्रधानमन्त्री भेट्न साह्रै गाह्रो।”
प्रधानमन्त्री केपी शर्मा ओली नेतृत्वको सत्ता गठबन्धनमा जनमत पार्टी पनि सहभागी छ। यो पार्टीले संघ सरकारलाई समर्थन जनाउनुका साथै मधेस प्रदेश सरकारको नेतृत्व गरिरहेको छ। तर अध्यक्ष राउतले देशकै प्रधानमन्त्रीलाई भेट्न गाह्रो भएको गुनासो सार्वजनिक रूपमा व्यक्त गर्नु, त्यो पनि कम्बोडियामा, व्यापक चर्चा र आलोचनाको विषय बनेको छ।
यसअघि पनि अध्यक्ष राउतले माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्री हुँदा यस्तै गुनासो गरेका थिए। उनले सञ्चारमाध्यममार्फत प्रधानमन्त्रीसँग भेट्न नपाएको भन्दै असन्तोष व्यक्त गरेका थिए।
हालै, राष्ट्रिय स्वतन्त्र पार्टी (रास्वपा)का सभापति रवि लामिछानेलाई पक्राउ गरेको विषयमा राउतले ओली नेतृत्वको सरकारको आलोचना गरेका थिए। यस घटनापछि प्रधानमन्त्री ओलीले राउतलाई बोलाएर स्पष्टीकरण मागेका थिए, जसले गठबन्धनभित्रको सम्बन्धलाई थप जटिल बनाएको थियो।
अध्यक्ष राउतको यस प्रकारको सार्वजनिक टिप्पणीले सत्ता गठबन्धनभित्रको अन्तरद्वन्द्वलाई झल्काएको विश्लेषण गरिएको छ।
