काठमाडौं: इरानका विदेशमन्त्री अब्बास अरघचीले बिहीबार पाकिस्तानका विदेशमन्त्री इशाक दारसँग टेलिफोनमार्फत कुराकानी गर्नुभएको छ।
इरानको विदेश मन्त्रालयका अनुसार, यस संवादमा अब्बास अरघचीले पाकिस्तानको इरानप्रति देखाएको ऐक्यबद्धताको प्रशंसा गर्नुभएको छ। साथै, उहाँले इजरायली आक्रमणबाट भएको क्षतिको विषयमा इशाक दारलाई विस्तृत जानकारी दिनुभएको थियो जसमा इरानी सरकारी संरचना, आणविक सुविधा, आवास, अस्पताल र आइआरआइबी (इरानको आधिकारिक प्रसारण संस्था) मा भएका आक्रमणहरू समेटिएका थिए।
इरानी विदेशमन्त्रीले इशाक दारलाई भन्नुभएको छ, “इजरायलको युद्धप्रवृत्ति र विस्तारवादी नीति यस क्षेत्रको असुरक्षाको मुख्य कारण हो। अन्तर्राष्ट्रिय समुदायले इरानमाथि इजरायली शासनद्वारा गरिएका आक्रमणहरूलाई सर्वसम्मतिले निन्दा गर्नुपर्छ।”
पाकिस्तानका उपप्रधानमन्त्री तथा विदेशमन्त्री इशाक दारले पनि इजरायलको सैन्य आक्रमणको कडा निन्दा गर्दै पाकिस्तान सरकार र जनताको पूर्ण समर्थन दोहोर्याउनु भएको छ।
इरानको विदेश मन्त्रालयका अनुसार दुबै मन्त्रीहरूले इजरायलको ‘आक्रामकता’ विरुद्ध आपसी सहकार्य र सहयोगलाई अझ सुदृढ पार्ने विषयमा छलफल गरेका छन्।
