काठमाडौं । नेपाल प्रहरीको केन्द्रीय अनुसन्धान ब्युरो (सीआईबी) ले लैनचौरस्थित दुग्ध विकास संस्थान (डीडीसी) को केन्द्रीय कार्यालयमा आकस्मिक छापा मारेको छ।
डीडीसीभित्र आर्थिक अनियमितता र वित्तीय कैफियत भएको विशेष सूचनाका आधारमा सीआईबीको टोलीले बुधबार बिहान कार्यालयमा पुगेर अनुसन्धान थालेको हो।
सीआईबी प्रमुख एवं प्रहरी अतिरिक्त महानिरीक्षक मनोज केसी ले डीडीसीसँग सम्बन्धित केही गम्भीर र संवेदनशील सूचना प्राप्त भएपछि अनुसन्धान प्रक्रिया अघि बढाइएको पुष्टि गरेका छन्। उनले अनुसन्धान प्रारम्भिक चरणमै रहेकाले विस्तृत विवरण सार्वजनिक गर्न नमिल्ने बताएका छन्।
प्रहरी स्रोतका अनुसार सीआईबीले छापामार कारबाहीका क्रममा डीडीसीको आर्थिक कारोबार, खरिद प्रक्रिया तथा प्रशासनिक निर्णयसँग सम्बन्धित महत्वपूर्ण कागजात नियन्त्रणमा लिएको छ।
डीडीसीभित्र लामो समयदेखि आन्तरिक विवाद, गुटबन्दी र वित्तीय पारदर्शितामाथि प्रश्न उठ्दै आएको थियो। ती गुनासोका आधारमा सीआईबीले विस्तृत अध्ययन सुरु गरेको बताइएको छ।
प्रहरीका अनुसार नियन्त्रणमा लिइएका कागजातहरूको अध्ययनपछि मात्रै सम्भावित वित्तीय अनियमितताको वास्तविक अवस्था र त्यसमा संलग्न व्यक्तिहरूको पहिचान हुने छ।
