काठमाडौं: सङ्घीय संसद्का दुवै सदनको बैठक आज बस्ने तयारी भएको छ। प्रतिनिधिसभाको बैठक बिहान ११ बजे, जबकि राष्ट्रियसभाको बैठक दिउँसो १:१५ बजे तय गरिएको छ।
प्रतिनिधिसभा बैठकमा सभामुख देवराज घिमिरेले राष्ट्रपतिको कार्यालयबाट प्राप्त विधेयक प्रमाणीकरणसम्बन्धी पत्र पढेर सुनाउने कार्यसूची रहेको छ। साथै, राष्ट्रियसभाबाट पारित भई प्रतिनिधिसभामा आएको तिलगंगा नेत्र विश्वविद्यालय विधेयक, २०८१ टेबुल गर्ने कार्यसूची पनि बैठकमा समावेश छ।
गृहमन्त्री रमेश लेखकले सशस्त्र प्रहरी बल, नेपाल विधेयक, २०८१ लाई दफावार छलफलका लागि समितिमा पठाउने प्रस्ताव प्रस्तुत गर्नेछन्।
यस्तै, बैठकमा ‘नेपाल नागरिकता (दोस्रो संशोधन) विधेयक, २०८१’ माथि दफावार छलफलको प्रस्ताव पेस गरिनेछ, साथै उक्त विधेयकमाथि प्राप्त संशोधनहरू निर्णयार्थ प्रस्तुत गरिनेछ। गृहमन्त्री लेखकले नागरिकता विधेयक पारित गर्न प्रस्ताव पेश गर्ने कार्यक्रम रहेको संसद् सचिवालयले जनाएको छ।
