काठमाडौँ । अमेरिकी राष्ट्रपति डोनाल्ड ट्रम्पका दक्षिण तथा मध्य एसियाका विशेष दूत सर्जियो गोर आज तीन दिने नेपाल भ्रमणका लागि काठमाडौँ आउँदै छन्। दक्षिण तथा मध्य एसियाली मामिला हेर्ने अमेरिकी सहायक विदेशमन्त्री एस पावल कपुरले केही दिनअघि नेपाल भ्रमण सम्पन्न गरेपछि गोरको भ्रमण हुन लागेको हो।
भारतका लागि अमेरिकी राजदूतसमेत रहेका गोरले नेपालमा प्रधानमन्त्री बालेन शाहसँग भेट गर्ने योजना बनाएका छन्। तर हालसम्म उक्त भेट सुनिश्चित भएको छैन। प्रधानमन्त्रीको सचिवालय स्रोतका अनुसार गोरसँग भेटघाटको कुनै औपचारिक कार्यतालिका तय भएको छैन, यद्यपि भेटका लागि प्रयास जारी रहेको बुझिएको छ।
प्रधानमन्त्रीसँग भेट अनिश्चित रहे पनि गोरको अर्थमन्त्री स्वर्णिम वाग्ले र परराष्ट्रमन्त्री शिशिर खनालसँग भेट हुने निश्चित भएको छ। उनको भ्रमण लगानी र आर्थिक सहकार्यमा केन्द्रित रहने बताइएको छ।
यसअघि गोरले बङ्गलादेश, भुटान र श्रीलंकालगायत देशको भ्रमण गरी त्यहाँका उच्च नेतृत्वसँग भेट गरेका थिए।
प्रधानमन्त्री बालेन शाह पदभार ग्रहण गरेयता व्यक्तिगत रूपमा विदेशी प्रतिनिधिसँग भेट नगरेको स्रोतको भनाइ छ। उनले हालसम्म सामूहिक रूपमा मात्र राजदूतहरूसँग भेटघाट गरेका छन् र प्रायः राष्ट्र प्रमुख वा उच्च तहका मन्त्रीसँग मात्र भेट गर्ने मनस्थिति बनाएका छन्।
यता, वैशाख २८ गते भारतका विदेश सचिव विक्रम मिस्री पनि नेपाल भ्रमणमा आउने कार्यक्रम छ। उनले प्रधानमन्त्री बालेन शाहलाई भारत भ्रमणको औपचारिक निमन्त्रणा दिने तयारी गरेका छन्। उक्त निमन्त्रणा प्रत्यक्ष रूपमा प्रधानमन्त्रीलाई दिने वा परराष्ट्र मन्त्रालयमार्फत दिने भन्ने विषय भने अझै तय भएको छैन।
