काठमाडौं: नेपाल क्रिकेट संघ (क्यान)ले नेपाली राष्ट्रिय पुरुष क्रिकेट टिमका मुख्य प्रशिक्षक मोन्टी देसाईसँगको सम्झौता नवीकरण नगर्ने निर्णय गरेको छ।

क्यानले देसाईको सम्झौता अवधि सकिएको र सम्झौता नवीकरण नगर्ने जानकारी दिँदै उनको प्रशिक्षण अवधिमा नेपाली क्रिकेट टिमले हासिल गरेको सफलताका लागि धन्यवाद ज्ञापन गरेको छ।

देसाईको नेतृत्वमा नेपाली क्रिकेटका ऐतिहासिक उपलब्धि

२०७९ माघमा नेपाली पुरुष क्रिकेट टिमको प्रमुख प्रशिक्षकमा नियुक्त भएका देसाईको नेतृत्वमा नेपालले लिग-२ का अन्तिम १२ मध्ये ११ खेल जितेर एक दिवसीय अन्तर्राष्ट्रिय मान्यता जोगाउन सफल भएको थियो।

त्यसैगरी, उनको प्रशिक्षणमा नेपालले पहिलो पटक एसिया कप खेल्ने अवसर पायो भने १० वर्षपछि आईसीसी टी-२० विश्वकपमा समेत सहभागिता जनायो।

क्यानले देसाईको योगदानलाई उच्च कदर गर्दै भविष्यका लागि सफलताको शुभकामना दिएको छ।

काठमाडौं: साउदी अरबको पश्चिमी क्षेत्र जिजान नजिकै भएको भीषण सडक दुर्घटनामा तीन नेपाली कामदारको मृत्यु भएको छ। जेद्दास्थित नेपाली महावाणिज्य दूतावासका अनुसार दुर्घटनामा परेर कृष्ण खत्री, रूपक कार्की, र मानबहादुर रानाले ज्यान गुमाएका छन्।

सोही दुर्घटनामा एक नेपाली घाइते भएका छन्, जसको अस्पतालमा उपचार भइरहेको महावाणिज्य दूतावासका सुवास यादवले जानकारी दिए। मृतकका परिवारलाई घटनाबारे सूचना दिइसकिएको छ। शव स्वदेश पठाउने प्रक्रिया कम्पनीसँग समन्वय गरेर अगाडि बढाइने यादवले बताए।

अन्य विदेशी नागरिक पनि मारिए
साउदी प्रेस एजेन्सीका अनुसार उक्त दुर्घटनामा १५ जनाको ज्यान गएको छ। मृत्यु हुनेमा नौ भारतीय र तीन घानाका नागरिक पनि रहेको भारतीय महावाणिज्य दूतावासले पुष्टि गरेको छ।

दुर्घटनाको विवरण
दक्षिणी बन्दरगाह सहर जिजानमा २६ कामदारलाई कार्यस्थलतर्फ लैजाँदै गरेको बस एक ट्रेलरसँग ठोक्किँदा दुर्घटना भएको हो। ठक्कर यति भीषण थियो कि बस पूर्ण रूपमा क्षतिग्रस्त भएको बताइएको छ।

घटनामा ११ जना घाइते भएका छन् र उनीहरूको स्थानीय अस्पतालमा उपचार भइरहेको छ। प्रारम्भिक अनुसन्धान अनुसार गति सीमा नाघेको कारण दुर्घटना भएको हुन सक्ने अधिकारीहरूले अनुमान गरेका छन्।

नेपाली समुदायलाई दूतावासको आग्रह
दूतावासले साउदीमा रहेका नेपाली समुदायलाई सडक सुरक्षा नियमको पालनामा विशेष ध्यान दिन आग्रह गरेको छ। साथै कुनै आपत्कालीन अवस्थामा दूतावाससँग सम्पर्क गर्न अनुरोध गरिएको छ।

काठमाडौँ: चन्द्रागिरि नगरपालिकाले सार्वजनिक स्थलमा सूर्तिजन्य पदार्थको बिक्री र वितरणमा पूर्णरूपमा प्रतिबन्ध लगाएको छ। शुक्रबार सूचना जारी गर्दै नगरपालिकाले प्लास्टिकको बट्टामा प्याकेजिङ गरिएका खैनी, गुट्खा, पानपरागलगायत मुखमा राख्ने वा रस लिने सूर्तिजन्य पदार्थहरूको बिक्री वितरणमा रोक लगाउने निर्णय गरेको हो।

नगरपालिकाका शाखा अधिकृत दामोदर रिजालद्वारा जारी विज्ञप्तिमा सूर्ति सेवन मानव स्वास्थ्यका लागि अत्यन्त हानिकारक भएको उल्लेख छ। विज्ञप्तिमा भनिएको छ, “शिक्षण संस्था, बालकल्याण गृह, क्लब, सार्वजनिक शौचालय, होटेल, रेष्टुरेन्ट, छात्राबास, ब्यायामशाला, डिपार्टमेन्ट स्टोर, धर्मशाला, सार्वजनिक प्रतिक्षालयलगायतका स्थानमा सूर्तिजन्य पदार्थको सेवन र बिक्री सूर्तिजन्य पदार्थ नियन्त्रण र नियमन ऐन, २०६८ अनुसार निषेध गरिएको छ।”

विज्ञप्तिमा सूर्तिजन्य पदार्थको सेवनले जनस्वास्थ्यमा नकारात्मक असर गर्नुका साथै प्लास्टिक वा बट्टामा प्याकेजिङ गरिएका पदार्थहरूले भूमि प्रदूषण गर्ने, ढल जाम गराउने र शहरको सुन्दरतामा पनि प्रतिकूल असर पर्ने बताइएको छ।

नगरपालिकाले सार्वजनिक स्थानमा धूमपान र प्लास्टिकको बट्टामा प्याकेजिङ गरिएका खैनी, गुट्खा, पानपरागजस्ता पदार्थहरूको बिक्री वितरणलाई यो सूचना प्रकाशित भएको मितिदेखि लागू हुने गरी पूर्ण रूपमा प्रतिबन्ध लगाएको जनाएको छ।

सूचनामा भनिएको छ, “कसैले यो सूचनाको उल्लङ्घन गरी सूर्तिजन्य पदार्थको बिक्री गरेको पाइएमा नगर प्रहरीमार्फत जफत गरिने र सम्बन्धित व्यवसायीलाई कानुनअनुसार अधिकतम सजाय गरिने छ।”

चितवन: चितवन राष्ट्रिय निकुञ्जले आजदेखि आन्तरिक रूपमा गैँडा स्थानान्तरण कार्य सुरु गरेको छ। निकुञ्जको पश्चिमी क्षेत्रमा गैँडाको सङ्ख्या बढी भएपछि त्यहाँबाट चारवटा गैँडालाई पूर्वी क्षेत्रमा स्थानान्तरण गर्न लागिएको हो।

केही वर्षअगाडि नै गैँडा आन्तरिक स्थानान्तरणको अध्ययन भए पनि यो कार्य गत वर्षबाट मात्रै सुरु भएको थियो। गत वर्ष छ वटा गैँडा सफलतापूर्वक स्थानान्तरण गरिएको थियो।

निकुञ्जका प्रमुख संरक्षण अधिकृत डा. गणेश पन्तका अनुसार स्थानान्तरणको लागि आवश्यक सबै तयारी पूरा गरिएको छ। प्राविधिक टोलीले पश्चिम क्षेत्रको अमलटारी सेक्टरबाट स्थानान्तरण प्रक्रिया सुरु गरेको उहाँले जानकारी दिनुभयो। हात्ती, प्राविधिक जनशक्ति, कर्मचारी र सुरक्षार्थ खटिएको सेनाको सहयोगमा स्थानान्तरण कार्य अघि बढाइएको छ।

डा. पन्तले भन्नुभयो, “अहिले दुई भाले र दुई पोथी गैँडा स्थानान्तरण गरिँदैछ।” राष्ट्रिय निकुञ्ज तथा वन्यजन्तु संरक्षण विभागले गठन गरेको अध्ययन टोलीको प्रतिवेदनअनुसार गैँडा स्थानान्तरण थालिएको हो। प्रतिवेदनमा कसराबाट पश्चिम क्षेत्रमा ६० प्रतिशत गैँडा रहेको उल्लेख थियो। स्थानान्तरणले वासस्थान सहज बनाउने अपेक्षा गरिएको छ।

स्थानान्तरणका लागि वयस्क गैँडालाई प्राथमिकता दिइएको छ भने निगरानी प्रक्रिया जारी रहेको उहाँले जानकारी दिनुभयो। स्थानान्तरण कार्य पूरा गर्न दुई साता लाग्ने अनुमान गरिएको छ।

निकुञ्जका सूचना अधिकारी अविनाश थापा मगरका अनुसार स्थानान्तरणपछि पश्चिम र पूर्वी क्षेत्रका गैँडाबीच संसर्ग भई प्रजननमा सहयोग पुग्ने आशा गरिएको छ। पश्चिम क्षेत्रबाट ल्याइएका गैँडालाई खगेन्द्रमल्ली र प्यारीढाप क्षेत्रमा छोडिने तयारी गरिएको छ।

स्थानान्तरणको अनुगमनका लागि विभागका महानिर्देशक डा. रामचन्द्र कँडेलको टोली चितवन आइपुगेको छ।

तीन वर्षअघि उपमहानिर्देशक बेदकुमार ढकालको नेतृत्वमा अध्ययन टोलीले गैँडा स्थानान्तरणको अध्ययन गरेको थियो। पछिल्लो गणनाअनुसार नेपालमा ७५२ वटा गैँडा रहेका छन्। तीमध्ये बर्दियामा ३८, शुक्लाफाँटामा १७, पर्सा राष्ट्रिय निकुञ्जमा ३ तथा चितवन राष्ट्रिय निकुञ्जमा ६९४ वटा गैँडा रहेका छन्।

घोडाघोडी (कैलाली): सुदूरपश्चिम प्रदेशको गौरवको आयोजनाका रूपमा रहेको सेती राजमार्गअन्तर्गत कैलालीको बौनियाँ–टीकापुर खण्ड निर्माण कार्य सुरु भएको छ। बौनियाँ बजारबाट साढे चार किलोमिटर दक्षिणतर्फ आजदेखि ‘कङ्क्रिट वाल’, नाली तथा सडक भरानको काम थालिएको छ।

चालु आर्थिक वर्षको असार मसान्तभित्र सम्पन्न गर्ने लक्ष्यसहित रु ६ करोड १५ लाख लागतमा निर्माण कार्य सुरु गरिएको हो। उक्त योजनामा १,१०० मिटर पक्की नाला, सडकको दुवै छेउमा २,००० मिटर कङ्क्रिट वाल तथा १६ मिटर चौडाइमा साढे चार किलोमिटर सडक भरानको काम हुने बौनियाँ–टीकापुर सडक निर्माण आयोजना कार्यालयले जनाएको छ।

आज आयोजित शुभारम्भ कार्यक्रममा बर्दगोरिया गाउँपालिकाका अध्यक्ष कर्णबहादुर कुँवरले सम्झौता अवधिभित्र काम सम्पन्न गर्न निर्माण कम्पनीलाई आग्रह गर्नुभयो। “सेती राजमार्ग निर्माण लामो समयदेखि ढिलाइ हुँदै आएको छ, यसलाई चाँडो सम्पन्न गर्न निर्माण कम्पनीले गम्भीरता देखाउनुपर्छ। स्थानीय तह आवश्यक समन्वय र सहकार्य गर्न तयार छ,” उहाँले भन्नुभयो।

अध्यक्ष कुँवरले बर्दगोरिया गाउँपालिकाको क्षेत्रमा एउटा पक्की पुल सम्पन्न भइसकेको र अर्को पुल केही महिनाभित्र सम्पन्न हुने जानकारी दिनुभयो। “सेती राजमार्गमा सुविधासम्पन्न सडक बन्नुले सुदूरपश्चिम प्रदेशको समृद्धिको ढोका खुल्नेछ। त्यसैले काम समयमा सम्पन्न गर्न समन्वय गर्न आवश्यक छ,” उहाँले जोड दिनुभयो।

उहाँका अनुसार यही खण्डअन्तर्गत दुर्गौली–प्रतापपुर १० किलोमिटर सडक कालोपत्रे कार्य भइरहेको छ। कैलालीको मोहन्याल गाउँपालिका क्षेत्रमा तीन किलोमिटर मात्र ट्रयाक खोल्न बाँकी रहेको जानकारी दिँदै उक्त ट्रयाक खुलेपछि टीकापुर–खिमडी–ठुलीगाड सिधा यातायात सञ्जालमा जोडिने उहाँले बताउनुभयो।