काठमाडौँ: बिहे जीवनको नयाँ सुरुवात हो, तर कहिलेकाहीँ यो सुरुवात नै अन्त्यको कथा बन्न पुग्छ। भारतको बिहार राज्यमा यस्तै एक दुखद घटना घटेको छ, जसले नयाँ दाम्पत्य जीवनको सपना देखिरहेको जोडीसहित चार जनाको ज्यान लिएको छ।

बिहारको वैशाली जिल्लामा मंगलबार बिहान भएको सवारी दुर्घटनामा नववधूसहित चार जनाको मृत्यु भएको हो। दुर्घटना जंदाहा–समस्तीपुर मुख्य सडकको पनसलवा चोक नजिकै बिहानको समयमा भएको हो।

प्रत्यक्षदर्शीका अनुसार बेहुली लिएर घर फर्किंदै गरेको कार एक ट्रकसँग ठोक्किँदा घटना भएको हो। कारमा सवार सात जनामध्ये चार जनाको घटनास्थलमै मृत्यु भयो भने बाँकी तीन जना गम्भीर घाइते भएका छन्। घाइतेहरूको स्थानीय अस्पतालमा उपचार भइरहेको छ।

मृतकमध्ये एक नवविवाहित महिला रहेको पुष्टि भएको छ। उनी अघिल्लो दिन मात्र विवाह बन्धनमा बाँधिएकी थिइन्। विवाह सकेर घर फर्किंदै गर्दा कार दुर्घटनामा परेकी हुन्।

दुर्घटनापछि घटनास्थलमा प्रहरीले पुगेर शवलाई पोष्टमार्टमका लागि अस्पताल पठाएको छ र दुर्घटनाको कारणबारे थप अनुसन्धान गरिरहेको जनाएको छ।

यो घटना एउटा सामान्य सवारी दुर्घटनाभन्दा बढी एउटा दाम्पत्य जीवन सुरु हुनुअघि नै अन्त्य भएको पीडादायक क्षणको प्रतिनिधित्व गर्छ। यसले सडक सुरक्षाको विषयमा अझ गम्भीर ध्यान दिनुपर्ने आवश्यकता औंल्याएको छ।

अत्तरिया (कैलाली): जनकशिक्षा सामग्री केन्द्र लिमिटेड प्रादेशिक कार्यालय धनगढीले नयाँ शैक्षिक सत्र २०८२ का लागि सुदूरपश्चिम प्रदेशका पहाडी जिल्लाहरूमा हालसम्म ६ लाख १९ हजार थान पाठ्यपुस्तक बिक्री गरेको छ। स्थानीय पुस्तक विक्रेतामार्फत बिक्री गरिएका यी पुस्तकबाट केन्द्रले आठ करोड ३१ लाख रुपैयाँ आम्दानी गरेको छ।

कार्यालयका प्रमुख रामविनय श्रेष्ठका अनुसार चैत १७ गतेदेखि पाठ्यपुस्तक बिक्री सुरु गरिएको हो। “बाजुरा, दार्चुला, बझाङ, बैतडी र अछाम जिल्लामा पुस्तक पुगिसकेको छ भने डोटी र डडेल्धुरामा पुस्तक पठाउने क्रम जारी छ। सबै जिल्लामा समयमै पुस्तक पु-याउने तयारी छ,” उहाँले बताउनुभयो।

कञ्चनपुर जिल्लामा चैत २६ गतेदेखि र कैलाली जिल्लामा चैत २८ गतेदेखि पाठ्यपुस्तक बिक्री सुरु हुने बताउँदै प्रमुख श्रेष्ठले भने, “पाठ्यपुस्तक पर्याप्त मात्रामा छ। सत्र सुरु हुनुअगावै सबै जिल्लामा वितरण हुनेछ।”

कक्षा ३ देखि १० सम्मका पुस्तक अहिले सक्रिय रूपमा बिक्री भइरहेको र कक्षा ११ तथा १२ का पाठ्यपुस्तक पनि फाट्टफुट्ट बिक्री भइरहेको जानकारी दिँदै उहाँले सुदूरपश्चिम प्रदेशमा यस सत्रमा कुल १८ लाख १७ हजार थान पाठ्यपुस्तक बिक्री गर्ने लक्ष्य रहेको बताउनुभयो।

केन्द्रका अनुसार सत्रभरमा करीब २५ करोड रुपैयाँ बराबरका पाठ्यपुस्तक बिक्री गर्ने लक्ष्य छ। अघिल्लो शैक्षिक सत्रमा भने २२ करोड ५७ लाख रुपैयाँ बराबरका पुस्तक बिक्री भएका थिए।

काठमाडौँ: नेपाल र भारतका सर्वोच्च अदालतबीच न्यायिक सहयोग प्रवर्द्धनका लागि समझदारीपत्रमा हस्ताक्षर भएको छ। दुई देशबीचको दीर्घकालीन मैत्रीपूर्ण सम्बन्धलाई अझ सुदृढ बनाउँदै न्यायिक क्षेत्रको सहकार्यलाई संस्थागत गर्न यो समझदारीपत्र हस्ताक्षर गरिएको हो।

भारतीय दूतावासका अनुसार उक्त समझदारीमा नेपालका प्रधानन्यायाधीश प्रकाशमान सिंह राउत र भारतका प्रधानन्यायाधीश सञ्जीव खन्नाको उपस्थितिमा हस्ताक्षर गरिएको हो।

समझदारीअनुसार न्यायपालिकाबीच सहयोग विकास, प्रवर्द्धन र सुदृढीकरणका लागि दुवै देशले नियमित रूपमा कानुन र न्यायसम्बन्धी पछिल्ला विकासहरूको जानकारी आदानप्रदान गर्नेछन्। साथै, भ्रमण आदानप्रदान, अल्पकालीन तथा दीर्घकालीन तालिम, र शैक्षिक कार्यक्रममार्फत न्यायाधीश तथा अन्य अधिकारीबीच अन्तरक्रिया प्रवर्द्धन गरिनेछ।

अदालती प्रक्रिया प्रभावकारी बनाउन प्रविधिको प्रयोगमा जोड दिँदै समझदारीले सम्बन्धित अदालत र संस्थाबीच प्रविधिसम्बन्धी ज्ञान र अनुभव साझा गर्ने प्रावधान राखेको छ। यसका लागि संयुक्त कार्यदल गठन गरिनेछ, जसमा दुवै देशका न्यायपालिका अधिकारीहरू सहभागी हुनेछन्।

भारतको सर्वोच्च अदालतले यसअघि इजरायल, सिङ्गापुर, बङ्गलादेश, भुटान, ट्युनिसिया, जाम्बिया, मोरोक्को, माल्दिभ्स लगायत देशका सर्वोच्च अदालत र सरकारसँग यस्तै किसिमका समझदारीपत्रमा हस्ताक्षर गरिसकेको छ।

काठमाडौं: हाल देशका पहाडी भू–भागमा आंशिक बदली रहेको छ भने अन्य अधिकांश क्षेत्रको मौसम सामान्यतया सफा रहेको जल तथा मौसम विज्ञान विभागले जनाएको छ। विभागका अनुसार हाल देशमा पश्चिमी वायु र स्थानीय वायुको आंशिक प्रभाव सक्रिय रहेको छ।

आज कोशी, बागमती र गण्डकी प्रदेशका पहाडी भू–भागमा आंशिकदेखि सामान्य बदली रहनेछ भने बाँकी भू–भागमा आंशिक बदलीको सम्भावना रहेको विभागको पूर्वानुमान छ।

यी प्रदेशका पहाडी क्षेत्रका थोरै स्थानहरूमा र देशका अन्य केही स्थानमा मेघगर्जन र चट्याङसहित हल्का वर्षा हुने सम्भावना रहेको छ। साथै, कोशी, बागमती र गण्डकी प्रदेशका हिमाली भू–भागमा एक–दुई स्थानमा हल्का हिमपातको सम्भावनासमेत रहेको जनाइएको छ।

आज राति पनि कोशी र मधेश प्रदेशका साथै बागमती र गण्डकी प्रदेशका पहाडी भू–भागमा आंशिक बदली रहनेछ। अन्य भू–भागमा आंशिक बदलीदेखि मौसम सामान्यतया सफा रहने विभागले जनाएको छ।

विभागले सम्भावित मेघगर्जन, चट्याङ र वर्षाका कारण आवश्यक सतर्कता अपनाउन सर्वसाधारणलाई आग्रह गरेको छ।

काठमाडौं: खानेपानी, सरसफाइ तथा सिँचाइमन्त्री प्रदीप यादवले धरानको दीर्घकालीन खानेपानी समस्या समाधानका लागि मन्त्रालय गम्भीर रूपमा लागेको स्पष्ट गर्नुभएको छ।

आज सिंहदरबारस्थित मन्त्रालयमा धरान उपमहानगरपालिकाका नगरप्रमुख हर्कराज राई (साम्पाङ)को नेतृत्वमा गएको एक प्रतिनिधिमण्डलले आगामी आर्थिक वर्ष २०८२/०८३ मा बजेट विनियोजनको माग गर्दै मागपत्र पेश गरेपछि मन्त्री यादवले यस्तो धारणा व्यक्त गर्नुभएको हो।

मन्त्री यादवले भन्नुभयो, “धरानको खानेपानी समस्याबारे म मात्र होइन, पूरै मन्त्रालय जानकार छ। दीर्घकालीन समाधानका लागि मन्त्रालय र दातृ निकायबीच सहकार्यमा काम अघि बढाइनेछ।”

उहाँले धरानको पानी समस्या पहिलेदेखि नै गम्भीर रहेको उल्लेख गर्दै नीति, योजना र बजेटमार्फत स्थायी समाधानको तयारी भइरहेको जानकारी दिनुभयो। उहाँले स्थानीय तहसँग समन्वय गरेर ठोस योजनासहित दीर्घकालीन समाधान सुनिश्चित गरिने आश्वासनसमेत दिनुभयो।

धरान नगरप्रमुख साम्पाङले गर्मीयाम सुरु भएसँगै धरानमा पानीको चरम अभाव भएको जनाउँदै नागरिक अत्यन्तै पीडित भएको उल्लेख गर्नुभयो। उहाँले भन्नुभयो, “पानीको समस्या त पहिलेबाटै थियो, तर अहिले गर्मी सुरु भएपछि स्थिति झनै भयावह बनेको छ। त्यसैले हामीले स्थायी समाधानका लागि बजेट माग गरेका हौँ।”

धरान उपमहानगरपालिकाको मागलाई गम्भीरतापूर्वक लिएको मन्त्रालयले चाँडै यस विषयमा ठोस निर्णय लिने जनाएको छ।

बुटवल: राष्ट्रिय स्वतन्त्र पार्टी (रास्वपा)का सभापति रवि लामिछानेले अदालतको आदेशपछि कारागार चलान हुँदै आफूलाई न्यायालयप्रति सम्मान रहेको प्रतिक्रिया दिएका छन्।

सहकारी ठगी र संगठित अपराध मुद्दामा जिल्ला अदालत रूपन्देहीले एक करोड रुपैयाँ धरौटीमा छाड्ने आदेश दिएको थियो। तर सो आदेशलाई उच्च अदालत तुलसीपुर, बुटवल इजलासले उल्टाउँदै उनलाई थुनामा राख्ने आदेश दिएपछि लामिछानेलाई पक्राउ गरी पूर्पक्षका लागि कारागार पठाइएको हो।

पक्राउपछि सञ्चारकर्मीले ‘अदालतको आदेशमा केही भन्नु छ?’ भनेर सोधेको प्रश्नमा लामिछानेले छोटो जवाफमा भने, “केही भन्नु छैन, सम्मान छ।”

जिल्ला अदालतको आदेशप्रति असहमति जनाउँदै सरकारी वकिल कार्यालय र लामिछाने दुवैले उच्च अदालतमा पुनरावेदन दिएका थिए। उच्च अदालतको आदेशपछि लामिछानेलाई जिल्ला अदालतमा उपस्थित गराई पूर्पक्षका लागि जिल्ला कारागार भैरहवामा चलान गरिएको रूपन्देही प्रहरीले जनाएको छ।

उनी बुटवलको सुप्रिम सहकारी प्रकरणसँग सम्बन्धित मुद्दामा शुक्रबार राति बूढानीलकण्ठस्थित निवासबाट पक्राउ परेका थिए।

चैत २३ गते बिहान ९:१२ बजे यति एअरलाइन्सको विमानमार्फत उनलाई गौतमबुद्ध अन्तर्राष्ट्रिय विमानस्थल झारिएको थियो र त्यसपछि जिल्ला प्रहरी कार्यालय रूपन्देहीको हिरासतमा राखिएको थियो।

काठमाडौं: प्रधानमन्त्री केपी शर्मा ओलीले संविधानअनुसार शपथ लिएर संसद् प्रवेश गर्ने तर संविधान नमान्ने अभिव्यक्ति दिनु इमान्दारीको खडेरी भएको टिप्पणी गरेका छन्।

फरेन अफेयर्स मिडियाले आयोजना गरेको ‘हिमालयन डायलग’को पहिलो शृङ्खलाको उद्घाटन सत्रलाई सम्बोधन गर्दै प्रधानमन्त्री ओलीले सामन्ती शासन व्यवस्थाका कारण नेपाल विकासमा पछि परेको बताए। उनले राजनीतिक परिवर्तनपछि जनताले गरेका अपेक्षाका बीच आफूहरुले विकास र सुशासनको यात्रालाई अगाडि बढाउने भरमग्दुर प्रयास गरिरहेको उल्लेख गरे।

राजतन्त्र समर्थकहरूप्रति लक्षित गर्दै उनले भने, “पराजित सामन्तवाद अझै पनि फर्कन चाहन्छ। मलाई साथ देऊ भन्दैछ। तर संविधानकै व्यवस्था अनुसार शपथ खाएर संसद्मा आएर संविधान मान्दिन भन्नु भनेको इमान्दारीको खडेरी हो।” यस्तो प्रवृत्तिले संक्रमणकाल अझै लम्बिन सक्ने उनको चेतावनी थियो।

प्रधानमन्त्री ओलीले जायज माग लिएर आएका आवाजप्रति सरकार संवेदनशील रहेको बताए। “हावा जता ढल्किन्छ, त्यतै बग्ने प्रवृत्ति हुन्छ। तर जो सडकमा छन्, शिक्षकहरू दुःख पाइरहेका छन्, तिनीहरूको माग हामी संवादबाट सम्बोधन गर्छौं,” उनले स्पष्ट पारे।

प्रधानमन्त्रीले नेपालले आफ्नो स्वाधीनता, स्वाभिमान र राष्ट्रिय हितको रक्षा गर्दै अन्तरराष्ट्रिय दायित्व पनि निर्वाह गर्नुपर्ने बताए। हिमालले बंगालको खाडीको तातो हावा रोक्ने, समुद्रलाई धेरै तातिन नदिने र मरुभूमिकरणबाट क्षेत्रीय तथा वैश्विक स्तरमा सुरक्षा दिने कार्य गरिरहेको उल्लेख गर्दै उनले नेपालको भौगोलिक र प्राकृतिक भूमिका झल्काए।

“हाम्रो मुलुक भौगोलिक, प्राकृतिक र सांस्कृतिक रूपमा विविधतायुक्त छ। विविधताका बीचमा एकता आवश्यक छ। बिना एकता हामीले चाहेका उपलब्धि हासिल गर्न सक्दैनौं,” प्रधानमन्त्री ओलीले भने, “विविधता अभिशाप होइन, सम्पत्ति हो।”

राष्ट्रिय हितप्रति सजग हुँदै प्रधानमन्त्री ओलीले विश्वका चुनौतीहरूप्रति नेपालले मानव हित र शान्तिका पक्षमा योगदान दिनुपर्ने बताए। उनले भूराजनीतिक सचेतनाका साथ राष्ट्रिय हितलाई अगाडि बढाउनुपर्नेमा जोड दिँदै भने, “कुनै छिमेकीसँग बढी मित्रता देखाउने कोल्टिने राजनीति गर्नु हुँदैन। हामी कसैको सामरिक गठबन्धनमा लाग्दैनौं। हामी शान्तिका पक्षमा छौं।”

कार्यक्रममा विभिन्न राजनीतिक दलका नेता तथा कूटनीतिक क्षेत्रका विज्ञहरूले नेपालको परराष्ट्र नीतिबारे दुई सत्रमा छलफल गर्ने जानकारी फरेन अफेयर्स मिडियाका अध्यक्ष गोपाल खनालले दिए।