काभ्रेपलाञ्चोक: जिल्लाको सबैभन्दा पुरानो शिर मेमोरियल एडभेन्टिस्ट अस्पतालमा सिटी स्क्यान सेवा सुरु गरिएको छ। अस्पताल स्थापना भएको ६५ वर्षपछि पहिलोपटक १२८ स्लाइस क्षमताको अत्याधुनिक सिटी स्क्यान मेसिन जडान गरी सेवा प्रारम्भ गरिएको हो।

अस्पतालका प्रमुख कार्यकारी अधिकृत डा. हेक्टर गायरसका अनुसार उक्त मेसिन र जेनेरेटर खरिद तथा जडानमा कुल ७ करोड ५० लाख रुपैयाँ (चार लाख ६० हजार अमेरिकी डलर) खर्च भएको छ। यो मेसिन रोटरी फाउन्डेसन, रोटरी क्लब अफ कुपन्डोल, रोटरी क्लब अफ काभ्रेपलाञ्चोक तथा ग्लोबल ग्रान्ट फन्डमार्फत विभिन्न दातृ संस्था, क्लब तथा व्यक्तिहरूको सहयोगमा खरिद गरिएको हो।

यसअघि पनि रोटरी क्लबको पहलमा अस्पतालमा डायलाइसिस सेवा सञ्चालनका लागि आवश्यक उपकरण उपलब्ध गराइएको थियो। १५० शय्याको यो अस्पतालमा सिटी स्क्यान सेवा सञ्चालनका लागि चिकित्सक तथा कर्मचारीले एक महिनाको तलबसमेत योगदान गरेका छन्।

डा. गायरसले सिटी स्क्यान मेसिन अस्पतालका लागि अत्यावश्यक पूर्वाधार भएको उल्लेख गर्दै अब सेवा आर्थिक अवस्था कमजोर बिरामीले पनि सहज रूपमा पाउने बताएका छन्। बागमती प्रदेशसभा सदस्य कञ्चनचन्द्र बादेले आज उक्त सेवा औपचारिक रूपमा शुभारम्भ गर्नुभएको हो।

जुम्ला: गुठीचौर गाउँपालिका–१ का नापानी, गढिगाउँ, मणि साँघु, डिल्लीकोट र मणि गाउँका ४८० घरधुरी विगत तीन महिनादेखि विद्युत् सेवा विहीन छन्।

स्थानीय अदालीखोला लघुजलविद्युत् आयोजना अन्तर्गतको ५५ किलोवाट क्षमताको जेनरेटर र ट्रान्समिटर गत फागुनदेखि बिग्रिएपछि बिजुली आपूर्ति पूर्ण रूपमा बन्द भएको हो। यता, समस्या समाधानका लागि सम्बन्धित निकायले चासो नदेखाएको स्थानीयवासीहरूको गुनासो छ।

बिजुली नहुँदा बालबालिकाको पढाइ, मोबाइल चार्ज गर्न, कुटानी–पिसानी मिल, फर्निचर उद्योग जस्ता दैनिक गतिविधिहरूमा गम्भीर असर परेको स्थानीय गणेश ऐडीले जानकारी दिनुभयो।

आयोजनाका अध्यक्ष जितेन्द्र लामाले आर्थिक अभावका कारण जेनरेटर र ट्रान्समिटर मर्मत गर्न नसकिएको स्पष्ट पार्नुभयो।

गुठीचौर गाउँपालिका–१ का वडाध्यक्ष अर्जुनकुमार महताराले मर्मतका लागि स्थानीय सरकारले तीन लाख रुपैयाँ बजेट विनियोजन गरिसकेको र आवश्यकता अनुसार थप बजेटको व्यवस्थापन गरिने जानकारी दिनुभयो। उहाँले चाँडै विद्युत् सेवा पुनः सञ्चालनमा ल्याउन आवश्यक प्रक्रिया अघि बढाइने आश्वासन दिनुभयो।

काठमाडौं: पाकिस्तानको विदेश कार्यालयले एक विज्ञप्ति जारी गर्दै भारतको पछिल्लो हवाई आक्रमणप्रति कडा विरोध जनाएको जनाएको छ। पाकिस्तानले एक शीर्ष भारतीय कूटनीतिज्ञलाई बोलाएर उक्त आक्रमणको विरोध जनाएको हो।

विज्ञप्तिमा भनिएको छ, “यी आक्रमणहरूका कारण महिला र बालबालिकासहित धेरै निर्दोष नागरिकहरूको ज्यान गएको छ।” पाकिस्तानले भारतको कदमलाई आफ्नो सार्वभौमसत्तामाथिको स्पष्ट उल्लङ्घन भनेको छ।

पाकिस्तानी विदेश कार्यालयका अनुसार, “भारतको यस्तो आक्रामक र गैरजिम्मेवार व्यवहारले अन्तर्राष्ट्रिय कानुन, संयुक्त राष्ट्रसंघको बडापत्र र दुई देशबीचका द्विपक्षीय महासन्धिहरूको गम्भीर उल्लङ्घन गर्दछ।”

विज्ञप्तिमा भारतलाई चेतावनी दिँदै भनिएको छ, “यस्ता क्रियाकलापहरूले क्षेत्रीय शान्ति र सुरक्षामा गम्भीर खतरा उत्पन्न गर्छन्।”

भारतले मंगलबार राति पाकिस्तान र पाकिस्तान प्रशासित कश्मीरका केही स्थानमा हवाई आक्रमण गरेको थियो। पाकिस्तानी सैन्य प्रवक्ताका अनुसार, ती आक्रमणमा कम्तीमा २६ जना सर्वसाधारणको मृत्यु भएको र ४६ जना घाइते भएका छन्।

उता, भारतले भने जम्मु–कश्मीरको पुंछ क्षेत्रमा पाकिस्तानबाट गरिएको गोलाबारीमा कम्तीमा १० जना भारतीयको मृत्यु भएको र धेरै घाइते भएको दाबी गरेको छ।

श्रीनगर: भारतको जम्मु–कश्मीर क्षेत्रमा बुधबार तीनवटा लडाकु विमान दुर्घटनाग्रस्त भएका छन्। चारजना स्थानीय सरकारी स्रोतहरूले समाचार संस्था रोयटर्सलाई उक्त जानकारी दिएका हुन्।

यो घटना भारतले सीमा पार पाकिस्तानस्थित नौवटा “आतंकवादी पूर्वाधार” मा हवाई आक्रमण गरेको केही घण्टापछि भएको हो। भारतले उक्त कारबाहीलाई आतङ्क विरोधी ‘सर्जिकल स्ट्राइक’ भन्दै आतंकवादविरुद्धको कदमको रूपमा प्रस्तुत गरेको छ।

पाकिस्तानी सेनाका प्रवक्ताले रोयटर्ससँगको कुराकानीमा पाँचवटा भारतीय लडाकु विमान खसालेको दाबी गरेका छन्। तर, भारत सरकारले अहिलेसम्म पाकिस्तानको उक्त दाबीको पुष्टि गरेको छैन।

दुबै पक्षबीच जारी कडा तनावले क्षेत्रीय सुरक्षामा गम्भीर चासो उत्पन्न गराएको छ। पछिल्ला दिनहरूमा सीमाक्षेत्रमा गोलीबारी, ड्रोन आक्रमण तथा सैन्य सन्निकटता बढ्दो देखिएको छ। घटनाबारे विस्तृत विवरण अझै सार्वजनिक भइनसकेको र स्वतन्त्र पुष्टि गरिन बाँकी रहेको बताइएको छ।

यसैबीच, अन्तर्राष्ट्रिय समुदायले संयमता अपनाउन र कूटनीतिक माध्यमबाट तनाव समाधान गर्न भारत र पाकिस्तानलाई आग्रह गरिरहेका छन्।

काठमाडौं: भारत र पाकिस्तानबीच चर्किएको तनावका कारण उत्पन्न सम्भावित क्षेत्रीय सुरक्षापरिस्थिति मूल्याङ्कन गर्न प्रधानमन्त्री केपी शर्मा ओलीले सुरक्षा परिषद्को आकस्मिक बैठक डाकेका छन्।

सिंहदरबारमा बसेको बैठकमा गृहमन्त्री रमेश लेखक, अर्थमन्त्री विष्णु पौडेल, मुख्य सचिव एकनारायण अर्याल, नेपाल सेनाका रथी निर्मलकुमार थापा, नेपाल प्रहरी महानिरीक्षक दीपक थापा, सशस्त्र प्रहरी महानिरीक्षक राजु अर्याल, र राष्ट्रिय अनुसन्धान विभागका प्रमुख हुतराज थापा सहभागी थिए।

बैठकमा भारत–पाकिस्तानबीच युद्ध सुरु भएको अवस्थामा खुला सीमाबाट हुने जोखिमका सन्दर्भमा विशेष छलफल गरिएको स्रोतले जनाएको छ। त्यसअनुसार सीमा क्षेत्रमा सुरक्षा निगरानी कडा पार्ने निर्णय गरिएको हो।

यसअघि गृह मन्त्रालयमा बसेको राष्ट्रिय सुरक्षा समितिको बैठकले सीमा, विमानस्थल र संवेदनशील क्षेत्रमा सुरक्षा सतर्कता बढाउने निर्णय गरिसकेको थियो। त्यसको पालना गर्दै गृह मन्त्रालयले सबै सुरक्षा निकायलाई उच्च सतर्कता (हाइ अलर्ट) मा बस्न निर्देशन दिएको छ।

सशस्त्र प्रहरी बल, नेपालले भारतीय सशस्त्र सीमा बल (एसएसबी)सँग समन्वय गर्दै संयुक्त गस्ती, सूचनाको आदान–प्रदान र निगरानीलाई तीव्र बनाएको जनाएको छ। एक बिओपी (बोर्डर आउट पोस्ट) बाट अर्को बिओपीसम्म २४ घण्टा नियमित गस्ती गरिने व्यवस्था गरिएको छ।

सशस्त्र प्रहरीका अनुसार अवैध घुसपैठ रोक्न विशेष निर्देशनसहित सबै बाहिनीपतिको नेतृत्वमा सीमा सुरक्षालाई व्यवस्थित बनाउने प्रयास भइरहेको छ। चेकपोइन्टहरूमा आवश्यक कागजात तथा परिचयपत्रको परीक्षण र अभिलेख राख्ने कार्य समेत भइरहेको छ।

संवेदनशील स्थानहरूमा निगरानी, चेकजाँच र सूक्ष्म सूचना संकलनको कार्य पनि सक्रिय रूपमा जारी छ। यसका लागि नेपाल प्रहरी, राष्ट्रिय अनुसन्धान विभाग, स्थानीय जनप्रतिनिधि र सर्वसाधारणसँग समेत समन्वय गरी सूचनाको आदान–प्रदान भइरहेको छ।

तर, नेपाल–भारत खुला सिमानाको दीर्घकालीन परम्परालाई ख्याल गर्दै सशस्त्र प्रहरी बलले नियमित र परम्परागत आवतजावतमा अनावश्यक असहजता नहोस् भन्ने विषयमा पनि सचेतता अपनाएको सशस्त्र प्रहरीका सहायक प्रवक्ता डीएसपी शैलेन्द्र थापाले जानकारी दिए।