दाङ: राष्ट्रिय सूचना आयोगका प्रमुख आयुक्त महेन्द्रमान गुरुङले हरेक क्षेत्र र निकायमा सूचनाको हक कार्यान्वयन गरिनुपर्नेमा जोड दिनुभएको छ। आयोगद्वारा तुलसीपुर उपमहानगरपालिकामा आयोजित सूचनाको हकसम्बन्धी अन्तरक्रिया कार्यक्रममा उहाँले हरेक तीन महिनामा भएका काम र कारबाही सार्वजनिक गरी, नागरिकले मागेअनुसार सूचना सहज रूपमा उपलब्ध गराएमा सूचनाको हक स्वयम् कार्यान्वयन हुने धारणा व्यक्त गर्नुभयो। प्रमुख सूचना आयुक्त गुरुङले सरकारी तथा गैरसरकारी संघसंस्थामा सूचना अधिकारी अनिवार्य रूपमा तोक्न आदेश दिइसकिएको जानकारी दिँदै सो आदेशको पालना सुनिश्चित गर्न आग्रह गर्नुभयो।
सोही कार्यक्रममा, तुलसीपुर उपमहानगरपालिका प्रमुख टीकाराम खड्काले सूचनाको हक ऐन कार्यान्वयनप्रति उपमहानगर गम्भीर रहेको र ऐनअनुसार सूचना अद्यावधिक गर्ने काम भइरहेको बताउनुभयो।
त्यसैगरी, दाङका प्रमुख जिल्ला अधिकारी कृष्णप्रसाद लम्सालले पारदर्शी सेवा प्रवाहले सूचनाको हकलाई बल पुग्ने बताउनुभयो। कार्यक्रममा राष्ट्रिय सूचना आयोगका उपसचिव युवराज अधिकारीले सूचनाको हक सम्बन्धी संवैधानिक र कानुनी व्यवस्थामाथि प्रस्तुतीकरण गर्नुभयो, भने दिनेश भट्टराईले कार्यक्रमको सहजीकरण गर्नुभयो।
