काठमाडौं: सत्तापक्षीय दलहरुले संसद्मा विचाराधीन विधेयकलाई छिट्टै टुंगोमा पुर्याउने निर्णय गरेका छन्। प्रधानमन्त्री निवास बालुवाटरमा आज भएको सत्ता पक्षका शीर्ष नेताहरूको बैठकमा संसद्मा विचाराधीन विधेयकलाई चाँडै अघि बढाउने बारेमा छलफल भएको हो।
बैठकमा सहभागी श्रम, रोजगार तथा सामाजिक मन्त्री शरतसिंह भण्डारीले बैठकमा समसामायिक मुद्दाहरू, विशेष गरी भूमिसम्बन्धी अध्यादेशमा राजनीतिक सहमति जुटाउने विषयमा छलफल भएको जानकारी दिए।
बैठकमा प्रधानमन्त्री एवं नेकपा (एमाले)का अध्यक्ष केपी शर्मा ओली, नेपाली कांग्रेसका सभापति र पूर्व प्रधानमन्त्री शेरबहादुर देउवा, लोकतान्त्रिक समाजवादी पार्टी नेपालका अध्यक्ष महन्थ ठाकुर, जनमत पार्टीका अध्यक्ष सिके राउत, जनता समाजवादी पार्टीका अध्यक्ष अशोक राई, र नागरिक उन्मुक्ति पार्टीका अध्यक्ष रञ्जिता श्रेष्ठ लगायतका नेताहरू उपस्थित थिए।
