काठमाडौं — आइसिसी यु–१९ विश्वकप एसिया छनोटमा नेपालले शानदार प्रदर्शन जारी राख्दै लगातार तेस्रो जित दर्ता गरेको छ। बुधबार मुलपानी क्रिकेट मैदानमा सम्पन्न खेलमा नेपालले हङकङलाई ९ विकेटले पराजित गर्दै प्रतियोगितामा अपराजित यात्रा कायम राखेको हो।
हङकङले प्रस्तुत गरेको ११६ रनको लक्ष्य नेपालले १२.३ ओभरमा मात्र एक विकेटको क्षतिमा सजिलै पूरा गर्यो। ओपनर शाहिल पटेलले आक्रामक पारी खेल्दै ४२ रन बनाए। उनले ४१ बलमा ८ चौका प्रहार गरे। कप्तान नरेन भट्टले पनि सशक्त योगदान दिँदै २३ बलमा ८ चौकाको मद्दतमा ३९ रन बनाए। अर्का ओपनर निरज कुमार यादवले १२ बलमा ४ चौकासहित २३ रन बनाए।
यसअघि टस हारेर पहिले ब्याटिङ गरेको हङकङले ४६.२ ओभरमा सबै विकेट गुमाउँदै ११५ रन मात्र बनाएको थियो। हङकङका कप्तान शिव माथुरले संयमित पारी खेल्दै ११६ बलमा ४ चौका र १ छक्का प्रहार गर्दै सर्वाधिक ६३ रन बनाए। अन्य ब्याट्सम्यानमध्ये आर्या पंजवानीले १३, विर माथुरले १२ तथा ह्यारी थोमस हडसनले १० रन बनाए।
नेपालका लागि बलिङतर्फ युवराज खत्रीले उत्कृष्ट प्रदर्शन गर्दै १० ओभरमा १८ रन खर्चेर ४ विकेट लिए। बिपिन शर्माले ३ विकेट र सन्तोष यादवले २ विकेट लिएका थिए।
यसअघि नेपालले पहिलो खेलमा युएईलाई डकवर्थ लुइस पद्धतिमा ५ रनले पराजित गरेको थियो भने दोस्रो खेलमा ओमानलाई ९ विकेटले हराएको थियो। यससँगै नेपाल तीन खेलपछि अपराजित रहँदै प्रतियोगिताको शीर्ष स्थानमा रहेको छ।
