सिरहा: लहान नगरपालिकाले यो वर्ष पनि वृहत्त निःशुल्क आँखा शिविर सञ्चालन गर्ने तयारी गरेको छ। नगर प्रमुख महेशप्रसाद चौधरी र सगरमाथा चौधरी आँखा अस्पतालका अध्यक्ष रवीन्द्रलाल चौधरीले मंगलबार शिविर सञ्चालनसम्बन्धी सम्झौतामा हस्ताक्षर गरेका छन्। नेपाल नेत्रज्योति संघद्वारा सञ्चालित यो अस्पताल आँखा उपचार सेवामा अग्रणी मानिन्छ।
सम्झौता अनुसार, शिविरमा पहिचान गरिएका मोतियाविन्दुका बिरामीको शल्यक्रिया खर्च नगरपालिकाले व्यहोर्नेछ। “हामीले हरेक वर्ष निःशुल्क आँखा शिविर सञ्चालन गर्दै आएका छौं। यसपटक पनि वडास्तरमा शिविर आयोजना गर्ने योजना छ,” नगर प्रमुख चौधरीले जानकारी दिए। उनले शिविरबाट विशेष गरी गरिब तथा विपन्न समुदाय लाभान्वित हुने विश्वास व्यक्त गरे। नगरपालिकाले केही दिनभित्रै गाउँगाउँमा शिविर सञ्चालन गरी करिब एक हजार मोतियाविन्दु बिरामीको शल्यक्रिया गर्ने लक्ष्य राखेको छ।
नगर प्रमुखका अनुसार, विगत दुई वर्षदेखि यस्ता शिविर सञ्चालन गर्दै आएको छ। पहिलो वर्षमा करिब सात हजार जनाले आँखा जाँच गराएका थिए, जसमध्ये एक हजार ९२ जना मोतियाविन्दुका बिरामीको निःशुल्क शल्यक्रिया गरिएको थियो। दोस्रो वर्ष तीन हजार जनाको आँखा जाँच हुँदा सात सय मोतियाविन्दु बिरामीको निःशुल्क शल्यक्रिया गरिएको थियो।
अस्पतालका अध्यक्ष रवीन्द्रलाल चौधरीका अनुसार, जाडोको समयमा आँखासम्बन्धी रोगको संक्रमण बढी हुने गरेको र गरिब तथा विपन्न समुदायले आर्थिक अभावका कारण उपचार नगराउने स्थिति रहने हुँदा यस्तो शिविरले उनीहरूलाई ठूलो राहत दिनेछ।
