काठमाडौं: भारतीय पूर्व ओपनर शिखर धवनले नेपाल प्रिमियर लिग (एनपीएल) को यस वर्षको सिजनमा कर्णाली याक्सबाट खेल्ने भएका छन्। ३८ वर्षीय धवन एनपीएल खेल्ने अहिलेसम्मकै सबैभन्दा चर्चित अन्तर्राष्ट्रिय क्रिकेटर हुन्। यस वर्षको सुरुवातमा अन्तर्राष्ट्रिय तथा घरेलु क्रिकेटबाट सन्यास लिएको घोषणा गरेका धवनको सहभागिताले नेपाल प्रिमियर लिगलाई अझ रोचक बनाएको छ।
कर्णाली याक्सले धवनसँगै बलियो टोली निर्माण गर्नका लागि पाकिस्तानका अनुभवी अलराउण्डर हुसैन टलात, हङकङका आक्रामक ब्याट्सम्यान बाबर हायात, र वेस्ट इन्डिजका चाडविक वाल्टनलाई अनुबन्ध गरिसकेको छ। नेपाली क्रिकेट टोलीका स्टार खेलाडी सोमपाल कामी कर्णाली याक्सका मार्की खेलाडीका रूपमा यस सिजनको मुख्य आकर्षण मानिएका छन्।
धवनले भारतको तर्फबाट ३४ टेस्ट, १६७ एकदिवसीय, र ६८ टी-२० खेल खेलिसकेका छन्। उनी भारतको चर्चित आइपिएलमा पनि पञ्जाव किंग्सको कप्तानको रूपमा र डेकन चार्जर्स, मुम्बई इन्डियन्स, दिल्ली क्यापिटल्स, र सनराइजर्स हैदरावादजस्ता टिमबाट खेलेका अनुभवी खेलाडी हुन्। उनको अन्तिम अन्तर्राष्ट्रिय खेल २०२२ डिसेम्बरमा थियो, जसपछिका दिनहरूमा उनले आफ्नो ध्यान नयाँ लिग र अवसरहरूमा केन्द्रित गरेका छन्।
नेपाल क्रिकेट संघ (क्यान) ले आयोजना गर्न लागेको पहिलो नेपाल प्रिमियर लिग आगामी मंसिर १५ देखि पुस ६ सम्म त्रिभुवन विश्वविद्यालयको अन्तर्राष्ट्रिय क्रिकेट मैदान, कीर्तिपुरमा आयोजना हुँदै छ। यस लिगमा नेपालका प्रतिभाशाली युवा खेलाडीहरूसँगै धवनजस्ता अन्तर्राष्ट्रिय स्तरका खेलाडीको सहभागिता नेपाली क्रिकेटप्रेमीहरूको लागि विशेष अवसर हुनेछ।
यो लिगले नेपाली क्रिकेटलाई अन्तर्राष्ट्रिय स्तरमा थप प्रोत्साहन दिने अपेक्षा गरिएको छ। धवनजस्ता अनुभवी खेलाडीहरूको सहभागिताले न केवल प्रतियोगितामा रोमाञ्चकता थप्नेछ, बरु नेपाली युवा खेलाडीहरूको प्रदर्शनलाई अन्तर्राष्ट्रिय मञ्चमा उजागर गर्न महत्त्वपूर्ण भूमिका खेल्नेछ।
