बलिउड नायक प्रतिक बब्बर आफ्नो नयाँ ट्याटुका कारण चर्चामा छन् । उनले आफ्नो छातीमा आमा स्मिता पाटिलको नामको ट्याटु बनाएका छन् । प्रतिकले यो ट्याटुको तस्बिर सोसल मिडियामा सेयर गरेका छन् । स्मरण रहोस्, प्रतिकलाई जन्म दिएको केही दिनपछि नै स्मिताको निधन भएको थियो । त्यतिबेला उनी ३१ वर्षकी मात्रै थिइन् ।
एक अन्तरवार्तामा प्रतिकले आफ्नी आमाबारे धेरै कुरा सेयर गरेका थिए । उनले भनेका थिए, ‘मेरी आमा गिफ्टेड महिला थिइन् । उदाहरणको रुपमा भन्ने हो भने सचिन तेन्दुलकरको जन्म क्रिकेटको भगवान बन्नका लागि भएकमो थियो । ठिक त्यसरी नै आमाको जन्म अभिनेत्री बन्नकै लागि भएको थियो । उनको यति चाँडै निधन हुनु भारतीय सिनेमाका लागि निकै ठूलो हानी भयो ।’
प्रतिकले भनेका थिए, ‘आमा बारे किस्सा कहानी मात्रै सुनेको छु । फिल्म र उनको अन्तरवार्ताको क्लिपिङ देखेर नै उनीबारे एउटा धारणा बनाउन पाएको छु । उनको हरेक कुरा सिक्न लायक छ । उनको हरेक कुरा भावनात्मक थियो । म सायद व्यक्त गर्न सक्दिनँ होला । सबै कुराले दुःखी मात्रै बनाउँछ भन्ने पनि छैन । उनीबारे यस्ता थुप्रै पाटन छन् जसले निकै खुसी दिन्छन् । अनुहार र मन दुबै प्रफुल्ल हुन्छन् । उनलाई मन पराउने र निकै नजिकका मानिसहरुले बताए अनुसार उनी निकै मस्ती गर्नुपर्ने र स्वतन्त्र धारणा भएकी महिला थिइन् । एकपटक त उनले घुम्न जानका लागि हजुरबुवाको जीप चोरेर भागेकी थिइन् ।’
प्रतिक भन्छन्, ‘उनी निकै साहसी थिइन् । यो सबै सुनेर निकै राम्रो महसुस हुन्छ । उनी बारे हरेक शब्द निकै मूल्यवान् छ । हुन त मलाई उनको सबै फिल्म मन पर्छ तर शक्ति, नमक हलाल मलाई असाध्यै मनपर्छ । म उनलाई पर्फमरको रुपमा जज गर्न सक्दिनँ । मेरो पूरा अस्तित्व नै उनकै कारण हो । अब उनीसँग मेरो आँखा मिल्छ वा अनुहारको कुन हिस्सा आमाजस्तो देखिन्छ भन्नेबारे त अगाडिको मानिसले नै भन्न सक्छ । उनको छोरा भएपछि त अलिकति उनीजस्तो त देखिन्छु नै ।’
‘काश म छोरीको रुपमा जन्मिएको भए आमाको कुनै फिल्मको रिमेकमा उनको भूमिका निर्वाह गर्दथेँ । आमाको काखमा टाउको राखेर आफ्नो मनको कुरा भन्न पाएको भए भन्ने लाग्छ । जब हजुरआमा–हजुरबुवा बित्नुभयो तब असाध्यै एक्लो महसुस भयो । उनको मास्टरपिस ‘अर्थ’ को रिमेकको कुरा मैले सुनेको थिएँ । मलाई त्यो अफर पनि भएको थियो ।’
हरेक वर्ष १७ अक्टोबरमा स्मिता पाटिलको जन्मदिन कसरी मनाइन्छ ? यसबारे प्रतिकले भनेका थिए, ‘आमाको जन्मदिनमा हामी सबैजना दुःखी नै हुनुपर्छ भन्ने आवश्यक छैन । समग्र रुमिा निकै सकारात्मक र विशेष दिन हुन्छ यो । हामी सबै परिवार त्यस दिन जम्मा हुन्छौं । सेलिब्रेसन त गर्दैनौं डिनर चाहिँ गर्छौं ।’
१७ अक्टोबर सन् १९५५ मा पुणेमा जन्मिएकी स्मिता १३ डिसेम्बर सन् १९८६ मा ३१ वर्षको उमेरमा सुत्केरी भएपछि देखिएको जटिलताका कारण संसारबाट बिदा भइन् । उनको निधन मुम्बईमा भएको थियो । उनी राज बब्बरकी दोस्रो श्रीमती थिइन् । उनको मृत्युपछि राज बब्बर आफ्नी जेठी श्रीमतीकोमा फर्किए र प्रतिकलाई उनका मामाघरका हजुरबुवा–हजुरआमाले हुर्काएका थिए ।
रातोपाती बाट साभार
