काठमाडौं: त्रिभुवन विश्वविद्यालय (त्रिवि) अन्तर्गतको परीक्षा नियन्त्रण कार्यालयले ट्रान्सक्रिप्ट र प्रोभिजनल सर्टिफिकेटका लागि अनलाइन सेवा सुरु गरेको छ। परीक्षा नियन्त्रक पुष्पराज जोशीले एक सूचना जारी गर्दै आज (सोमबार) बिहान ११ बजेदेखि उक्त सेवा औपचारिक रूपमा सञ्चालनमा ल्याइएको जानकारी दिएका छन्।
यस प्रणालीको सुरु भएपछि अब विद्यार्थीहरूले परीक्षा नियन्त्रण कार्यालय बल्खु पुगेर कागजी फारम भर्नुपर्ने र लामो समय लाइन बस्नुपर्ने झन्झटबाट मुक्ति पाउनेछन्। जोशीका अनुसार हालका लागि ट्रान्सक्रिप्ट र प्रोभिजनल सर्टिफिकेटको आवेदन अनलाइनमार्फत दिन सकिने व्यवस्था गरिएको छ भने अन्य सेवाहरू पनि क्रमशः अनलाइनमार्फत उपलब्ध गराउँदै लैजाने योजना रहेको छ।
परीक्षा नियन्त्रक कार्यालयले आगामी जेठ १५ गतेदेखि सम्पूर्ण सेवा अनलाइनमार्फत सञ्चालनमा ल्याउने तयारी गरेको समेत जनाएको छ।
