काठमाडौँ, २३ असोजः आइसिसी टी–२० विश्वकप एसिया तथा इस्ट एसिया प्यासिफिक छनोट अन्तर्गत नेपालले विजयी सुरुवात गरेको छ । ओमानको अल अमेरतस्थित ओमान क्रिकेट एकेडेमी–१ मैदानमा आज सम्पन्न समूह ‘बी’को पहिलो खेलमा नेपालले कुवेतलाई ५८ रनले पराजित गर्दै प्रभावशाली जीत हासिल गरेको हो ।
टस हारेर पहिले ब्याटिङ गरेको नेपालले निर्धारित २० ओभरमा ७ विकेटको क्षतिमा १४१ रनको प्रतिस्पर्धात्मक स्कोर तयार गर्यो । नेपालका ओपनर कुशल भुर्तेलले उत्कृष्ट प्रदर्शन गर्दै ५६ बलमा तीन छक्का र तीन चौकासहित ६६ रनको अर्धशतकीय इनिङ खेले । त्यस्तै, गुल्सन झा र दीपेन्द्रसिंह ऐरीले समान २०–२० रन जोड्दा कप्तान रोहित पौडेलले १६ रनको योगदान गरे ।
बलिङतर्फ कुवेतका नवीनराज राजेन्द्रन र अनुदीप चन्दामाराले समान दुई–दुई विकेट लिँदा मोहम्मद आकिफ फरुकले एक विकेट हात पारे ।
१४२ रनको लक्ष्य पछ्याउने क्रममा कुवेत १८.१ ओभरमै सबै विकेट गुमाउँदै ८३ रनमा समेटियो । उसका ओपनर क्लिन्टो आन्टोले २६ र यासिन पटेलले १९ रन बनाए ।
नेपालका बलरहरू उत्कृष्ट प्रदर्शन गर्दै चम्किए — सन्दीप लामिछाने, ललितनारायण राजवंशी र कप्तान रोहित पौडेलले समान दुई–दुई विकेट लिए भने कुशल भुर्तेल, सोमपाल कामी र नन्दन यादवले समान एक–एक विकेट हात पारे ।
यस जितसँगै नेपालले समूह ‘बी’मा पहिलो खेलमै सानदार सुरुवात गरेको छ । अब नेपालले समूह चरणको दोस्रो खेल शुक्रबार जापानसँग खेल्नेछ ।
