काठमाडौं । साउन १ गतेदेखि देशभर प्रदर्शनमा आएको नेपाली चलचित्र ‘गौँथली’ ले प्रदर्शनको पहिलो सप्ताहन्तमै उत्साहजनक दर्शक प्रतिक्रिया पाएको छ। सकारात्मक ‘वर्ड अफ माउथ’ र बढ्दो दर्शक उपस्थितिका कारण अधिकांश हलहरूले प्रारम्भिक तालिकाभन्दा अतिरिक्त शो थपेका छन्।
निर्देशक तथा निर्माता डा. कपिल रिजालका अनुसार शुक्रबारको तुलनामा शनिबार शो संख्या बढाइएको थियो। ती अतिरिक्त शोहरू पनि भरिएपछि शनिबार साँझदेखि नै थप प्रदर्शनको व्यवस्था गरिएको उनले बताए।
तर ‘गौँथली’ केवल व्यावसायिक चलचित्र नभई नेपाली समाज, संस्कृति र मानवीय संवेदनालाई केन्द्रमा राखेर निर्माण गरिएको सिर्जना भएको निर्देशक रिजालको भनाइ छ।
उनका अनुसार साहित्यकार हजुरबुवा र वरिष्ठ चिकित्सक डा. भोला रिजालको साहित्य, संगीत र चलचित्रप्रतिको लगावले आफूलाई बाल्यकालदेखि नै अभिनय र कथासिर्जनातर्फ आकर्षित गरेको हो। चिकित्सकको व्यस्त पेशामा रहे पनि सिर्जनाप्रतिको रुचि कहिल्यै नहराएको उनले बताए।
रिजालका अनुसार आफ्ना चलचित्रमा स्वास्थ्य, शिक्षा र सामाजिक मुद्दा बारम्बार समेटिनुको कारण पनि आफ्नै जीवन अनुभव हो। नेपालजस्तो देशमा स्वास्थ्य र शिक्षा हरेक नागरिकको आधारभूत अधिकार भएकाले ती विषयलाई कथाको केन्द्रमा राख्ने गरेको उनले बताए।
२५ वर्षअघिको ‘गौँथली’बाट नयाँ पुस्तासम्म
‘ह्यारी कि प्यारी’पछि निर्देशक रिजालले यसपटक भावनात्मक र नेपालीपन झल्किने कथा रोजेका छन्। करिब **२५ वर्षअघि डा. भोला रिजालले निर्माण गरेको ‘गौँथली’**बाट प्रेरणा लिएर आधुनिक प्रविधि र नयाँ प्रस्तुतीमार्फत अहिलेको पुस्ताका लागि चलचित्रलाई पुनः सिर्जना गरिएको उनले बताए।
उनका अनुसार चलचित्रको उद्देश्य नेपाली भाषा, संस्कृति, भेषभूषा, संगीत र गाउँको जीवनलाई समयसँगै टिकिरहने सिनेमाका रूपमा प्रस्तुत गर्नु हो।
पात्रमै हराउने कलाकारको छनोट
चलचित्रमा चर्चित अनुहारभन्दा पात्रमा जीवन्त देखिन सक्ने कलाकार रोजिएको निर्देशकको भनाइ छ। मुख्य भूमिकामा सिम्रन पन्त र अभिनेता अरुण क्षेत्रीलाई अभिनय क्षमताका आधारमा छनोट गरिएको उनले बताए।
अटिजमप्रति सम्मानजनक प्रस्तुति
‘गौँथली’को मुख्य विषयमध्ये एक फरक क्षमता (अटिजम) भएका व्यक्तिप्रतिको समाजको दृष्टिकोण पनि हो। निर्देशक रिजालका अनुसार यस्तो पात्र प्रस्तुत गर्नुअघि अभिभावकसँग परामर्श, प्रत्यक्ष अध्ययन तथा कलाकारलाई विशेष तयारी गराइएको थियो।
चलचित्र हेरेपछि अटिजम भएका बालबालिकाका अभिभावकबाट सकारात्मक प्रतिक्रिया आएको उल्लेख गर्दै उनले फरक क्षमता भएका व्यक्तिलाई सम्मानजनक ढंगले प्रस्तुत गर्ने प्रयास सफल भएको बताए।
बालविवाहदेखि आत्मस्वीकृतिसम्मका विषय
चलचित्रले प्रेम, संघर्ष, बालविवाह, पारिवारिक सम्बन्ध, शिक्षा र आत्मस्वीकृतिजस्ता विविध सामाजिक विषयलाई समेटेको छ। निर्देशक रिजालका अनुसार कुनै एक दृश्यभन्दा पनि सम्पूर्ण कथा, अभिनय, छायांकन र संगीतले दर्शकलाई भावनात्मक यात्रा गराउँछ।
व्यावसायिक सफलताबारे बोल्दै उनले बक्स अफिसभन्दा दर्शकको मन जित्नु नै ठूलो उपलब्धि भएको बताए।
विदेश प्रदर्शनको तयारी
हाल नेपालभर करिब २०० स्क्रिनमा प्रदर्शन भइरहेको ‘गौँथली’ अब अन्तर्राष्ट्रिय प्रदर्शनको तयारीमा पनि छ। चलचित्र साउन २४ गतेदेखि अमेरिकामा प्रदर्शन हुनेछ भने त्यसपछि मध्यपूर्व, बेलायत र अस्ट्रेलियामा पनि रिलिज गरिने तयारी छ।
मदनकृष्ण श्रेष्ठको प्रशंसा
चलचित्रमा शिक्षकको भूमिकामा देखिएका वरिष्ठ कलाकार मदनकृष्ण श्रेष्ठले ‘गौँथली’ मनोरञ्जनसँगै सामाजिक चेतना जगाउने सशक्त चलचित्र बनेको प्रतिक्रिया दिएका छन्।
उनले चलचित्रले छोरीहरूको शिक्षा, बालविवाह र अटिजमप्रति समाजको दृष्टिकोण परिवर्तन गर्ने सन्देश प्रभावकारी रूपमा दिएको बताए। ग्रामीण समाजमा अझै पनि बालविवाह र छोरीहरूको शिक्षाप्रतिको विभेद यथार्थ रूपमा प्रस्तुत गरिएको उनको भनाइ छ।
श्रेष्ठले मुख्य अभिनेत्री सिम्रन पन्त तथा अटिजम भएको पात्रको अभिनयको विशेष प्रशंसा गर्दै चलचित्रलाई नेपाली समाज, संस्कृति र जीवनशैलीसँग गहिरो रूपमा जोडिएको उत्कृष्ट कृति भएको बताए।
उनले राम्रो चलचित्रको प्रचार दर्शक आफैंले गर्ने विश्वास व्यक्त गर्दै ‘गौँथली’ पनि त्यही स्तरको चलचित्र बनेको दाबी गरे।
