काठमाडौं । गोकर्णेश्वर नगरपालिकाका स्थायी बासिन्दाले काठमाडौं मेडिकल कलेज (केएमसी) मा उपचार गराउँदा ५० प्रतिशतसम्म सहुलियत पाउने भएका छन्। यस सम्बन्धमा गोकर्णेश्वर नगरपालिका र काठमाडौं मेडिकल कलेज (केएमसी) पब्लिक लिमिटेडबीच सोमबार स्वास्थ्य उपचारमा छुट उपलब्ध गराउने सम्झौता भएको छ।
सम्झौतापत्रमा गोकर्णेश्वर नगरपालिकाका प्रमुख प्रशासकीय अधिकृत यामनारायण गौली र केएमसी पब्लिक लिमिटेडका प्रमुख प्रशासकीय अधिकृत नारायणप्रसाद दाहालले हस्ताक्षर गरेका छन्।
सम्झौताअनुसार गोकर्णेश्वरका स्थायी बासिन्दाले केएमसीको दुवाकोट युनिटमा साधारण शैयामा भर्ना भई उपचार गराउँदा औषधि, औषधिजन्य सामग्री, उपकरण, इम्प्लान्ट, क्याबिन तथा केही विशेष सेवाबाहेक अन्य उपचार खर्चमा ५० प्रतिशत छुट पाउनेछन्। यस्तै, सिनामंगलस्थित शाखामा उपचार गराउँदा सोही प्रकृतिका सेवामा २५ प्रतिशत छुट उपलब्ध हुनेछ।
दुवाकोट युनिटमा उपचार गरिएका बिरामीको कुल खर्चको ५० प्रतिशत र सिनामंगल शाखामा उपचार गरिएका बिरामीको कुल खर्चको ७५ प्रतिशत रकम गोकर्णेश्वर नगरपालिकाले अस्पताललाई शोधभर्ना गर्ने व्यवस्था गरिएको छ।
केएमसीका सञ्चालक डा. सुनिल शर्माले स्वास्थ्य बीमा, विपन्न तथा गरिब लक्षित कार्यक्रम, गोकर्णेश्वर नगरपालिकाको सहुलियत र केएमसीको छुटसमेत जोड्दा मिर्गौला रोगीले १० लाख रुपैयाँसम्मको उपचार निःशुल्क प्राप्त गर्न सक्ने बताए।
नगर प्रमुख दीपककुमार रिसालले गोकर्णेश्वरवासीलाई सहज र सुलभ स्वास्थ्य सेवा उपलब्ध गराउने उद्देश्यले विभिन्न स्वास्थ्य संस्थासँग सहकार्य गरिएको जानकारी दिए। उनले वडास्तरका स्वास्थ्य चौकी, नगर अस्पताल तथा निजी अस्पतालहरूसँगको सहकार्यमार्फत नगरवासीलाई सहुलियतपूर्ण उपचार सेवा उपलब्ध गराउने योजना रहेको बताए।
उनका अनुसार हाल करिब ३० करोड रुपैयाँको लागतमा नगर अस्पताल निर्माण भइरहेको छ।
सम्झौताअनुसार उपचारका क्रममा आवश्यक पर्ने रगत उपलब्ध गराउन नगरपालिकाले सिफारिस गर्नेछ। रगतको प्रयोगशाला परीक्षण शुल्कबापत प्रतिपिन्ट १ हजार २१० रुपैयाँ नगरपालिकाले अस्पताललाई शोधभर्ना गर्ने व्यवस्था गरिएको छ।
उपचार सहुलियत प्राप्त गर्न सेवाग्राहीले निवेदन, नागरिकता, मतदाता परिचयपत्र, विवाह दर्ता प्रमाणपत्र, नाबालकका हकमा जन्मदर्ता प्रमाणपत्र तथा बीमितका लागि बीमा कार्ड पेश गर्नुपर्नेछ।
उपचार सम्पन्न भएपछि अस्पतालले खर्च विवरण, बिल, उपचार कार्ड, नगरपालिकाको सिफारिसपत्र तथा स्थायी बसोबास पुष्टि हुने कागजात स्वास्थ्य शाखामा पेश गर्नेछ। त्यसपछि नगरपालिकाले ३० दिनभित्र सम्बन्धित रकम भुक्तानी गर्ने व्यवस्था गरिएको छ।
यो सम्झौता आगामी साउन १ गतेदेखि लागू भई २०८४ असार मसान्तसम्म कायम रहनेछ।
