काठमाडौं: नेकपाका महासचिव नेत्रविक्रम चन्द ‘विप्लव’ले देशको नेतृत्व सम्हालेर एकपटक नेपाललाई सेवा गर्ने चाहना रहेको बताएका छन्।
शनिबार काठमाडौंको कमलादीस्थित प्रज्ञा भवनको डबलीमा आयोजित पार्टी प्रवेश कार्यक्रममा सम्बोधन गर्दै उनले क्रान्तिकारी कम्युनिष्ट पार्टीहरूलाई एकताबद्ध गर्दै देशको नेतृत्व गर्ने आफ्नो इच्छा प्रकट गरे।
‘कांग्रेस, एमाले र माओवादी केन्द्रले पटक-पटक सरकारको नेतृत्व गर्दा पनि जनअपेक्षा पूरा गर्न सकेनन्,’ विप्लवले भने, ‘अब नेकपाले ध्रुवीकरण गर्दै देशको नेतृत्व गर्ने समय आएको छ। यो देशको सेवा गर्ने अवसर नेकपाले पाउनुपर्छ।’
कार्यक्रममा मोहन वैद्य नेतृत्वको क्रान्तिकारी कम्युनिष्ट पार्टीका नेता जितेन्द्र दाहालले विप्लव नेतृत्वको नेकपामा प्रवेश गरेका छन्।
विप्लवले पार्टीभित्र भएको ध्रुवीकरणको निर्णयअनुसार यो प्रक्रिया सुरु भएको जानकारी दिँदै भने, ‘हाम्रो केन्द्रीय समितिको बैठकले गरेको निर्णयको पहिलो कदमको रुपमा यो अभियान यहाँबाट सुरु भएको हो। यस्ता ध्रुवीकरणका कार्यक्रमहरू आगामी दिनमा पनि जारी रहनेछन्।’
उनले माओवादी केन्द्रले पनि ध्रुवीकरणको कुरा गरिरहेको तर तीनपटक सरकारको नेतृत्व र पटक–पटक सत्तामा पुगेको माओवादी केन्द्रले जनतालाई के दिन सक्छ भन्ने प्रश्न उठाएका छन्।
