काठमाडौँ: आज विश्व प्रतिलिपिअधिकार दिवस मनाइँदैछ। सन् १९९५ मा संयुक्त राष्ट्रसंघीय शैक्षिक, वैज्ञानिक तथा सांस्कृतिक संगठन (युनेस्को) को साधारण सभाले प्रत्येक वर्ष अप्रिल २३ मा यो दिवस मनाउने निर्णय गरेको हो।
यस दिवसको मुख्य उद्देश्य पुस्तक र लेखकप्रति सम्मान प्रकट गर्नुका साथै पढ्ने संस्कृतिलाई प्रोत्साहन गर्नु हो। साथै, बौद्धिक सम्पत्ति संरक्षणका लागि आवश्यक कानुनी जानकारी प्रदान गर्नु र प्रतिलिपिअधिकारसम्बन्धी जनचेतना फैलाउनु पनि यसको उद्देश्य हो।
यो मिति विश्व साहित्यका लागि ऐतिहासिक रूपमा पनि महत्वपूर्ण मानिन्छ। यही दिन विश्वप्रसिद्ध साहित्यकारहरू विलियम शेक्सपियर र इन्का गार्सिलासो दे ला भेगाको निधन भएको थियो।
