वासिङ्टन डिसी। अमेरिकाले ग्रीन कार्ड (स्थायी बसोबास अनुमति) प्राप्त गर्न चाहने विदेशी नागरिकका लागि आप्रवासन नियम थप कडा बनाएको छ। नयाँ व्यवस्था अनुसार अब अमेरिकाभित्र अस्थायी रूपमा बसिरहेका विदेशी नागरिकले ग्रीन कार्डका लागि आवेदन दिन आफ्नै देश फर्किनुपर्ने भएको छ।
अमेरिकी नागरिकता तथा आप्रवासन सेवा (यूएससीआईएस) ले शुक्रबार सार्वजनिक गरेको नयाँ नीतिअनुसार अमेरिकाभित्रैबाट बसाइँ स्थिति परिवर्तन गरी स्थायी बसोबास अनुमति लिने प्रक्रियामा रोक लगाइएको छ।
अमेरिकी गृह सुरक्षा विभागका अनुसार अस्थायी भिसामा अमेरिका रहेका विदेशीहरूले अब ग्रीन कार्ड प्राप्त गर्न स्वदेश फर्केर त्यहाँस्थित अमेरिकी दूतावासमार्फत आवेदन प्रक्रिया पूरा गर्नुपर्नेछ। विभागले यस कदमलाई आप्रवासन कानुनको प्रभावकारी कार्यान्वयनका रूपमा व्याख्या गरेको छ।
विभागका अनुसार कानुनका कमजोरी प्रयोग गरेर अमेरिकाभित्रैबाट स्थायी बसोबास अनुमति लिने प्रवृत्ति रोक्न यो नीति लागू गरिएको हो। यूएससीआईएसले जारी गरेको विज्ञप्तिमा अस्थायी रूपमा अमेरिका रहेका विदेशी नागरिकले आवेदन प्रक्रियाका लागि आफ्नै देश फर्किनुपर्ने उल्लेख गरिएको छ।
यससँगै प्रशासनिक बोझ कम हुने तथा अन्य विचाराधीन आवेदन र मुद्दा छिटो टुङ्ग्याउन स्रोत र जनशक्ति केन्द्रित गर्न सहज हुने दाबी पनि गरिएको छ।
यो निर्णय राष्ट्रपति डोनाल्ड ट्रम्प प्रशासनले आप्रवासन प्रणालीलाई थप कडा बनाउने अभियानअन्तर्गत चालेको पछिल्लो कदमका रूपमा हेरिएको छ। यसअघि ट्रम्प प्रशासनले विद्यार्थी, सांस्कृतिक आदानप्रदान कार्यक्रममा सहभागी तथा सञ्चारकर्मीहरूको भिसा अवधि छोट्याएको थियो। अमेरिकी विदेश मन्त्रालयका अनुसार ट्रम्प पुनः सत्तामा आएयता एक लाखभन्दा बढी विदेशी नागरिकको भिसा रद्द गरिएको छ।
यता, शरणार्थी तथा आप्रवासी अधिकारका क्षेत्रमा काम गर्ने संस्थाहरूले भने नयाँ नीतिको विरोध गरेका छन्। आप्रवासी सहायता संस्था HIAS ले यो नीति अमानवीय भएको टिप्पणी गरेको छ।
संस्थाका अनुसार मानव बेचबिखनबाट बचेका व्यक्ति, दुर्व्यवहार तथा बेवास्ता झेलेका बालबालिकालाई समेत जोखिमपूर्ण देशमै फर्केर ग्रीन कार्ड प्रक्रिया पूरा गर्न बाध्य बनाइनु गम्भीर र अन्यायपूर्ण कदम हो।
