जनकपुर । विमलेन्द्र निधि ले नेपाली कांग्रेस को नयाँ नेतृत्वले सही दिशा लिएको बताएका छन्। धनुषा क्षेत्र नम्बर ३ बाट प्रतिनिधि सभा सदस्य पदका उम्मेदवार रहेका निधिले पार्टीभित्र नयाँ जोश र ऊर्जा देखिएको उल्लेख गरे।

जनकपुरमा आयोजित आमसभालाई स्मरण गर्दै उनले त्यसले सकारात्मक सन्देश दिएको बताए। “हामी बदलियौँ, देश बदल्छौँ र देश सम्हाल्छौँ भन्ने युवा ऊर्जा देखिएको छ,” उनले भने, “यसले पार्टीभित्र राम्रो प्रभाव पारेको छ।”

निधिले अहिले कांग्रेसभित्र आन्तरिक एकता रहेको दाबी गर्दै बहुमतसहित सरकार बन्ने विश्वास व्यक्त गरे। आन्तरिक मतभेद समेट्ने प्रयासमा आफू सक्रिय रहेको र त्यसमा सफलता मिलिरहेको उनको भनाइ थियो।

उनले वर्तमान अवस्थामा निर्वाचित सरकार र संसद नभएकाले लोकतान्त्रिक प्रणाली दबाबमा परेको उल्लेख गर्दै यसको समाधान कांग्रेसले दिन सक्ने बताए। प्रतिनिधि सभाको निर्वाचनपछि कांग्रेस नेतृत्वको सरकारले भ्रष्टाचार नियन्त्रण र सुशासनलाई प्राथमिकतामा राख्ने उनको दाबी छ।

निधिले डिजिटल गभर्नेन्स अर्थात् ई–गभर्नेन्स प्रणाली लागू गरेर प्रशासनिक प्रक्रिया सरल, पारदर्शी र छरितो बनाउने योजना सुनाए। “लाइसेन्स, नागरिकता जस्ता सेवामा अनावश्यक ढिलाइ हटाएर तोकिएको समयमै सेवा दिने व्यवस्था गर्नुपर्छ,” उनले भने। यो प्रणाली स्थानीय, प्रादेशिक र संघीय तीनै तहमा लागू गर्नुपर्नेमा उनले जोड दिए।

उनले कांग्रेसले विगतदेखि नै जनताको अधिकार र विकासका लागि काम गरेको दाबी गर्दै अनुभव नभएका शक्तिलाई सत्तामा पठाउँदा जोखिम हुने टिप्पणी गरे। “नयाँ ड्राइभरले दुर्घटना गराउन सक्छ,” भन्दै उनले कांग्रेसको रूख छापमा मतदान गर्न आग्रह गरे।

धनुषा–३ का लागि आफ्नो एजेन्डाबारे उनले ग्रामीण क्षेत्रमा तीन प्रसूति अस्पताल र तीन बाल अस्पताल स्थापना गर्ने, युवाका लागि लगानी भित्र्याई रोजगारी सिर्जना गर्ने योजना सुनाए। साथै, देशमै मल कारखाना स्थापना गर्न पहल गर्ने बताए।

जनकपुरको धार्मिक तथा खेल पर्यटन प्रवर्द्धनका लागि रामजानकी स्टेडियम निर्माण शीघ्र सम्पन्न गरी स्पोर्ट्स एकेडेमी सञ्चालन गर्ने उनको योजना छ।

निधिले विगतमा आफू सरकारमा रहँदा राजर्षि जनक विश्वविद्यालय स्थापना, जनकपुरलाई मधेस प्रदेशको राजधानी बनाउने पहल, ढल्केबर–जनकपुर ६ लेन सडक निर्माणलगायत पूर्वाधार विकासमा योगदान दिएको दाबी गरे। साथै, रेल सेवा, हवाई सेवा र अयोध्या–जनकपुर कनेक्टिभिटीमा आफ्नो भूमिका रहेको उनले उल्लेख गरे।

उनले संविधानलाई सही मार्गमा कार्यान्वयन गर्दै संघीय लोकतान्त्रिक गणतन्त्रलाई सबल बनाउन निर्वाचित सरकार आवश्यक रहेको दोहोर्‍याए। बहुमतसहित कांग्रेस सरकार बने मात्र स्थिरता, सुशासन र समृद्धि सुनिश्चित हुने उनको निष्कर्ष छ।

काठमाडौँ । नेपाल राष्ट्र बैंक ले चालु पुँजी कर्जा सम्बन्धी मार्गदर्शन परिमार्जन गरेको छ। मौद्रिक नीतिको अर्धवार्षिक समीक्षा सार्वजनिक गर्दै केन्द्रीय बैंकले नयाँ व्यवस्था लागू गरेको हो।

नयाँ व्यवस्थाअनुसार बैंक तथा वित्तीय संस्थाले ऋणीको नगद प्रवाह र वित्तीय विवरणको विश्लेषणका आधारमा स्थायी चालु पुँजी कर्जाको अवधि निर्धारण गर्न सक्ने भएका छन्।

हालसम्म दुई करोड रुपैयाँभन्दा माथिको चालु पुँजी कर्जा जारी गर्दा उक्त कर्जा स्थायी रूपमा आवश्यक हो वा अस्थायी प्रकृतिको हो भन्ने स्पष्ट निर्धारण गर्नुपर्ने व्यवस्था थियो। स्थायी रूपमा आवश्यक ठहरिएको कर्जा कम्तीमा पाँच वर्ष अवधिको आवधिक कर्जाका रूपमा प्रदान गर्नुपर्ने प्रावधान कायम छ।

त्यसैगरी, राष्ट्र बैंकले चालु पुँजी कर्जाको बक्यौता घटाउने सम्बन्धी प्रावधान पनि संशोधन गरेको छ। अब ऋणीले वर्षमा कम्तीमा लगातार ७ दिनसम्म बक्यौता रकम ३० प्रतिशतभन्दा कम गर्नुपर्ने व्यवस्था लागू हुनेछ। यसअघि यस्तो सीमा १० प्रतिशत रहेको थियो।

राष्ट्र बैंकका अनुसार परिमार्जित व्यवस्था कार्यान्वयनसँगै कर्जा प्रवाहलाई यथार्थ आवश्यकतासँग जोड्ने र वित्तीय अनुशासन मजबुत बनाउने लक्ष्य राखिएको छ।

काठमाडौँ । आसन्न निर्वाचनलाई लक्षित गर्दै नेपाल आयल निगम ले खाना पकाउने एलपी ग्यासको आयात बढाएको छ। निर्वाचन अवधिमा बजारमा ग्यासको अभाव हुन नदिन निगमले Indian Oil Corporation (आईओसी) बाट उच्च दरमा ग्यास लोडिङ गरिरहेको जनाएको छ।

निगमका अनुसार मंगलबार यो वर्षकै सबैभन्दा धेरै परिमाणमा ग्यास आयात गरिएको छ। एकै दिन १३८ बुलेट ग्यास लोड भएको जानकारी दिँदै निगमले उक्त परिमाण करिब १ लाख ७३ हजार ८०० सिलिन्डर बराबर हुने जनाएको छ।

निगमका कार्यकारी निर्देशक चण्डिका भट्टले निर्वाचनको समयमा पनि ग्यास आपूर्ति नियमित रहने स्पष्ट पार्दै उपभोक्तालाई ढुक्क रहन आग्रह गरेका छन्। कृत्रिम अभाव सिर्जना हुन नदिन भण्डारण र वितरण प्रणालीलाई चुस्त राखिएको निगमले जनाएको छ।

काठमाडौं, फागुन १३ । नेपाल राष्ट्र बैंक ले बुधबारका लागि विदेशी मुद्राको विनिमयदर निर्धारण गरेको छ। निर्धारणअनुसार अमेरिकी डलर एकको खरिददर १४५ रुपैयाँ २३ पैसा र बिक्रीदर १४५ रुपैयाँ ८३ पैसा तोकिएको छ।

युरोपियन युरो एकको खरिददर १७१ रुपैयाँ १० पैसा र बिक्रीदर १७१ रुपैयाँ ८० पैसा कायम गरिएको छ। युके पाउण्ड स्ट्रलिङ एकको खरिददर १९५ रुपैयाँ ९४ पैसा र बिक्रीदर १९६ रुपैयाँ ७५ पैसा तथा स्वीस फ्रयाङ्क एकको खरिददर १८७ रुपैयाँ ७२ पैसा र बिक्रीदर १८८ रुपैयाँ ५० पैसा तोकिएको छ।

अष्ट्रेलियन डलर एकको खरिददर १०२ रुपैयाँ ३९ पैसा र बिक्रीदर १०२ रुपैयाँ ८१ पैसा, क्यानेडियन डलर एकको खरिददर १०५ रुपैयाँ ९६ पैसा र बिक्रीदर १०६ रुपैयाँ ३९ पैसा तथा सिङ्गापुर डलर एकको खरिददर ११४ रुपैयाँ ६७ पैसा र बिक्रीदर ११५ रुपैयाँ १४ पैसा निर्धारण गरिएको छ।

जापानी येन १० को खरिददर ९ रुपैयाँ ३२ पैसा र बिक्रीदर ९ रुपैयाँ ३६ पैसा तोकिएको छ। चिनियाँ युआन एकको खरिददर २१ रुपैयाँ ११ पैसा र बिक्रीदर २१ रुपैयाँ २० पैसा, साउदी अरेबियन रियाल एकको खरिददर ३८ रुपैयाँ ७१ पैसा र बिक्रीदर ३८ रुपैयाँ ८७ पैसा तथा कतारी रियाल एकको खरिददर ३९ रुपैयाँ ७३ पैसा र बिक्रीदर ३९ रुपैयाँ ९० पैसा कायम भएको छ।

त्यसैगरी, थाइ भाट एकको खरिददर ४ रुपैयाँ ६८ पैसा र बिक्रीदर ४ रुपैयाँ ७० पैसा, युएई दिराम एकको खरिददर ३९ रुपैयाँ ५४ पैसा र बिक्रीदर ३९ रुपैयाँ ७० पैसा, मलेसियन रिङ्गेट एकको खरिददर ३७ रुपैयाँ ३० पैसा र बिक्रीदर ३७ रुपैयाँ ४५ पैसा तोकिएको छ। साउथ कोरियन वन १०० को खरिददर १० रुपैयाँ ०७ पैसा र बिक्रीदर १० रुपैयाँ ११ पैसा कायम गरिएको छ।

यसैगरी, स्वीडिस क्रोनर एकको खरिददर १६ रुपैयाँ ०१ पैसा र बिक्रीदर १६ रुपैयाँ ०८ पैसा तथा डेनिस क्रोनर एकको खरिददर २२ रुपैयाँ ९० पैसा र बिक्रीदर २३ रुपैयाँ निर्धारण गरिएको छ। हङकङ डलर एकको खरिददर १८ रुपैयाँ ५७ पैसा र बिक्रीदर १८ रुपैयाँ ६४ पैसा, कुवेती दिनार एकको खरिददर ४७५ रुपैयाँ ३८ पैसा र बिक्रीदर ४७७ रुपैयाँ ३५ पैसा, बहराइन दिनार एकको खरिददर ३८५ रुपैयाँ १७ पैसा र बिक्रीदर ३८६ रुपैयाँ ७७ पैसा तथा ओमानी रियाल एकको खरिददर ३७७ रुपैयाँ २५ पैसा र बिक्रीदर ३७८ रुपैयाँ ८० पैसा कायम गरिएको छ।

भारतीय रुपैयाँ १०० को खरिददर १६० रुपैयाँ र बिक्रीदर १६० रुपैयाँ १५ पैसा तोकिएको छ।

राष्ट्र बैंकले आवश्यकतानुसार विनिमयदर जुनसुकै समयमा संशोधन गर्न सकिने जनाएको छ।

सुर्खेत । फागुन २१ गते हुने प्रतिनिधि सभा सदस्य निर्वाचनलाई लक्षित गर्दै नेपाली कांग्रेस रुकुम पश्चिमले १४ बुँदे प्रतिज्ञा पत्र सार्वजनिक गरेको छ। मंगलबार खलङ्गास्थित पार्टी कार्यालयमा आयोजित पत्रकार सम्मेलनमार्फत प्रतिज्ञा पत्र सार्वजनिक गरिएको हो।

कार्यक्रममा कांग्रेस उम्मेदवार केसीले “रुकुमेलीको शिर झुक्न नदिने” प्रतिबद्धता व्यक्त गर्दै राजनीतिक शुद्धीकरण, सभ्य समाज निर्माण र मौलिक विकास नीतिलाई प्राथमिकतामा राख्ने बताए। प्रतिज्ञा पत्रमा सुशासन, प्रविधिमैत्री र आधुनिक शिक्षा, सर्वसुलभ स्वास्थ्य सेवा, मर्यादित कृषि र सम्मानित किसानको अवधारणा अघि सारिएको छ।

पर्यटन, जडीबुटी प्रशोधन, पूर्वाधार विकास, सुरक्षित सडक, बसाइँसराइ नियन्त्रण, बिजुली–पानी, स्वच्छ वातावरण, व्यावसायिक सिँचाइ प्रणाली, युवा सशक्तीकरण र करिअर काउन्सिलिङलाई विशेष प्राथमिकतामा राखिएको छ। राजनीतिलाई “फोहोरी खेल” भन्ने धारणा तोड्दै सार्वजनिक संस्थाको लोकतान्त्रीकरण गर्ने उल्लेख गरिएको छ।

प्रतिज्ञा पत्रमा एकीकृत शिक्षा नीति लागू गर्ने, विद्यालयमा एआई र डिजिटल लर्निङ प्रविधि भित्र्याउने, विगतका अनियमितताको निष्पक्ष छानबिन गर्ने र विकासलाई गरिबी निवारणसँग प्रत्यक्ष जोड्ने योजना समेटिएको छ। उम्मेदवार केसीले निर्वाचित भएको १०० दिनभित्र आफ्नो व्यक्तिगत लगानीमा काठमाडौँमा एक स्वास्थ्य सहजकर्ता नियुक्त गरी जिल्लाबाट जाने बिरामीलाई अस्पताल भर्ना तथा उपचारमा सहयोग गर्ने प्रतिबद्धता जनाएका छन्।

कृषि क्षेत्रमा किसानलाई उद्यमीको पहिचान दिलाउने, पेन्सन तथा सामाजिक सुरक्षाको व्यवस्था गर्ने र जिल्लालाई सुन्तला, आँप, केरा, किवी र कफी खेतीको विशिष्टीकृत पकेट क्षेत्र घोषणा गर्ने योजना अघि सारिएको छ। साथै स्यार्पू ताल, बुरालमष्ट मन्दिर लगायत धार्मिक तथा प्राकृतिक स्थललाई जोडेर पर्यटकीय सर्किट निर्माण गर्ने, जडीबुटी प्रशोधन गरी ‘रुकुमेली ब्रान्ड’ निर्यात गर्ने लक्ष्य पनि उल्लेख छ।

भेरी नदी मा निर्माणाधीन पुल शीघ्र सम्पन्न गर्न पहल गर्ने, केन्द्रीय प्रसारण लाइन वा सौर्य ऊर्जामार्फत सबै घरमा बिजुली पुर्‍याउने, ‘एक घर एक धारा’ कार्यक्रम लागू गर्ने तथा बाह्रै महिना सिँचाइ सुविधा उपलब्ध गराउने योजना प्रतिज्ञा पत्रमा समावेश छ।

आठबिसकोट, चौरजहारी, मुसिकोट, त्रिवेणी, सानीभेरी र बाँफिकोटका विभिन्न स्थानमा स्थानीय तथा वित्तीय संस्थाको साझेदारीमा आधुनिक ग्रामीण स्टोर स्थापना गरी स्थानीय उत्पादनको बजारीकरण र रोजगारी सिर्जना गर्ने प्रतिबद्धता पनि जनाइएको छ।

कार्यक्रममा निर्वाचन प्रचारप्रसार उपसमितिका संयोजक खड्कबहादुर डाँगीले “सही नीति निर्माणमा कांग्रेस प्रतिबद्ध रहेको” बताए। कार्यक्रममा पूर्वकेन्द्रीय सदस्य मानबहादुर नेपाली, पूर्व राज्यमन्त्री गोपाल जीजंग शाह, कर्णाली प्रदेश समिति सदस्य सीता ओली, जिल्ला सभापति प्रेम प्रकाश ओली, उपसभापति सुरतजंग मल्ल लगायत नेताहरूको उपस्थिति रहेको थियो।

सुर्खेत । बराहताल–२ स्थित गिरिघाटको बाढीपीडित शिविरमा चुनावी माहोल चर्किँदै गएको छ। कर्णाली राजमार्ग छेउमै फैलिएको अस्थायी बस्ती दिनहुँ उम्मेदवारका गाडी, प्रचारगीत र माइकिङको आवाजले गुञ्जायमान छ। एक समूह गएलगत्तै अर्को समूह मत माग्न आइपुग्छ—हातमा पर्चा, भाषणमा विकासका सपना र पुनर्वासका आश्वासनसहित।

तर १२ वर्षदेखि त्रिपालमुनि बस्दै आएका पीडितहरूका लागि यी दृश्य नयाँ होइनन्। २०७१ साल साउनमा भेरी नदी मा आएको भीषण बाढीपहिरोले सुर्खेतमा ११५ जनाको ज्यान लियो र १,०४५ परिवार विस्थापित भए। त्यही बाढीपछि गिरिघाटमा आएका करिब १५० परिवार अझै स्थायी पुनर्स्थापनाको प्रतीक्षामा छन्।

२०७४ र २०७९ का निर्वाचनमा जस्तै यसपटक पनि नेताहरू मत माग्न बस्तीमा पुगेका छन्। तर पहिलेका वाचा पूरा नभएकाले मतदातामा अविश्वास बढेको छ। “पहिला बस्तीका माग सम्बोधन गर्छौं भन्नेलाई मत दियौं, तर जितेर गएपछि फर्किएनन्,” स्थानीय सिर्जना बि.क. भन्छिन्, “मतदान हाम्रो अधिकार हो, तर कसलाई दिने भन्ने अन्योल छ।”

रगुबिर नेपाली भन्छन्, “१२ वर्षमा खोला पनि फर्कन्छ भन्छन्, तर हाम्रो अवस्था फेरिएन।” स्थानीय रुपलाल बि.क.का अनुसार रोजगारीको खोजीमा धेरै युवा भारत गएकाले मतदानमा पनि प्रभाव पर्ने देखिन्छ। “तीन चुनावमा भोट हालियो, अझै पुनर्स्थापनाको टुंगो छैन,” उनले गुनासो गरे।

बस्तीमा खानेपानी अभाव, बालबालिकाको पढाइका लागि टाढा जानुपर्ने बाध्यता र दैनिक जीविकोपार्जनको कठिनाइ अझै उस्तै छ। “दाउरा बेचेर, गिट्टी कुटेर, मजदुरी गरेर छाक टार्नुपर्छ,” प्रेमबहादुर नेपालीले बताए। युवाहरू बाहिरिएपछि बस्तीमा वृद्ध, महिला र बालबालिकामात्रै बाँकी छन्।

सुर्खेत क्षेत्र नम्बर २ बाट नारायण प्रसाद कोइराला (नेपाली कांग्रेस), कुलमणि देवकोटा (नेकपा एमाले), झकबहादुर मल्ल (नेकपा), रमेश कुमार सापकोटा (राष्ट्रिय स्वतन्त्र पार्टी) लगायत १७ जना उम्मेदवार चुनावी प्रतिस्पर्धामा छन्। तर गिरिघाटका बाढीपीडितका लागि यसपटकको मुख्य प्रश्न एउटै छ—यसपटकको आश्वासन साँच्चै पूरा हुन्छ कि फेरि पाँच वर्षका लागि मौनता छाउँछ?

काठमाडौं । हाल देशभर पश्चिमी न्यून चापीय प्रणालीको सामान्य प्रभाव देखिएको छ। यसका कारण बागमती र गण्डकी प्रदेशका पहाडी तथा हिमाली भू-भागका केही स्थानमा हल्का वर्षा र हिमपात भइरहेको छ। अन्य पहाडी र हिमाली क्षेत्रमा आंशिकदेखि सामान्य बदली रही बाँकी भू-भागमा मौसम मुख्यतया सफा रहेको छ।

आज दिउँसो तराईका केही स्थानमा बिहान हुस्सु लाग्ने सम्भावना रहेको छ। कोशी, गण्डकी र कर्णाली प्रदेशका पहाडी तथा हिमाली क्षेत्रमा सामान्य बदली रहनेछ भने अन्य पहाडी भू-भागमा आंशिक बदलीको अवस्था रहनेछ। तराई क्षेत्रमा भने मौसम प्रायः सफा रहने अनुमान छ।

कोशी, बागमती र गण्डकी प्रदेशका पहाडी तथा हिमाली भू-भागका थोरै स्थानमा मेघगर्जन र चट्याङसहित हल्का वर्षा तथा हिमपात हुन सक्ने सम्भावना छ। साथै, लुम्बिनी, कर्णाली र सुदूरपश्चिम प्रदेशका उच्च पहाडी तथा हिमाली क्षेत्रमा पनि एक-दुई स्थानमा यस्तै गतिविधि देखिन सक्छ।

आज राति तराईका थोरै स्थानमा तुँवालो लाग्नेछ। गण्डकी प्रदेशका पहाडी तथा हिमाली क्षेत्रसहित अन्य प्रदेशका हिमाली भू-भागमा सामान्य बदली रहनेछ भने पहाडी क्षेत्रमा आंशिक बदली कायम रहनेछ। कोशी, बागमती र गण्डकी प्रदेशका उच्च पहाडी तथा हिमाली भू-भागका एक-दुई स्थानमा हल्का वर्षा र हिमपातको सम्भावना रहेको मौसमविद्ले जनाएका छन्।

काठमाडौं। मेक्सिकोमा सुरक्षा कारबाहीमा मोस्ट वान्टेड अपराधी नेमेसियो ओगुएरा सर्भान्टेस, जसलाई “एल मेन्चो” भनेर चिनिन्छ, को मृत्यु भएपछि देशभर हिंसा फैलिएको छ। हिंसा नियन्त्रण गर्न हजारौं सैनिक खटाइएको छ।

मेक्सिकोका रक्षामन्त्री रिकार्डो ट्राभियाले सोमबार पश्चिमी मेक्सिकोमा थप २,५०० सेना परिचालन गरिएको जानकारी दिए। सरकारका अनुसार आइतबारदेखि हालसम्म कुल ९,५०० सैनिक तैनाथ गरिएका छन्।

एल मेन्चोको मृत्यु जालिस्को राज्यमा मेक्सिकन विशेष बलले पक्राउ गर्दा भएको थियो। उनको मृत्युपछि कम्तिमा २० राज्यहरूमा अशान्ति फैलिएको बताइएको छ।

जलिस्को न्यू जेनेरेसन कार्टेल मेक्सिकोको सबैभन्दा खतरनाक आपराधिक समूहमध्ये एक हो। यसको नेता एल मेन्चो देशकै सबैभन्दा डरलाग्दा अपराधी मानिन्थे।

स्थानीय र पर्यटकहरूले देशमा भइरहेको हिंसा र अशान्तिलाई “हृदयविदारक” भनेका छन्। रेकर्ड गरिएको भिडियोमा समुद्री तटीय पर्यटकीय गन्तव्य प्युर्टो भियापार्टा सहित विभिन्न शहरहरूमा जलेका सवारी साधन र आकाशमा उडिरहेको धुवाँ देखिएको छ।

विगत चार वर्षदेखि न्याशभिलमा बस्दै आएका जेरी जोन्सले बीबीसी न्यूजलाई बताए, “मैले यस्तो कहिल्यै देखेको थिइनँ।”

काठमाडौं। सोमबार अमेरिकाको पूर्वी तटमा ठूलो आँधी–हिमपात आएको छ, जसले कीर्तिमानी हिउँ पर्नुका साथै लाखौं मानिसहरूलाई प्रभावित पारेको छ र हजारौं उडान रद्द भएका छन्।

अमेरिकी राष्ट्रिय मौसम सेवा अनुसार रोड आइल्याण्ड र म्यासाचुसेट्सका केही भागमा करिब ३७ इन्च हिउँ परेको छ भने न्यूयोर्क शहरको सेन्ट्रल पार्कमा १९ इन्चभन्दा बढी हिउँ परेको रेकर्ड गरिएको छ।

एक राज्य एजेन्सीले न्युयोर्कमा यात्रा लगभग असम्भव भएको चेतावनी जारी गरेको छ। पूर्वी तटभरि ६ लाखभन्दा बढी घर र व्यवसायहरू बिजुलीबाट विच्छेद भएका छन्, जसमा न्यु जर्सी र म्यासाचुसेट्स सबैभन्दा बढी प्रभावित भएका छन्।

उडान ट्र्याकिङ वेबसाइट फ्लाइटअवेयरका अनुसार अमेरिका भित्र र अमेरिका आउने कुल ५,७०६ भन्दा बढी उडान रद्द भएका छन्।

बोस्टनको लोगान अन्तर्राष्ट्रिय विमानस्थलले सोमबार ९२ प्रतिशत प्रस्थान उडान रद्द गरेको छ। हिउँले मंगलबार पनि यस क्षेत्रमा प्रभाव पार्ने अपेक्षा गरिएको छ। संयुक्त राज्य अमेरिका जाने र आउने २,००० भन्दा बढी उडान रद्द हुने सम्भावना छ, जसमा बोस्टन र न्यूयोर्क विमानस्थलहरू सबैभन्दा बढी प्रभावित हुनेछन्।

काठमाडौं। भारतको झारखण्ड राज्यअन्तर्गत सिमरिया नजिक एयर एम्बुलेन्स दुर्घटना हुँदा ७ जनाको मृत्यु भएको छ। सोमबार रेडबर्ड एयरवेजको एयर एम्बुलेन्स दुर्घटनाग्रस्त भएको जानकारी सशस्त्र सीमा बल (एसएसबी) का दोस्रो कमाण्डर रमेश कुमारले एएनआईसँग दिएका हुन्।

सोमबार साँझ ७:११ बजे राँची विमानस्थलबाट बिरामी बोकेर दिल्लीका लागि उडेको बीचक्राफ्ट सी–९० विमान करिब ७:३० बजेदेखि सम्पर्कविहीन भएको थियो। पछि चत्रा जिल्लाको कासारिया पञ्चायत क्षेत्रमा विमान दुर्घटनाग्रस्त अवस्थामा फेला परेको हो। उक्त विमान रेडबर्ड एयरवेजको एयर एम्बुलेन्स सेवा अन्तर्गत सञ्चालनमा रहेको थियो।

दुर्घटनामा क्याप्टेन विवेक विकास भगत, क्याप्टेन सवराजदीप सिंह, सञ्जय कुमार, डा. विकास कुमार गुप्ता, सचिन कुमार मिश्रा, अर्चना देवी र धुरु कुमारको मृत्यु भएको पुष्टि गरिएको छ। सबै शव फेला पारेर पोस्टमार्टमका लागि अस्पताल पठाइएको छ।

यसैबीच, भारतीय उड्डयन परिषद्ले घटनाप्रति गहिरो दुःख व्यक्त गर्दै मृतकका परिवारप्रति समवेदना जनाएको छ। परिषद्का अध्यक्ष डा. नितिन जाधवले विज्ञप्ति जारी गर्दै सिमरिया नजिक २३ फेब्रुअरी २०२६ मा भएको दुर्घटनाप्रति गहिरो चिन्ता व्यक्त गरेका छन्।

विमान दुर्घटनाको कारण पत्ता लगाउन एयरक्राफ्ट एक्सिडेन्ट इन्भेस्टिगेशन ब्युरो (एएआईबी) को टोली घटनास्थलमा पुगेर अनुसन्धान सुरु गर्ने बताइएको छ।

एसएसबीका अधिकारी रमेश कुमारले एएनआईसँग कुरा गर्दै दुर्घटनास्थल दुर्गम र घना जंगल क्षेत्रमा रहेको बताए। उनका अनुसार घटनास्थलसम्म पुग्न करिब दुई किलोमिटर सडक नभएको र राति उद्धार कार्य अत्यन्तै चुनौतीपूर्ण बनेको थियो। मृतकका शव मुख्य सडकसम्म पुर्‍याउन समेत कठिनाइ भएको उनले जानकारी दिएका छन्।