काठमाडौँ: हाल देशमा पश्चिमी वायु र स्थानीय वायुको आंशिक प्रभाव रहेको बताउँदै जल तथा मौसम विज्ञान विभाग मौसम पूर्वानुमान महाशाखाले गण्डकी, कर्णाली र सुदूरपश्चिम प्रदेशका पहाडी भागमा अहिले आंशिक बदली भएको तथा बाँकी क्षेत्रमा मौसम सफा रहेको जनाएको छ ।

महाशाखाका अनुसार आज दिउँसो देशका पहाडी भागमा आंशिक बदली रही बाँकी भूभागमा मौसम सफा रहने छ । कोशी, गण्डकी, कर्णाली र सुदूरपश्चिम प्रदेशका पहाडी भागका एक–दुई स्थानमा मेघगर्जन र चट्याङसहित हल्का वर्षाको सम्भावना छ । साथै मुलुकका उच्च पहाडी तथा हिमाली क्षेत्रका एक–दुई स्थानमा हल्का हिमपातको सम्भावना छ । लुम्बिनी, मधेस र कोशी प्रदेशका तराईका केही स्थानमा हुरीबतासको सम्भावना छ ।

त्यसैगरी, आज राति कोशी, गण्डकी र कर्णाली प्रदेशका पहाडी भागमा आंशिक बदली हुने तथा भागमा मौसम सफा रहने छ । गण्डकी प्रदेशका पहाडी भूभागका एक–दुई स्थानमा मेघगर्जन र चट्याङसहित हल्का वर्षाको सम्भावना रहेको छ । गण्डकी प्रदेशका उच्च पहाडी तथा हिमाली भागका एक–दुई स्थानमा हल्का हिमपातको सम्भावना छ । लुम्बिनी, मधेश र कोशी प्रदेशका तराईका केही स्थानमा हुरीबतासको सम्भावना छ ।

आगामी २४ घण्टामा कोशी, गण्डकी, कर्णाली र सुदूरपश्चिम प्रदेशका पहाडी भागका एक–दुई स्थानमा मेघगर्जन र चट्याङसहित हल्का वर्षाको सम्भावना छ । साथै मुलुकका उच्च पहाडी तथा हिमाली क्षेत्रका एक–दुई स्थानमा हल्का हिमपातको सम्भावना छ । लुम्बिनी, मधेस र कोशी प्रदेशका तराईका केही स्थानमा हुरीबतासको सम्भावना रहेको जनाउँदै महाशाखाले त्यस क्षेत्रमा दैनिक जनजीवनलगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्ने भएकाले सतर्कता अपनाउन अनुरोध गरेको छ ।

दमौली (तनहुँ): व्यास नगरपालिकास्थित बुल्दीखोला र भानु नगरपालिका तथा बन्दीपुर गाउँपालिकाको सिमानास्थित चुँदीखोलामा बृहत सरसफाइ अभियानअन्तर्गत धेरै फोहर सङ्कलन गर्नेलाई नगद पुरस्कारको प्रदान गरिने भएको छ ।

व्यास नगरपालिका–४ दमौलीका अभियान्ता सुदीप गफ्फारको सक्रियतामा बुल्दी–चुँदीखोलामा बृहत् सरसफाई अभियान गर्न लागिएको हो । उहाँका अनुसार धेरै फोहर सङ्कलन गरी प्रहिलो हुनेलाई रु १० हजार र दोस्रो हुनेलाई रु पाँच हजार पुरस्कार प्रदान गरिनेछ ।

बुल्दी र चुँदीखोला दिनप्रतिदिन प्रदूषित बन्दै गएकाले खोला स्वच्छ र सफा राख्ने उद्देश्यले वृहत् सरसफाइ अभियान सञ्चालन गर्न लागिएको गफ्फारले बताउनुभयो । उहाँले भन्नुभयो, “भावी पुस्ताका लागि दुवै खोला संरक्षण गर्नुपर्ने अवस्था आएको छ । दुवै खोलाको अवस्था देखेर सरसफाइ अभियान सञ्चालन गर्ने जमर्को गरेको छु ।”

बुल्दीखोलामा वैशाख २९ गते र चुँदीखोलामा आगामी जेठ ५ गते सरसफाइ अभियान सञ्चालन गरिने उहाँले जानकारी दिनुभयो । उहाँले भन्नुभयो, “यसलाई बचाउन सकिए भने भविष्यमा बुल्दीखोला र चुँदीखोलाको अस्तित्व सङ्कटमा पर्नेछ ।”

अभियानका लागि हरेक टोल र क्लबसँग समन्वय गरिएको बताउँदै उहाँले एउटा टोलीमा १५ जना सहभागी हुनसक्ने जानकारी दिनुभयो । उहाँले भन्नुभयो, “सरसफाइ अभियानमा टोल, विद्यालय, क्याम्पस, युवा क्लबसँग सहकार्य गर्नेछु । सरसफाइ अभियानलाई मनोरञ्जनात्मक र प्रतिस्पर्धात्मक बनाउने प्रयास गरिएको छ ।”

बुल्दी र चुँदीखोला सरसफाइ अभियानलाई निरन्तरता दिने उहाँको भनाइ छ । प्रतियोगितात्मक रुपमा वर्षको एकपटक मात्रै अभियान सञ्चालन गरिने र त्यसपछिका हरेक महिनाको अन्तिम शनिबार नियमित रुपमा सरसफाइ अभियान हुने उहाँले जानकारी दिनुभयो । उहाँले भन्नुभयो, “जबसम्म बुल्दी र चुँदीखोला कञ्चन हुँदैन, तबसम्म सरसफाइ अभियान जारी रहनेछ ।”

बुल्दीखोला धार्मिक महत्वसँग जोडिएको उल्लेख गर्दै उहाँले भन्नुभयो, “महर्षि वेदव्यासले बुल्दीखोलामा हात धोएको धार्मिक महत्व छ । त्यसकारण पनि यसको संरक्षण गर्नुपर्छ । यहाँका ढुङ्गाढुङ्गामा देवताको बास छ ।”

भरतपुर: चितवनमा लागूऔषध दुर्व्यसन नियन्त्रणका लागि तीन महिने अभियान सुरूगरिएको छ । भरतपुर महानगरपालिका प्रमुख रेनु दाहालले आज अभियाको शुभारम्भ गर्दै सभ्य, सुन्दर र सुसंस्कृत महानगर निर्माणका लागि लागूऔषध नियन्त्रण गर्न जरूरी रहेको र त्यसका लागि उहाँले सडक मानवमुक्त पहिलो महानगर बनाइएजस्तै लागूऔषध नियन्त्रणमा पनि देशमै उदाहरणीय महानगर बनाउने गरी आफूले कार्य गरिरहेको समेत बताउनुभयो ।

महानगर उपप्रमुख चित्रसेन अधिकारीले पनि विकृति विसङ्गतिरहित समाजको निर्माणका लागि युवावर्गलाई लागूऔषधको दलदलबाट बाहिर ल्याउन अभियान उपयोगी हुने विश्वास व्यक्त गर्नुभयो ।

प्रमुख जिल्ला अधिकारी भूपेन्द्र थापाले सातवटै स्थानीय तहमा अभियान सञ्चालनका लागि सहायक प्रमुख जिल्ला अधिकारी खिमानन्द भुसालको संयोजकत्वमा समिति गठन गरिएको बताउनुभयो । अभियानका क्रममा सबै स्थानीय तहका टोलटोलमा सरोकारवालासँगको समन्वयमा सचेतनामूलक कार्यक्रम गरिने उहाँले जानकारी दिनुभयो ।

कार्यक्रममा चितवनका प्रहरी प्रमुख प्रहरी उपरीक्षक भावेश रिमालले अपराधमुक्त समाज निर्माणका लागि लागूऔषध नियन्त्रणमा सबैको सहयोग अपरिहार्य रहेको धारणा राख्नुभयो।

काठमाडौँ : विश्वप्रसिद्ध किक बक्सर अबिरल घिमिरे ‘हिट ५३ प्रोफेसनल किक बक्सिङ’को उपाधिमाथि चौथो पटक आफ्नो वर्चश्व कायम गर्न सफल भएका छन् ।

‘हिट प्रोफेसनल किक बक्सिङ’को १४ वटा अन्तर्राष्ट्रिय प्रतियोगितामा अपराजित हुने उनी विश्वको पहिलो खेलाडी हुन् भने चौथोपटकसम्म लगातार आफ्नो बेल्ट रक्षा गर्ने पनि उनी पहिलो अन्तर्राष्ट्रिय खेलाडी हुन्।

जापानका प्रतिस्पर्धी हिरायामा जिनलाई नकआउट गर्दै उनले आफ्नो उपाधि रक्षा गर्न सफल हुनुभएको हो । जापानको नागोया सहरमा सिमराडोजोद्वारा आज आयोजित प्रतिस्पर्धामा २४ वर्षीय व्यवसायिक किक बक्सर घिमिरेले प्रतिस्पर्धीलाई चौथो राउण्डमा नकआउट गर्दै नयाँ कीर्तिमान कायम गरेका हुन् । ‘हिमालय चितुवा’का रूपमा परिचित घिमिरेले जापानको विश्वप्रसिद्ध क्लब सिमुरा डोजोबाट खेल्दै आएका छन् ।

प्रतियोगिताको मुख्य आकर्षण रूपमा रहेको अन्तिम खेल (मेन इभेन्ट म्याच)मा युवा बक्सर घिमिरेले तीन मिनेटको पाँच राउण्डको प्रतियोगितामा चौथो राउण्डको एक मिनेट ४० सेकेण्ड अर्थात् १० मिनेट ४० सेकण्डमा प्रतिस्पर्धी बक्सर जिनलाई रिङमा ढालेर ‘प्रोफेसनल किक बक्सिङ हिट ५३ च्याम्पियनसिप’मा टाइटल बेल्टको उपाधि रक्षा गरेका हुन् ।

अहिलेसम्म व्यावसायिक किक बक्सिङ हिट प्रतियोगिताको १४ खेलमा अपराजित यात्रा कायम गर्दै जित हासिल गर्ने क्रममा हिमचितुवाले चार पटक टाइटल म्याचको उपाधि (बेल्ट) रक्षा गर्दै ‘मिडल वेट’को रेकर्डसमेत कायम राख्न सफल भएका छन् ।

उनले विश्वप्रसिद्ध के वान व्यावसायिक किक बक्सिङ प्रतियोगितामा समेत खेल्दै दुईवटा इभेन्ट आफ्नो पक्षमा पारी प्रतिस्पर्धीलाई नकआउट गर्न सफल भएका थिए । हालसम्म जापान, दक्षिण कोरिया, ब्राजिल, बोलिभिया, नेदरल्याण्ड, थाइल्याण्डलगायतका विश्वप्रसिद्ध किक बक्सरलाई पराजित गरिसकेका युवा पुस्ताका चर्चित खेलाडी घिमिरेले अन्तर्राष्ट्रिय प्रतियोगितामा नेपालको झण्डा फहराउँदै छुट्टै पहिचान बनाउन सफल भएका छन् ।

जापानको नागोयामा सहरमा लगातार आफ्ना पिता पूर्वअन्तर्राष्ट्रिय किक बक्सर तथा फुलकन्ट्याक कराते खेलाडी देव घिमिरेको विशेष प्रशिक्षणमा रहँदै आएका हिमचितुवा सिमुरा डोजोबाट प्रशिक्षण लिँदै आफ्नो खेल जीवनलाई अगाडि बढाउँदै आएका छन्।

कराते खेलाडी देव सन् २००४ मा दक्षिण कोरियाको सोलमा सम्पन्न ‘के वान प्राफेसलन किक बक्सिङ प्रतियोगिता’मा सहभागी हुने पहिलो दक्षिण एसियाली खेलाडी हुन् । चन्द्रागिरि नगरपालिका–१२ गुर्जुधारा बलम्बूका बासिन्दा उनको परिवार हाल जापानको नागोया सहरमा बसोबास गर्दै आएको छ।

काठमाडौं । भारतको छत्तीसगढको राजधानी रायपुरमा सन् २०२० मा कोरोनाबाट मृत्यु भएका तीन जनाको शवको एक हजार दिनपछि दाह संस्कार गरिएको छ ।

राजधानीको बाबा साहेब भीमराव अम्बेडकर अस्पतालमा बेवारिसे अवस्थामा यी तीनै शव कंकालमा परिणत भएका थिए ।

प्रशासनिक अधिकारीहरूका अनुसार गत महिना रायपुरको एउटा अखबारले राज्यको सबैभन्दा ठूलो सरकारी अस्पतालमा हजार दिनभन्दा बढी समयदेखि पीपीई किटमा दावी नगरिएका तीन जनाको शव राखेको समाचार प्रकाशित गरेको थियो।

ती शव महिला वा पुरुषका हुन् भन्ने पनि थाहा हुन सकेको छैन । यो खबरपछि अस्पताल व्यवस्थापनले पनि यस विषयमा ध्यानाकर्षण गरायो ।

कोरोनाका कारण मृत्यु भएकाले यी शवको अन्तिम संस्कारका लागि म्याजिस्ट्रेटको अनुमति लिनुपर्ने खुलासा भएको छ । यसका लागि अस्पताल व्यवस्थापनले म्याजिस्ट्रेटलाई पत्र पनि लेखेको थियो तर अनुमति पाएको थिएन ।

त्यसपछि यी शवहरू पीपीई किटहरूमा राखिएका थिए र अहिले यहाँ सडिरहेका थिए। समाचार बाहिर आएपछि पीपीई किट खोल्दा त्यसभित्र पर्चामा मृतकको जानकारी लेखिएको थियो ।

उक्त पर्चाबाट मृत्यु हुनेमा एक महिला रहेको खुलेको छ । यसपछि परिवारका सदस्यहरुको जानकारी संकलन गरी उनीहरुलाई जानकारी गराइएको थियो ।

बिहीबार परिवारको सहमतिमा तीनै जनाको शवलाई कोरोनासँग सम्बन्धित प्रोटोकल अनुसार स्थानीय शवदाह स्थलमा दाहसंस्कार गरिएको थियो ।

न्यू जर्सी, अमेरिका: अमेरिकामा एउटा शल्यक्रियाको सफलतापछि चिकित्सा क्षेत्रमा कोसेढुङ्गा साबित हुन सक्ने अनुमान गरिएको छ। अमेरिकाको न्यू जर्सीमा सर्जनहरूले एक महिलाको शरीरमा पहिलो पटक कम्बाइन्ड मुटुको पम्प र सुँगुरको मृगौला प्रत्यारोपण गरेका छन्।

यो शल्यक्रिया एनवाइयु लेङ्गोन न्यू जर्सीमा गरिएको थियो। न्यू जर्सी निवासी ५४ वर्षीया लिसा पिसानो हृदयघात र अन्तिम चरणको मृगौला रोगबाट पीडित थिइन्। उनलाई नियमित डायलासिस गर्नुपर्ने थियो । लामो समयदेखि लिसाले मुटु र मृगौला प्रत्यारोपणको प्रयास गरिरहेकी थिइन् तर अमेरिकामा अंग दाताको अभावका कारण उनले अंग पाउन सकेकी थिइनन् ।

शल्यक्रियापछि लिसाले भनिन्, ‘जब मसँग पहिलो पटक यो शल्यक्रियाको बारेमा कुरा भएको थियो, तब मैले पक्कै पनि यो शल्यक्रिया गर्न चाहन्छु भनेकी थिएँ । शल्यक्रियापछि लिसाले आईसीयूमा रहेको आफ्नो ओछ्यानबाट मिडियासँग कुरा गरेकी हुन् ।’

लिसाले सबै प्रकारको उपचारपछि आफू थकित र हारेको बताइन् । त्यसैले जब डाक्टरहरूले उनलाई सुँगुरको मृगौला प्रत्यारोपणको बारेमा भने उनले खुसीसाथ स्वीकार गरिन् । लिसाले थप भनिन्, ‘आशा छ अब मैले आफ्ना नातिनातिनाहरूसँग समय बिताउने र उनीहरूसँग खेल्ने मौका पाउनेछु।’

अमेरिकामा अंग दाताको संख्या भन्दा अंग प्राप्त गर्नेहरूको संख्या धेरै छ। अनुसार अमेरिकामा हरेक दिन १७ जनाको मृत्यु अंगको पर्खाइमा हुने गरेको छ । यहाँ मिर्गौलाको माग सबैभन्दा बढी र आपूर्ति सबैभन्दा कम छ । अंग खरिद तथा प्रत्यारोपण सञ्जालका अनुसार सन् २०२३ मा करिब २७ हजार मिर्गौला प्रत्यारोपण भए पनि ती अंगका लागि ८९ हजार व्यक्ति पर्खाइमा थिए ।

जानकारीका अनुसार गत अप्रिल ४ मा लिसाको शरीरमा मुटुको पम्प प्रत्यारोपण गरिएको थियो भने अप्रिल १२ मा सुँगुरको थाइमस ग्रन्थीसहित जीन एडिट गरिएको सुँगुरको मिर्गौला प्रत्यारोपण गरिएको थियो । संसारमा पहिलो पटक मार्च महिनामा म्यासाचुसेट्स जनरल अस्पतालमा ६२ वर्षीय रिक स्लेम्यानलाई जीवित व्यक्तिमा सुँगुरको मृगौला प्रत्यारोपण गरिएको थियो। जो यसै महिना अस्पतालबाट डिस्चार्ज भएर घर पुगेका छन् । तर, अन्य दुई जनालाई सुँगुरको मृगौला दिइँदा केही हप्तामै तिनीहरूको मृत्यु भयो।

पर्सा। पूर्वपरराष्ट्रमन्त्री तथा नेपाली कांग्रेसका केन्द्रीय सदस्य एनपी साउदले नेपाली कांग्रेस र नेपाल कम्युनिष्ट पार्टी (एमाले) मिलेर तत्काल सरकार बन्ने अवस्था नरहेको बताएका छन्।

नेपाल प्रेस युनियन पर्साद्वारा आज वीरगञ्जमा आयोजित पत्रकार सम्मेलनमा नेता साउदले प्रमुख राजनीतिक दलहरुबीच प्रशासनिक सत्तासाझेदारी र सजिलोपनकै लागि सरकार गठन गर्न नहुने धारणा व्यक्त गर्दै कांग्रेस र एमाले मिलेर सरकार बन्न सक्ने अवस्था नरहेको बताएका हुन्।

“प्रशासनिक सत्ता साझेदारी वा सहजताका लागि मात्रै प्रमुख राजनीतिक दल मिलेर सरकार बन्न सक्दैन,” उनले भने, “कुनै प्रमुख राजनीतिक दल मिलेर बन्ने सरकारले राष्ट्रिय मुद्दालाई सम्बोधन गर्नुपर्ने हुन्छ । नेपालको सन्दर्भमा पनि संवैधानिक मुद्दाबारे जसलाई दुई वटै प्रमुख पार्टीको सरकार बनिसकेपछि संविधान संशोधनको प्रक्रियाबाट टुङ्ग्याउनुपर्ने मुद्दा छन् भने ती मुद्दा सम्बोधन गर्र्ने सन्दर्भमा दुवै पार्टीबीच पारदर्शी सहमति भयो भने मात्रै सत्तासाझेदारी गर्न सकिन्छ ।

उनले अगाडि थपे, “त्योभन्दा बाहेक प्रशासनिक सजिलोपनका लागि र सत्ता साझेदारी जनाउने कुराका लागि मात्रै प्रमुख राजनीतिक पार्टी नै सरकारमा जाने क्रम मुलुकमा चल्यो भने जनताको नजरमा लोकतन्त्रको मूल्य घट्न सक्छ।”

नेता साउदले हिजोसम्म आउँदा परम्पर विरोधी भएर चुनावमा प्रतिस्पर्धा गर्नेले कुर्सी वा सत्ताको स्वाद लिनकै लागि आफ्नो आस्था, विश्वास र फरक दृष्टिकोणलाई एकातिर थाती राखेर सरकार गठन गर्नेतर्फ मात्रै अघि बढ्नु लोकतन्त्रका लागि राम्रो नहुने बताए।

“हामीले मुलुकभित्र रहेका अस्थिरता मच्चाउन खोज्ने शक्तिलाई पनि लोकतन्त्रको परिधिभित्र ल्याउने जुन प्रयास गरिरहेका छौँ। यदि प्रमुख राजनीतिक पार्टीबीच नै सत्ता र शक्तिका लागि गठबन्धन भयो भने यसको फाइदा लिएर अस्थिरतामा खेल्न खोज्नेले राजनीतिक लाभ वा फाइदा उठाउन सक्नेछन्,” उनले भने।

“नेपाली कांग्रेसले एमालेसँग गठबन्धन गरेर सरकारमा जानै परेको खण्डमा पार्टीको केन्द्रीय समितिमा पर्याप्त छलफल गरेर मात्रै अघि बढ्नेछ। जहाँसम्म विभिन्न समीकरणका कुराहरु छन्। नेपाली कांग्रेसले कसैलाई निषेध गर्ने उद्देश्यले कुनै पनि समीकरण गर्ने छैन । हामी जुनसुकै कुरा पनि परिपक्व भएपछि मात्रै त्यसको बाटोमा अघि बढ्नेछौँ ।”

कांग्रेसले जनस्तर र संसदीय मोर्चा दुवैमा प्रभावकारी ढङ्गले रचनात्मक प्रतिपक्षको भूमिका निर्वाह गर्ने नेता साउदको भनाइ थियो। कांग्रेसका केही कमीकमजोरी भए त्यसलाई सच्याएर अगाडि बढ्न सकिने उनले बताए।

“वर्तमान परिप्रेक्ष्यमा कांग्रेसले प्रतिपक्षको भूमिका सशक्त र प्रभावकारी ढङ्गले निभाउछ,” उनले भने, “रचनात्मक प्रतिपक्षका रुपमा रचनात्मक काम गर्न हामी चाहान्छौँ।”

पूर्वमन्त्री साउदले कांग्रेसले संसद्भित्रबाट सरकारमा भएको विरोधाभाष, विसङ्गति र सरकारले दायित्व निर्वाह गर्नेमा चुकेको विषयमा संवेदनशील भएर कांग्रेसले संसद् र जनस्तर दुवैमा आवाज उठाउँदै आएको बताए।

कांग्रेस एउटा जिम्मेवार लोकतान्त्रिक पार्टी भएकाले लोकतन्त्रलाई जोगाउनका लागि अविछिन्न रुपमा कटिबद्ध हुँदै अघि बढ्ने उनले प्रतिबद्धता समेत व्यक्त गरे।

काठमाडौं। नेपालले वेस्ट इन्डिज ‘ए’ माथि शानदार जित हासिल गरेको छ । वेस्ट इन्डिज ‘ए’ लाई ४ विकेटले पराजित गरी नेपालले शानदार जित हात पारेको हो ।

वेस्ट इन्डिजले दिएको २०५ रनको लक्ष्य पच्छ्याएको नेपालले १९.३ ओभरमा ६ विकेट गुमाएर लक्ष्य पूरा गरेको थियो ।

नेपालको जितमा कप्तान रोहित पौडेलले शानदार ११२ रनको शतकीय पारी खेलेका थिए । उनले ५४ बलमा १० चौका र ६ छक्का प्रहार गरेका थिए ।

यसअघि टस हरेर पहिला ब्याटिंग गरेको वेस्ट इन्डिज ‘ए’ ले २० ओभरमा ५ विकेट गुमाउदै २०४ रन बनाएको थियो ।

वेस्ट इन्डिजका लागि कप्तान रोस्टन चेजले सर्बाधिक ७४ रन बनाए भने एलिक अथानाजेले ४७ रन बनाए । त्यस्तै किची कार्टीले ३८, आन्द्रे फ्लेचरले १३ र काडिम आलेयनेले १४ रन बनाएका थिए ।

त्यसैगरी नेपालका बलरकमल सिंह ऐरी, दिपेन्द्र सिंह ऐरी, रोहित पौडेल र अविनाश बोहोराले एक एक विकेट लिएका थिए ।

यो जितपछि नेपाल ५ खेलको सिरिजमा १-० ले अगाडी भएको छ । अब सिरिजको दोस्रो खेल आइतबार हुने छ भने तेस्रो खेल मे १ मा चौथो खेल मे २ मा र पाचौं खेल मे ४ मा हुने छ ।