काठमाडौँ । निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले बिहीबार हुने प्रतिनिधि सभा सदस्य निर्वाचनमा निर्धक्क र उत्साहका साथ मतदान गर्न सम्पूर्ण मतदातालाई आह्वान गरेका छन्।
निर्वाचनको सञ्चालन तथा व्यवस्थापनसम्बन्धी सम्पूर्ण तयारी पूरा भइसकेको जानकारी दिँदै उनले आफ्नो मताधिकार अनिवार्य रूपमा प्रयोग गर्न आग्रह गरेका हुन्। गत भदौ २३ र २४ गते भएको नवयुवाहरूको विद्रोहपछि विकसित विषम परिस्थितिमा यो आकस्मिक निर्वाचन हुन गइरहेको उनले उल्लेख गरे।
कार्यवाहक प्रमुख आयुक्त भण्डारीले निर्वाचनले नेपालको संविधान तथा संघीय लोकतान्त्रिक व्यवस्थालाई अझ सुदृढ र परिपक्व बनाउने विश्वास व्यक्त गरे। स्वच्छ, स्वतन्त्र, निष्पक्ष र भयमुक्त वातावरणमा निर्वाचन सम्पन्न गराउन आयोग पूर्ण रूपमा तयार रहेको उनले बताए। कुनै पनि अवाञ्छित गतिविधिबाट निर्वाचन प्रभावित हुन नदिई आस्था, विचार, सिद्धान्त र निष्ठामा आधारित वातावरण निर्माण गर्न आयोग दृढ रहेको उनको भनाइ छ।
मतदान नागरिकको नैसर्गिक अधिकार मात्र नभई कर्तव्यसमेत भएको उल्लेख गर्दै उनले लोकतान्त्रिक व्यवस्थामा निर्वाचन सबैभन्दा ठूलो राष्ट्रिय अभ्यास भएको बताए। मतदाताको सहभागितालाई राजनीतिक सचेतना, सामाजिक जिम्मेवारी र नागरिक संलग्नताको उच्चतम अभिव्यक्तिका रूपमा लिइने उनले बताए। सुसूचित मतदानले शासनप्रति नागरिकको अपनत्व र विश्वास अझ सुदृढ बनाउने उनको धारणा छ।
निर्वाचन व्यवस्थापनमा राजनीतिक दल, उम्मेदवार, नागरिक समाज, सञ्चारकर्मी तथा आमसञ्चारमाध्यमलगायत सबै सरोकारवालाबाट प्राप्त सहयोगले आयोगलाई आफ्नो दायित्व प्रभावकारी रूपमा निर्वाह गर्न ऊर्जा र हौसला मिलेको उनले उल्लेख गरे।
प्रतिनिधिमूलक शासन व्यवस्थाको आधार नै निर्वाचन भएको उल्लेख गर्दै आफूले रोजेको प्रतिनिधिमार्फत शासन सञ्चालन गर्न पाउने जनताको अधिकारलाई वैधता दिने प्रमुख माध्यम निर्वाचन नै भएकाले बिहीबार आ–आफ्नो मतदान केन्द्रमा उपस्थित भई निर्धक्कका साथ मतदान गर्न उनले पुनः आग्रह गरे।
