काठमाडौं । फिफा विश्वकप २०२६ अन्तर्गत बुधबार हुने खेलहरूमा फ्रान्स–सेनेगल, इराक–नर्वे र अर्जेन्टिना–अल्जेरियाबीचका प्रतिस्पर्धाले फुटबल समर्थकहरूको विशेष ध्यान तानेका छन्।

आजको पहिलो खेलमा राति १२ः४५ बजे फ्रान्स र सेनेगल आमनेसामने हुनेछन्। विश्व फुटबलका बलिया टोलीमध्ये एक फ्रान्ससँग किलियन एम्बाप्पे, ओस्मान डेम्बेले र माइकल ओलिसे जस्ता स्टार खेलाडी छन्। उता सेनेगलसँग साडियो माने, इस्माइला सार र इलिमान एनदियाएजस्ता अनुभवी खेलाडी रहेकाले खेल प्रतिस्पर्धात्मक हुने अपेक्षा गरिएको छ। सन् २००२ को विश्वकपमा सेनेगलले फ्रान्सलाई हराएको इतिहासले पनि यस खेललाई थप रोचक बनाएको छ।

दोस्रो खेल बिहान ३ः४५ बजे इराक र नर्वेबीच हुनेछ। चार दशकपछि विश्वकपमा फर्किएको इराक सफल सुरुआतको खोजीमा छ भने नर्वे पनि १९९८ पछि पहिलो पटक विश्वकप खेल्दैछ। नर्वेका स्टार फरवार्ड इर्लिङ हालान्ड र कप्तान मार्टिन ओडेगार्डमाथि समर्थकहरूको विशेष नजर रहनेछ।

त्यसपछि बिहान ६ः४५ बजे तीन पटकको विश्व विजेता अर्जेन्टिनाले अल्जेरियाको सामना गर्नेछ। उपाधि रक्षा अभियानमा रहेको अर्जेन्टिना लाउतारो मार्टिनेज, एन्जो फर्नान्डेज र क्रिस्टियन रोमेरोको साथमा मैदान उत्रिनेछ। अल्जेरियाले भने कप्तान रियाद माहरेजको नेतृत्वमा अर्जेन्टिनालाई चुनौती दिने तयारी गरेको छ।

समूह चरणको सुरुआतमै हुने यी खेलहरूले समूहको अंकतालिकामा महत्वपूर्ण प्रभाव पार्ने अपेक्षा गरिएको छ। कागजमा फ्रान्स, नर्वे र अर्जेन्टिना बलिया देखिए पनि सेनेगल, इराक र अल्जेरियाले अप्रत्याशित नतिजा निकाल्ने क्षमता राखेकाले आजका सबै खेल रोमाञ्चक हुने अनुमान गरिएको छ।

काठमाडौं । इरानको राष्ट्रिय फुटबल टोलीका मुख्य प्रशिक्षक अमिर घालेनोईले आफ्नो टोलीले फिफा विश्वकप २०२६ का क्रममा असामान्य प्रशासनिक र यात्रा चुनौतीहरू सामना गरिरहेको बताएका छन्।

बीबीसी पर्सियन सेवाका अनुसार न्युजिल्याण्डविरुद्धको खेलपछि आयोजित पत्रकार सम्मेलनमा घालेनोईले इरानी टोलीलाई अमेरिकामा सीमित समय मात्र बस्न दिइएको विषयमा असन्तुष्टि व्यक्त गरेका थिए।

“उनीहरूले हामीलाई दुई हप्ताअघि नै वातावरणसँग घुलमिल हुन आउन दिएनन्, र अहिले खेलपछि आराम गर्न दिनुको सट्टा तुरुन्तै फर्कन भनिएको छ,” उनले भने।

इरानी टोलीलाई अमेरिका छोड्नुपरेको विषयमा सोधिएको प्रश्नको जवाफ दिँदै घालेनोईले भने, “इरानी टोली सम्भवतः विश्वकपको इतिहासमै सबैभन्दा बढी कठिनाइ भोगिरहेको टोली हो।”

उनले खेलका क्रममा टोलीलाई समर्थन गर्न स्टेडियममा उपस्थित इरानी समर्थकहरूलाई धन्यवाद दिएका थिए। साथै, मेक्सिकोको तिजुआनामा बसाइँका क्रममा आत्मीयता र सहयोग गरेको भन्दै मेक्सिकन जनताप्रति पनि आभार व्यक्त गरे।

विश्वकपको समूह ‘जी’ अन्तर्गत इरान र न्युजिल्याण्डबीच भएको खेल २–२ को बराबरीमा सकिएको थियो। खेलमा न्युजिल्याण्डले दुई पटक अग्रता लिए पनि इरानले दुवै पटक पुनरागमन गर्दै एक–एक अंक बाँड्न सफल भएको थियो।

इरानका लागि रामिन रेजाइयान र मोहम्मद मोहेब्बीले एक–एक गोल गरेका थिए। बराबरीसँगै दुवै टोलीले समूह चरणको सुरुआत एक–एक अंकसहित गरेका छन्।

काठमाडौं । फिफा विश्वकप २०२६ अन्तर्गत समूह ‘जी’ को पहिलो खेल खेलेलगत्तै इरानको राष्ट्रिय फुटबल टोलीलाई अमेरिका छोडेर मेक्सिकोस्थित आफ्नो प्रशिक्षण शिविरमा फर्कन निर्देशन दिइएको छ।

लस एन्जलसको सोफाइ स्टेडियममा न्युजिल्यान्डसँग २–२ को बराबरी खेलेको केही घण्टापछि इरानी टोली मेक्सिकोको टिजुआनास्थित क्याम्पमा फर्किएको हो। टोलीको खेलपछि अमेरिकामै बसेर विश्राम र पुनःताजगी (रिकभरी) गर्ने योजना रहे पनि आप्रवासन तथा भिसासम्बन्धी व्यवस्थाका कारण तत्काल फर्कनुपरेको बताइएको छ।

इरानका मुख्य प्रशिक्षक अमिर घालेनोईले पत्रकार सम्मेलनमा यस व्यवस्थाप्रति असन्तुष्टि व्यक्त गरेका छन्। उनले टोलीले विश्वकप अवधिभर विभिन्न प्रशासनिक चुनौती सामना गरिरहेको उल्लेख गर्दै यस्तो यात्रा तालिकाले खेलाडीहरूको तयारीमा असर पारेको बताए।

“हामीलाई खेलपछि सामान्य विश्राम गर्ने अवसर पनि मिलेन। यसले खेलाडीहरूको शारीरिक अवस्थामाथि प्रभाव पार्न सक्छ,” उनले दोभाषेमार्फत भने।

टोलीका कप्तान मेहदी तारेमीले पनि कडा सुरक्षा जाँच र यात्रा व्यवस्थापनका कारण खेलाडीहरूले अतिरिक्त कठिनाइ भोग्नुपरेको बताएका छन्। उनका अनुसार मेक्सिको–अमेरिका सीमा पार गर्ने क्रममा लामो समय सुरक्षा प्रक्रियामा बिताउनुपरेको थियो।

यसैबीच, इरान फुटबल महासंघका केही पदाधिकारी, प्राविधिक सहयोगी र सञ्चारकर्मीहरूले भिसा नपाएपछि टोलीका केही सदस्य विश्वकप यात्रामा सहभागी हुन सकेका छैनन्।

खेलतर्फ, न्युजिल्यान्डका एलाइजा जस्टले दुई गोल गर्दै टोलीलाई दुई पटक अग्रता दिलाएका थिए। तर इरानका रामिन रेजाईयान र मोहम्मद मोहेब्बीले गोल फर्काएपछि खेल २–२ को बराबरीमा टुंगिएको थियो।

इरानले आफ्नो दोस्रो खेल आगामी आइतबार बेल्जियमविरुद्ध सोफाइ स्टेडियममै खेल्ने तालिका छ। त्यसका लागि टोली पुनः अमेरिका फर्किनुपर्नेछ।

काठमाडौँ । विशेष अदालतले राहदानी विभागका महानिर्देशक तीर्थराज अर्याल र सूचना प्रविधि निर्देशक सुनील कुमार केसीलाई ४ दिन थुनामा राखेर अनुसन्धान गर्न अख्तियार दुरुपयोग अनुसन्धान आयोगलाई अनुमति दिएको छ।

विशेष अदालतका अध्यक्ष सुदर्शनदेव भट्ट तथा सदस्यहरू उमेश कोइराला र विदुर कोइरालाको इजलासले उक्त आदेश दिएको हो।

अख्तियारले राहदानी छपाइसम्बन्धी भ्रष्टाचारजन्य कसुरको अनुसन्धानका लागि दुवै जनालाई २० दिन थुनामा राख्न अनुमति मागेको थियो। तर अदालतले सोमबारदेखि लागू हुने गरी प्रारम्भिक रूपमा ४ दिनको म्याद दिएको विशेष अदालतका प्रवक्ता कृष्णशरण लामिछानेले जानकारी दिए।

प्रवक्ता लामिछानेका अनुसार राहदानी छपाइ प्रक्रियामा अनियमितता भएको आशंकामा अख्तियारले अनुसन्धान अघि बढाइरहेको छ। सोही अनुसन्धानका लागि अर्याल र केसीलाई थुनामा राख्न अदालतबाट अनुमति प्राप्त भएको हो।

काठमाडौँ । चिकित्सा शिक्षा आयोगले ‘छात्रवृत्ति अनुदानसम्बन्धी कार्यविधि, २०८३’ स्वीकृत गरेको छ। प्रधानमन्त्री तथा मन्त्रिपरिषद्को कार्यालयमा मंगलबार बसेको आयोगको विशेष बैठकले उक्त कार्यविधि पारित गर्ने निर्णय गरेको हो।

प्रधानमन्त्रीका प्रेस तथा अनुसन्धान विज्ञ दीपा दाहालका अनुसार शिक्षा तथा खेलकुद मन्त्रालय र अर्थ मन्त्रालयबाट सहमति प्राप्त भएको २४ घण्टाभित्रै आयोगले कार्यविधि स्वीकृत गरेको हो।

नयाँ कार्यविधि लागू भएसँगै चिकित्सा शिक्षा क्षेत्रमा लामो समयदेखि देखिएको छात्रवृत्ति तथा अनुदानसम्बन्धी कानुनी अन्योल अन्त्य हुने अपेक्षा गरिएको छ।

विधायन ऐन, २०८१ को दफा ३५ अनुसार आयोगका पुराना निर्देशिका र कार्यविधिहरू स्वतः निष्क्रिय भएपछि चिकित्सा शिक्षा क्षेत्रमा कानुनी रिक्तता सिर्जना भएको थियो। उक्त समस्या समाधान गर्न ‘केही नेपाल ऐनलाई संशोधन गर्न बनेको अध्यादेश, २०८३’ मार्फत राष्ट्रिय चिकित्सा शिक्षा ऐन, २०७५ मा दफा ५४ (ख) थप गरिएको थियो।

संशोधित कानुनी व्यवस्थाले आयोगलाई नयाँ निर्देशिका तथा कार्यविधि बनाउने अधिकार दिएपछि ‘छात्रवृत्ति अनुदानसम्बन्धी कार्यविधि, २०८३’ तयार पारिएको हो। यसका लागि अर्थ मन्त्रालय र शिक्षा तथा खेलकुद मन्त्रालयबाट असार १ गते अन्तिम सहमति प्राप्त भएको थियो।

कार्यविधि स्वीकृत भएसँगै अब आयोगले देशभरका सार्वजनिक शिक्षण संस्थाहरूलाई अनुदान उपलब्ध गराउन सक्नेछ। निःशुल्क छात्रवृत्तिमा अध्ययन गरिरहेका विद्यार्थीहरूको व्यवस्थापनका लागि सम्बन्धित शिक्षण संस्थाहरूले अनुदान प्राप्त गर्नेछन्।

यो व्यवस्था स्नातक तहमा मात्र सीमित नरही स्नातकोत्तर तहका डिएम (DM) र एमसिएच (MCh) कार्यक्रमसम्म लागू हुने जनाइएको छ।

बैठकमा स्वास्थ्य तथा खाद्य स्वच्छतामन्त्री निशा मेहताको सहअध्यक्षता रहेको थियो। आयोगका उपाध्यक्ष प्रा. डा. श्रीकृष्ण गिरीसहित अन्य सदस्यहरूको पनि सहभागिता रहेको थियो।

मुम्बई । लोकप्रिय भारतीय टेलिभिजन अभिनेत्री सञ्चिता उगलेको निधनपछि उनका पिता मच्छिन्द्र उगलेले छोरीमाथि मानसिक दबाब र तनाव रहेको दाबी गरेका छन्। उनले सञ्चितामाथि आर्थिक विषयलाई लिएर निरन्तर दबाब दिइएको र त्यसकै कारण उनी गम्भीर डिप्रेसनमा पुगेको हुन सक्ने बताएका छन्।

चर्चित टेलिभिजन सिरियल कुमकुम भाग्य मा ‘दिया’को भूमिकाबाट चर्चित बनेकी सञ्चिताको शव आइतबार राति आफ्नै शयनकक्षमा झुण्डिएको अवस्थामा फेला परेको थियो।

सञ्चारमाध्यमसँग कुरा गर्दै उनका पिताले सञ्चिता पछिल्लो समय मानसिक रूपमा अत्यन्त तनावमा रहेको बताए। उनले भने, “उसले हामीलाई वास्तविक कारण कहिल्यै बताइन। तर ऊ भित्रभित्रै धेरै तनावमा थिई भन्ने हामीलाई थाहा थियो। कहिले सामान्य र खुसी देखिन्थी, कहिले अचानक डिप्रेसनमा पुग्थी। त्यसैले हामी सकेसम्म उसको हेरचाह गरिरहेका थियौँ।”

उनले दुःख व्यक्त गर्दै भने, “केही समय मात्र हामी उसको साथमा थिएनौँ। तर ऊ यति गम्भीर अवस्थामा पुगेकी छ भन्ने हामीले अनुमान गर्न सकेनौँ।” उनले घटनाको निष्पक्ष छानबिन गरी न्याय दिन प्रशासनसँग आग्रह गरेका छन्।

सञ्चिता आफ्ना आमाबुबासँग महाराष्ट्रको पालघरमा बस्दै आएकी थिइन्। परिवारका अनुसार आइतबार साँझ उनकी बहिनी घरबाहिर गएकी बेला घटना भएको थियो। उनलाई तत्काल अस्पताल पुर्‍याइए पनि चिकित्सकहरूले मृत घोषणा गरेका थिए।

सञ्चिताले कुमकुम भाग्य बाहेक वागले की दुनिया लगायत विभिन्न टेलिभिजन कार्यक्रम र चलचित्रमा अभिनय गरेकी थिइन्। उनी पछिल्लोपटक दंगल टिभीको साजन घर मे कार्यक्रममा देखिएकी थिइन्। साथै, उनले हालै प्रदर्शनमा आएको चलचित्र छावा मा ताराबाईको भूमिका निभाएकी थिइन्। साइलेन्स २: द नाइट आउल बार शुटआउट मा पनि उनको अभिनय रहेको थियो।

निधन हुनुभन्दा केही घण्टा अघि मात्र उनले आफ्नो इन्स्टाग्राम खातामा एउटा भिडियो पोस्ट गरेकी थिइन्। सामाजिक सञ्जालमा सक्रिय सञ्चिताका इन्स्टाग्राममा १ लाख ३९ हजारभन्दा बढी फलोअर्स छन्, जहाँ उनका प्रशंसकहरूले श्रद्धाञ्जली व्यक्त गरिरहेका छन्।

यसैबीच, सामाजिक सञ्जालमा सह–कलाकार उज्ज्वल शर्मासँग उनको सम्बन्धबारे विभिन्न चर्चा भए पनि उज्ज्वलले त्यसको खण्डन गरेका छन्। उनले आफूहरूबीच प्रेम सम्बन्ध नरहेको स्पष्ट पार्दै सञ्चिता केही समयदेखि व्यक्तिगत र मानसिक तनावबाट गुज्रिरहेकी थिइन् भनेका छन्। उनका अनुसार उनले मानसिक स्वास्थ्यसम्बन्धी उपचार र परामर्श पनि लिइरहेकी थिइन्।

काठमाडौँ । राहदानी विभागका महानिर्देशक तीर्थराज अर्याल अहिले अख्तियारको हिरासतमा छन् । उनलाई प्रधानमन्त्री तथा मन्त्रिपरिषद्को कार्यालयले छानबिनका लागि अख्तियारको जिम्मा लगाएको उच्च स्रोतले पुष्टि गरेको छ ।

अर्याललाई सोमबार बिहान १० बजे प्रधानमन्त्री तथा मन्त्रिपरिषद्को कार्यालयमा बोलाइएको थियो । उनलाई पासपोर्ट खरिद प्रकरणको फाइल लिएर आउन भनिएको थियो । त्यसपछि अख्तियार दुरुपयोग अनुसन्धान आयोगका प्रमुख प्रेमकुमार राई मध्यान्ह १२ बजेतिर प्रधानमन्त्री कार्यालय पुगेका थिए ।

प्रधानमन्त्री कार्यालयका अधिकारीहरू र आयोगबाट खटिएका अनुसन्धान अधिकृतहरूले दिनभर फाइल अध्ययन गरेपछि साँझ अर्याललाई अख्तियारको जिम्मा लगाइएको प्रधानमन्त्री तथा मन्त्रिपरिषद्को कार्यालयका एक उच्च अधिकृतले रातोपाटीलाई बताए ।

साँझ ९ बजेतिर अर्याल र राहदानी विभागका सूचना प्रविधि निर्देशक सुनिल कुमार केसीलाई आयोगका सुरक्षाकर्मीले नियन्त्रणमा लिएर आयोगमा लगेका हुन् । अख्तियारले पासपोर्ट खरिदमा अनियमितता भएकोबारे अनुसन्धान गरिरहेको बताइएको छ ।

विराटनगर । मोरङको कानेपोखरी–६ स्थित रमाइलो बजारमा सञ्चालित ‘शुभलक्ष्मी अधिकारी सुनचाँदी पसल’का सञ्चालकबाट रकम ठगिएको भन्दै थप ११ जना पीडितले जिल्ला प्रशासन कार्यालय मोरङमा संयुक्त उजुरी दर्ता गराएका छन्।

असार १ गते दर्ता गरिएको उजुरीमा पसल सञ्चालक होमनाथ अधिकारी, उनकी पत्नी बाटुलादेवी अधिकारी, छोराहरू ध्रुव र मनोज अधिकारी तथा परिवारका अन्य सदस्यहरूले बचतकर्ताहरूको रकम हिनामिना गरेको आरोप लगाइएको छ।

यसअघि जेठ ७ गते स्थानीय विष्णुमाया गिरीले आफूबाट २९ लाख १७ हजार रुपैयाँ ठगी भएको दाबी गर्दै किटानी जाहेरी दिएकी थिइन्।

उजुरी दिन पुगेका अधिकांश पीडितले जीवनभरको बचत गुमाएको बताएका छन्। उनीहरूका अनुसार वृद्धभत्ता, उपचार खर्च, वैदेशिक रोजगारीबाट बचत गरिएको रकम तथा दैनिक श्रमबाट जम्मा गरिएको रकम फिर्ता नपाउँदा आर्थिक संकटमा परेका छन्।

पीडित दुर्गामाया मंग्रातीले आफू र आफ्ना बुबा वीरबहादुर बयलकोटीले जम्मा गरेको रकम फिर्ता नपाएको बताइन्। उनका अनुसार वृद्धभत्ताको रकम समेत उक्त पसलमा राखिएको थियो।

७४ वर्षीय नारायण धिमालले आफू क्यान्सरको उपचार गराइरहेको अवस्थामा बचत गरेको २ लाख ६५ हजार रुपैयाँ फिर्ता नपाउँदा उपचारमा समस्या परेको गुनासो गरे। उनले चुरोट–सुर्ती बिक्री गरेर जम्मा गरेको रकम डुबेको बताए।

त्यस्तै, गंगाबहादुर गुरुङ र उनकी पत्नी डेगमाया गुरुङले करिब ११ लाख रुपैयाँ तथा बलमाया गुरुङले १६ लाख ५० हजार रुपैयाँ बचत गरेको रकम फिर्ता नपाएको बताएका छन्। दिलमाया धिमालले पनि आफ्नी बहिनीको ४ लाख ६९ हजार ६९७ रुपैयाँ उक्त पसलमा राखिएको जानकारी दिइन्।

जिल्ला प्रशासन कार्यालयमा दर्ता गरिएको निवेदनमा अर्जुन संग्रौला, नारायण धिमाल, हरि पौडेल, दिलमाया धिमाल, छलीमाया संग्रौला, वीरबहादुर बयलकोटी, दुर्गामाया मंग्राती, बख्रेलाल धिमाल, कलवाती गुरुङ, सलबहादुर गुरुङ तथा गंगाबहादुर–डेगमाया गुरुङको नाम उल्लेख गरिएको छ।

पीडितहरूका अनुसार करिब २५० भन्दा बढी सर्वसाधारणको झन्डै १२ करोड रुपैयाँ हिनामिना भएको आशंका गरिएको छ। घटनापछि सञ्चालक पक्ष विदेश पलायनको तयारीमा रहेको आरोप समेत लगाइएको छ।

प्रशासनले घटनाबारे अनुसन्धान जारी रहेको जनाएको छ। पीडितहरूले दोषीमाथि कानुनी कारबाही गरी आफ्नो बचत रकम फिर्ता गराउन माग गरेका छन्।

काठमाडौं । कृषि, वन तथा वातावरण मन्त्रालयले चैते धानको न्यूनतम समर्थन मूल्य प्रभावकारी रूपमा कार्यान्वयन गर्न सम्बन्धित सरकारी तथा निजी क्षेत्रका निकायहरूलाई आग्रह गरेको छ।

मन्त्रालयअन्तर्गत कृषि तथा पशुपन्छी व्यवसाय प्रवर्द्धन महाशाखाले सोमबार विज्ञप्ति जारी गर्दै उद्योग, वाणिज्य तथा आपूर्ति मन्त्रालय, कृषि आधुनिकीकरण कार्यक्रम, नेपाल चामल, तेल तथा दाल उद्योग संघलगायत सरोकारवाला निकायलाई किसानबाट तोकिएको मूल्यमा धान खरिद गर्ने व्यवस्था सुनिश्चित गर्न अनुरोध गरेको हो।

नेपाल सरकारको मन्त्रिपरिषद्ले गत चैत २४ गते चालु आर्थिक वर्ष २०८२/०८३ का लागि १८ प्रतिशतसम्म चिस्यान भएको चैते धानको न्यूनतम समर्थन मूल्य प्रतिक्विन्टल २ हजार ८६६ रुपैयाँ ४१ पैसा निर्धारण गरेको थियो।

मन्त्रालयका सहसचिव ई. जगन्नाथ तिवारीद्वारा जारी विज्ञप्तिमा नेपाली किसानले उत्पादन गरेको धानले सस्तो भारतीय धानसँग प्रतिस्पर्धा गर्नुपरेको, भण्डारणमा समस्या देखिएको तथा किसानले उत्पादनको उचित मूल्य नपाएको गुनासो प्राप्त भएपछि समर्थन मूल्य कार्यान्वयनमा विशेष ध्यान दिइएको उल्लेख गरिएको छ।

विज्ञप्तिअनुसार चैते धान भित्र्याउने समय वर्षायामसँग जुध्ने भएकाले किसानले आवश्यक मापदण्डअनुसार भण्डारण गर्न कठिन हुने र वर्षे धान खेतीका लागि तत्काल नगद आवश्यक पर्ने हुँदा उनीहरू कम मूल्यमा धान बिक्री गर्न बाध्य हुने गरेका छन्।

मन्त्रालयले खाद्यान्नमा आत्मनिर्भरता हासिल गर्न चैते धान खेतीको संरक्षण र विस्तार आवश्यक रहेको उल्लेख गर्दै किसानको उत्पादन लागत र न्यूनतम मुनाफा सुनिश्चित गर्नु सरकार तथा निजी क्षेत्र दुवैको साझा जिम्मेवारी भएको जनाएको छ।

किसानले निर्धारण गरिएको न्यूनतम समर्थन मूल्य प्राप्त गर्न सकून् भन्ने उद्देश्यले धान खरिद प्रक्रिया सहज बनाउन उद्योगी, व्यवसायी तथा सम्बन्धित निकायबीच आवश्यक समन्वय गर्न मन्त्रालयले विशेष जोड दिएको छ।

बागमती । बागमती प्रदेश सरकारले आगामी आर्थिक वर्ष २०८३/०८४ को बजेटमार्फत कर, जरिवाना तथा घरजग्गा रजिष्ट्रेसन शुल्कमा विभिन्न छुट र सहुलियतका कार्यक्रम घोषणा गरेको छ।

सोमबार प्रदेश सभामा बजेट प्रस्तुत गर्दै आर्थिक मामिला तथा योजनामन्त्री प्रभात तामाङले व्यवसायी, उद्योगी, किसान तथा विभिन्न लक्षित वर्गलाई राहत दिने उद्देश्यले विशेष छुटको व्यवस्था गरिएको जानकारी दिए।

बजेटअनुसार दर्ता भएर पनि नवीकरण नगरेका उद्योग तथा व्यवसायले २०८३ पुस मसान्तभित्र आर्थिक वर्ष २०८२/०८३ सम्मको नवीकरण शुल्क बुझाएमा आर्थिक वर्ष २०८१/०८२ भन्दा अघिको सम्पूर्ण जरिवाना माफ गरिनेछ।

त्यस्तै, २० वर्ष वा सोभन्दा पुराना सार्वजनिक (भाडाका) सवारीसाधनका धनीले २०८३ पुस मसान्तभित्र बाँकी कर तथा नवीकरण दस्तुर बुझाएमा लाग्ने शतप्रतिशत जरिवाना छुट दिई सवारी दर्ता खारेज (लगतकट्टा) गर्ने व्यवस्था गरिएको छ।

नवीकरण नगरेका ड्राइभिङ ट्रेनिङ सेन्टर, वर्कसप र रिकन्डिसन हाउसहरूले पनि तोकिएको अवधिभित्र शुल्क बुझाएमा अघिल्लो अवधिको नवीकरण दस्तुर र जरिवानामा पूर्ण छुट पाउनेछन्।

प्रदेश सरकारले घरजग्गा रजिष्ट्रेसन शुल्कमा पनि विभिन्न वर्ग र क्षेत्रलाई लक्षित गरी ५० प्रतिशतसम्म छुटको व्यवस्था गरेको छ। जलविद्युत्, चिया, कफी, फलफूल, तरकारी, पशुपालन, डेरी, अलैँची, जडीबुटी तथा अन्य कृषि उद्योगका लागि खरिद गरिने जग्गामा ५० प्रतिशत रजिष्ट्रेसन शुल्क छुटलाई निरन्तरता दिइएको छ।

उत्पादनमूलक तथा सूचना प्रविधि उद्योग स्थापना गर्न खरिद गरिने जग्गामा पनि ५० प्रतिशत छुट दिइनेछ। तीन सयभन्दा बढीलाई प्रत्यक्ष रोजगारी दिने उद्योगले जग्गा खरिद गर्दा लाग्ने रजिष्ट्रेसन शुल्कमा समेत ५० प्रतिशत छुटको व्यवस्था गरिएको छ।

हिमाली जिल्लाका दुर्गम क्षेत्रका जग्गा कारोबारमा दिँदै आएको ५० प्रतिशत शुल्क छुटलाई पनि निरन्तरता दिइएको छ।

जनआन्दोलन, सशस्त्र संघर्ष तथा मधेस आन्दोलनका सहिद र बेपत्ता पारिएका व्यक्तिका आश्रित परिवारलाई घरजग्गा स्वामित्व हस्तान्तरण गर्दा लाग्ने सबै प्रकारका दस्तुर र शुल्क पूर्ण रूपमा छुट गरिनेछ।

अपाङ्गता भएका व्यक्ति, दलित, पिछडिएका, अल्पसंख्यक तथा सीमान्तकृत समुदायका व्यक्तिहरूका नाममा हुने घरजग्गा रजिष्ट्रेसनमा २५ प्रतिशत छुट दिइने भएको छ। त्यस्तै, महिला, ७० वर्षभन्दा माथिका ज्येष्ठ नागरिक तथा बाबुआमा गुमाएका नाबालकका नाममा हुने घरजग्गा कारोबारमा पनि २५ प्रतिशत छुटको व्यवस्था गरिएको छ।

एकल महिलाको नाममा स्वामित्व हस्तान्तरण हुने घरजग्गामा ३५ प्रतिशत छुट दिइनेछ। गाउँपालिका क्षेत्रभित्र महिलाको नाममा पास हुने जग्गामा पनि ३५ प्रतिशत रजिष्ट्रेसन शुल्क छुट कायम गरिएको छ।

यसैगरी, भूमिहीन, मुक्त कमैया र मुक्त हलिया परिवारले सहुलियत ऋण वा अनुदानबाट खरिद गरेको जग्गामा लाग्ने रजिष्ट्रेसन शुल्क, सेवा शुल्क तथा रोक्का दस्तुर पूर्ण रूपमा मिनाहा गरिने मन्त्री तामाङले जानकारी दिए।