काठमाडौं। स्थानीय तह निर्वाचन आउन अझै एक वर्ष बाँकी रहे पनि राष्ट्रिय स्वतन्त्र पार्टी (रास्वपा)ले तयारी सुरु गरेको छ ।पार्टीले केन्द्रमा जस्तै स्थानीय तहमा पनि व्यवस्थित रूपमा उम्मेदवार छनोट गर्ने रूपरेखा तयार पार्ने योजना अघि बढाएको
छ। यसअन्तर्गत ‘क्याण्डिडेट क्लब’ मार्फत उम्मेदवार छनोट गर्ने विधि तय गर्न लागिएको सहमहामन्त्री विपिनकुमार आचार्यले जानकारी दिएका छन् ।
संघीय निर्वाचनमा तयार पारिएको उम्मेदवार छनोट प्रणाली पूर्ण रूपमा लागू गर्न नसकेको रास्वपाले यसपटक भने स्थानीय तहमा पूर्ण कार्यान्वयन गर्ने लक्ष्य लिएको छ ।
यसका लागि वैशाख ७ गते बसेको केन्द्रीय समितिको बैठकले आचार्यकै नेतृत्वमा ७ सदस्यीय ‘स्थानीय निर्वाचन उम्मेदवार छनोट रूपरेखा तथा क्याण्डिडेट क्लब सम्पादन समिति’ गठन गरेको छ । समितिमा रामकुमार ढुंगाना सचिव छन् भने प्रतिनिधि सभा सदस्य समीक्षा बास्कोटा र केपी खनाल सदस्य रहेका छन् । त्यसैगरी कामिनी चौधरी, रामकृष्ण भट्टराई र डिल्लिश्वोर कमार्की (रोहन) पनि सदस्यका रूपमा रहेका छन् ।
समितिको पहिलो बैठकसमेत सम्पन्न भइसकेको छ । बिहीबार बसेको बैठकले पार्टीका सबै तहका संरचनाबाट सुझाव संकलन गर्ने निर्णय गरेको छ ।
निर्णयअनुसार वैशाख १४ गते वडा तहमा छलफल गरी पालिकामा सुझाव पठाइनेछ । वैशाख १६ गते पालिका तहमा छलफलपछि जिल्लामा, वैशाख १७ गते जिल्लाबाट प्रदेशमा र वैशाख १८ गते प्रदेशबाट केन्द्रमा सुझाव पठाउने कार्यतालिका तय गरिएको छ ।
सुझाव संकलनका क्रममा सम्बन्धित समितिका सभापति अनुपस्थित भए उपसभापतिको नेतृत्वमा भौतिक वा भर्चुअल माध्यमबाट छलफल गरी सुझाव पठाउन निर्देशन दिइएको छ ।
