काठमाडौं: सुनचाँदी व्यवसायीहरूले गहनामा लगाइएको २ प्रतिशत विलासिता कर खारेज गर्न माग गर्दै काठमाडौंको न्यूरोड क्षेत्रमा विरोध प्रदर्शन गरेका छन्।
बिहीबार नेपाल सुनचाँदी व्यवसायी तथा कालिगड संघर्ष समितिको आयोजनामा भएको प्रदर्शनमा सहभागीहरूले सरकारले बजेटमार्फत ल्याएको अनावश्यक कर व्यवस्था तत्काल खारेज गर्नुपर्ने माग गरेका हुन्। उनीहरूका अनुसार बजेटमा सुनचाँदी गहनालाई ‘विलासिताको वस्तु’ मानेर गरिएको कर लागू गर्नु अव्यवहारिक र अन्यायपूर्ण छ।
प्रदर्शनका क्रममा व्यवसायीहरूले “विलासिता कर खारेज गर”, “सुनको भन्सार शुल्क ६ प्रतिशत लागू गर”, “सुनचाँदी व्यवसायका लागि स्पष्ट नीति तथा नियमावली बनाउ” जस्ता नारा लेखिएका प्लेकार्डहरू प्रदर्शन गरेका थिए।
देशभरका सुनचाँदी व्यवसायीहरूले आ–आफ्ना पसलमा कालो व्यानर टाँसेका छन् भने केही स्थानमा पसल नै बन्द गरिएको छ। संघर्ष समितिका अनुसार, व्यवसायीहरूले आजै जिल्ला प्रशासन कार्यालयमार्फत सरकारलाई ज्ञापनपत्र पनि बुझाएका छन्।
