काठमाडौँ: नक्कली भुटानी शरणार्थी प्रकरणमा थुनामा रहेका बेचन झालाई सर्वोच्च अदालतले थुनामा राख्नुको कारण पेस गर्न आदेश दिएको छ।
झाले सर्वोच्चमा दायर गरेको बन्दी प्रत्यक्षीकरण निवेदनमाथि बिहीबार सुनुवाइ गर्दै न्यायाधीश नित्यानन्द पाण्डेको इजलासले कारण देखाऊ आदेश जारी गरेको हो। झाले बुधबार बन्दी प्रत्यक्षीकरण निवेदन दिएका थिए।
उक्त प्रकरणमा झामाथि उच्च राजनीतिक नेतृत्व र गृह मन्त्रालयबीच समन्वयको भूमिका खेलेको आरोप छ। गत असार १५ गते पक्राउ परेका झालाई भदौ २ गते जिल्ला अदालत काठमाडौँले पुर्पक्षका लागि थुनामा पठाउने आदेश दिएको थियो।
सो आदेशलाई गैरकानुनी ठहर गर्दै झा बन्दी प्रत्यक्षीकरण निवेदन लिएर सर्वोच्च पुगेका हुन्। झामाथि सङ्गठित अपराध, राज्यविरुद्धको अपराध, ठगी र लिखत किर्ते मुद्दा लागेको छ।
