काठमाडौं: बागमती प्रदेशका सहकारी तथा गरिबी निवारणमन्त्री मदुकुमार श्रेष्ठका स्वकीय सचिव रवि थापाको निधन भएको छ। सोमबार विषादी सेवन गरेका थापाको उपचारका क्रममा कलंकीस्थित सहिद मेमोरियल अस्पतालमा मृत्यु भएको हो।
धादिङको धुनीबेसी–९ का ३६ वर्षीय थापा कलंकीस्थित एक साथीको डेरामा सोमबार दिउँसो २ बजे बेहोस अवस्थामा फेला परेका थिए। विषादी सेवन गरेका उनलाई तत्काल अस्पताल पुर्याइएको थियो। उपचारका क्रममा सोमबार बेलुकी ६:३८ बजे निधन भएको काठमाडौं प्रहरी परिसरका प्रहरी उपरीक्षक अपिलराज बोहराले पुष्टि गरेका छन्।
प्रहरीले थापाको साथबाट एक पत्र बरामद गरेको छ। उक्त पत्रमा उनले सहकारीको रकम लेनदेनसँग जोडेर आफूलाई बेइज्जत गर्न खोजिएको आरोप लगाएका छन्।
प्रहरीका अनुसार, सुमेरु सहकारी प्रकरणसँग जोडिएको अडियो सार्वजनिक भएपछि थापाको नाम विवादमा आएको थियो। बरामद पत्रमा मन्त्री श्रेष्ठ र उनको सचिवालयले राम्रो काम गरेकाले बदनाम गर्न आफ्नो अडियो सम्पादन गरेर प्रयोग गरिएको दाबी गरिएको छ।
यस घटनाबारे प्रहरीले विस्तृत अनुसन्धान अघि बढाएको जनाएको छ।
