काठमाडौं । अखिल नेपाल फुटबल संघ (एन्फा) का अध्यक्ष पंकजविक्रम नेम्वाङ र महासचिव किरण राई फिफा विश्वकप २०२६ हेर्न अमेरिका जाने क्रममा त्रिभुवन अन्तर्राष्ट्रिय विमानस्थलबाटै फर्काइएका छन्।
सोमबार बिहान अमेरिका प्रस्थान गर्ने तयारीमा रहेका उनीहरूलाई अध्यागमन अधिकारीहरूले ‘कालोसूची’ (ब्ल्याक लिस्ट) मा नाम रहेको जनाउँदै विदेश जान अनुमति नदिएको स्रोतले जनाएको छ।
त्रिभुवन अन्तर्राष्ट्रिय विमानस्थल अध्यागमन कार्यालयका एक अधिकारीका अनुसार अध्यागमन विभागको अभिलेखमा उनीहरूको नाम कालोसूचीमा रहेकाले प्रस्थान अनुमति रोकिएको हो।
एन्फाको आर्थिक कारोबारसम्बन्धी विषयमा छानबिन चलिरहेका बेला राष्ट्रिय खेलकुद परिषद् (राखेप) को सिफारिसमा अध्यागमन विभागले गत वैशाखमै एन्फाका पदाधिकारीहरूको विदेश भ्रमणमा रोक लगाएको थियो। सोही निर्णयका आधारमा नेम्वाङ र राईलाई मेक्सिको हुँदै अमेरिका जानबाट रोकिएको बताइएको छ।
विश्वकप अवलोकनका लागि विदेश जान पाउनुपर्ने माग राख्दै एन्फा अध्यक्ष नेम्वाङ र महासचिव राई आइतबार राखेप पुगेका थिए। उनीहरूले आफूहरूमाथि लगाइएको प्रतिबन्ध हटाइदिन आग्रह गरे पनि राखेपले त्यसमा सहमति जनाएको थिएन।
राखेपले प्रतिबन्ध फुकुवा गर्न अस्वीकार गरेपछि अध्यागमन विभागले पूर्ववत् निर्णय कार्यान्वयन गर्दै उनीहरूलाई विमानस्थलबाटै फर्काएको हो।
