मुस्ताङ: नेपाल प्रेस युनियनको आयोजनामा शुक्रबारदेखि जारी लोमान्थाङ अन्तर्राष्ट्रिय मिडिया समिट अन्तर्गत सोमबार तेस्रो दिन अन्तर्राष्ट्रिय सञ्चारकर्मीहरूको टोली पोखरा हुँदै हिमालपारिको जिल्ला मुस्ताङ आइपुगेको छ।
टोलीले पोखराको अन्नपूर्ण केबलकारमार्फत फेवातालसहित पोखराको मनोरम दृश्य अवलोकन गर्दै यात्रा सुरु गरेको हो। सो क्रममा टोलीले कास्कीको अन्नपूर्ण गाउँपालिका र पर्वतको जलजला गाउँपालिकामा विविध कार्यक्रम सञ्चालन गरेका छन्।
टोलीले म्याग्दीको प्रसिद्ध धार्मिक स्थल गलेश्वरधाम, रुप्से झरनालगायतका पर्यटकीय स्थलहरूको प्रवर्द्धनात्मक भ्रमण गर्दै मुस्ताङ प्रवेश गरेको हो। अन्नपूर्ण गाउँपालिकामा टोलीलाई बाजागाजासहित भव्य स्वागत गरिएको थियो।
गाउँपालिकाको पक्षबाट स्वागत गर्दै अध्यक्ष विष्णुबहादुर केसीले कृषि, पर्यटन र ऊर्जाको प्रवर्द्धन तथा नागरिकलाई सुशासनयुक्त सेवा प्रवाहमा पालिका प्रतिबद्ध भएर काम गरिरहेको जानकारी दिनुभयो। उपाध्यक्ष चन्द्रकला अधिकारी र प्रमुख प्रशासकीय अधिकृत विष्णु पोख्रेलले पालिकाको सेवा प्रवाह र विकास गतिविधिबारे सहभागीलाई जानकारी गराए।
जलजला गाउँपालिकामा आयोजित कार्यक्रममा पालिकाका सूचना प्रविधि अधिकृत सुदीप पौडेलले कृषि र पर्यटनको सम्भावनाबारे प्रष्ट पार्नुभयो। प्रमुख प्रशासकीय अधिकृत हरिकृष्ण आचार्यले ४१ प्रतिशत भूभाग वनले ढाकिएको जलजलामा न्यूनतम स्रोतसाधनकै भरमा जडीबुटी, जमिन, जंगल र कृषिमा सम्भावना खोजिरहेको जानकारी दिनुभयो।
दुवै कार्यक्रममा नेपाल प्रेस युनियनका अध्यक्ष शिव लम्सालले गाउँपालिकाहरूका समृद्धिको सम्भावना सञ्चारमाध्यममार्फत उजागर गरिने विश्वास व्यक्त गर्नुभयो।
यसअघि, समिटको औपचारिक उद्घाटन ललितपुरको हिमालय होटेलमा गरिएको थियो। राजधानी र पोखरामा भएका विभिन्न सत्रमा विश्वको बदलिँदो परिवेश, प्रविधिले ल्याएका अवसर र चुनौती, दक्षिण एसियाको सञ्चार क्षेत्रका समस्या, प्रेस स्वतन्त्रता, र नेपाली पत्रकारिताका विविध पक्षमा छलफल तथा अन्तरक्रिया सम्पन्न भएको थियो।
मंगलबार जोमसोममा जलवायु परिवर्तन र त्यसका प्रभावबारे सरोकारवालासँग अन्तरक्रिया गरिनेछ भने लोमान्थाङ घोषणापत्र जारी गरिने नेपाल प्रेस युनियनले जनाएको छ।
