काठमाडौं । काठमाडौँको लाजिमपाटस्थित अरूपण आर्ट ग्यालरीमा आजदेखि १९औँ शताब्दीका युरोपेली कला प्रदर्शनी सुरु भएको छ। एक सातासम्म चल्ने उक्त प्रदर्शनीको उद्घाटन नेपाल ललितकला प्रज्ञा प्रतिष्ठानका संस्थापक कुलपति किरण मानन्धरले गरेका हुन्।
उद्घाटन कार्यक्रममा बोल्दै कलाकार मानन्धरले लाखौँ रुपैयाँ खर्च गरेर विदेशी सङ्ग्रहालयमा हेर्नुपर्ने कला नेपालमै निःशुल्क हेर्न पाउनु नेपालीका लागि महत्वपूर्ण अवसर भएको बताए। उनले नेपालमा कलाको महत्व अझै पूर्ण रूपमा बुझाउन नसकिएको उल्लेख गर्दै समयसँगै दृष्टिकोणमा सुधार हुँदै गएको पनि बताए।
मानन्धरले आफ्नो युवावस्थाको अनुभव स्मरण गर्दै कला सिक्नका लागि बुबाबाट सात हजार रुपैयाँ लिएर बनारस गएको बताएका थिए। पहिलेको समयमा चित्रकला सिक्ने विषयलाई परिवारले समेत सहज रूपमा नलिने अवस्था रहेको उनले उल्लेख गरे।
कार्यक्रममा अर्का अग्रज कलाकार राधेश्याम मुल्मीले कलाको विश्वव्यापी उच्च सम्मान रहेको भन्दै नेपालमा पनि त्यसको मूल्य र सम्मान बढ्दै गएको बताए। उनले चित्रकलाको मूल्य कहिल्यै नघट्ने उल्लेख गर्दै युवा पुस्तालाई कला साधनामा निरन्तर लाग्न आग्रह गरे।
अरूपण आर्ट ग्यालरीका प्रमुख अग्रज कलाकार रमेशनाथ खनालले प्रदर्शनीमा राखिएका ३० वटा कलाकृतिहरू विभिन्न वाद र कलाअभियानको प्रतिनिधित्व गर्ने बताए। उनले विदेश घुम्ने क्रममा संकलन गरिएका यस्ता कलाहरू नेपालमा प्रदर्शन गर्न पाउनु महत्वपूर्ण उपलब्धि भएको उल्लेख गरे।
ग्यालरीका अनुसार प्रदर्शनीमा फ्रान्स, जर्मनी, बेल्जियम, बेलायत, स्पेन, डच, नर्वेलगायत देशका प्रसिद्ध कलाकार मिलेट, पौल, लुइस डेभिट, गोया, टर्नर, भिन्सेन्ट भान गग, जे. विलन गोडवार्ड लगायतका कलाकारका चित्रहरू समावेश छन्। यसअघि पनि पाब्लो पिकासो र फ्रीडा काहलोका कृतिहरू प्रदर्शन भइसकेका थिए।
ग्यालरीकी कार्यकारी निर्देशक रीता खनालले अन्तर्राष्ट्रिय ग्यालरीहरूको अनुभवपछि नेपालमा पनि कला प्रदर्शनीको स्तर उकास्ने प्रयास भइरहेको बताइन्। उनका अनुसार विश्वका ठूला ग्यालरीमा रहेका कलाकृतिहरू एउटै स्थानमा हेर्न सकियोस् भन्ने उद्देश्यले यो प्रदर्शनी आयोजना गरिएको हो।
कार्यकारी निर्देशक खनालले प्रदर्शनीमा रहेका ३० वटा चित्र विभिन्न समयमा बनेका महत्वपूर्ण कृतिहरू भएको बताउँदै १९औँ शताब्दीमा युरोपमा विकसित भएका कला आन्दोलनहरू बुझ्न यसले सहयोग गर्ने उल्लेख गरिन्।
उक्त प्रदर्शनी यही जेठ १६ गतेसम्म सञ्चालन हुनेछ।
