काठमाडौं: राष्ट्रपति रामचन्द्र पौडेलसँग युवा आदान-प्रदान कार्यक्रम २०२५ मा सहभागी हुन नेपाल आएका भारत, भूटान र माल्दिभ्सका ‘राष्ट्रिय क्याडेट कोर’ (एनसिसी) का प्रतिनिधिमण्डलले आज शिष्टाचार भेट गरेका छन्।
महाशिवरात्रि तथा नेपाली सेना स्थापनाको २६२औँ वार्षिकोत्सवको अवसरमा काठमाडौंमा आयोजना हुने युवा आदान–प्रदान कार्यक्रममा सहभागी हुन आएका ती देशका टोलीले राष्ट्रपति निवास, शीतल निवासमा भेटवार्ता गरेका हुन्।
नेपाली सेनाले छिमेकी राष्ट्रका सेनासँगको आपसी सम्बन्ध सुदृढ गर्न ‘क्याडेट’ बीच सीप, संस्कृति र परम्पराको आदान–प्रदान गर्दै आएको छ। राष्ट्रपति पौडेल नेपाली सेनाका परमाधिपति हुन्।
यस कार्यक्रमले सहभागी देशहरूबीच सामाजिक, आर्थिक र सांस्कृतिक यथार्थ बुझ्न सहयोग पुर्याउने तथा आपसी सम्बन्धलाई अझ सुमधुर र प्रगाढ बनाउन भूमिका खेल्ने विश्वास गरिएको छ।
राष्ट्रिय सेवा दल (एनसिसी) द्वारा प्रदान गरिने तालिमले युवाहरूलाई अनुशासित, जिम्मेवार नेतृत्वकर्ता तथा असल नागरिकका रूपमा विकास गर्न मद्दत गर्ने लक्ष्य राखिएको छ। एनसिसीले असल अभ्यासको आदान–प्रदान गर्दै युवाहरूमा राष्ट्रियता, देशभक्ति, नेतृत्व, आत्मविश्वास र राष्ट्रसेवाको भावना प्रवर्द्धन गर्ने प्राथमिकता दिएको छ।
यही फागुन ९ गते नेपाल आएका उक्त भ्रमण टोलीमा ३४ जना प्रतिनिधि रहेका छन्। भेटका अवसरमा नेपालको राष्ट्रिय सेवा दलका कार्यकारी महानिर्देशक उपरथी यामप्रसाद ढकाल, भारतको एनसिसीका महानिर्देशक गुरवीरपाल सिंह, भुटान स्काउट एसोसिएसनका निर्देशक साङ्गे चोदेन, माल्दिभ्सका प्रतिनिधिमण्डलका प्रमुख रिफान अलीलगायतको उपस्थिति रहेको राष्ट्रपति कार्यालयले जनाएको छ।
